2022 оны 7-р сарын 30-ны өдөр smartbox.mn гэх веб хуудаст “5-11 насны вакцин хийлгээгүй хүүхдүүдийг сургуульд авахгүй” гэх гарчиг бүхий мэдээллийг Халдварт өвчин судлалын үндэсний төвийн хаяг бүхий, эмч нарын зурагтай хамт нийтэлжээ.
Энэхүү мэдээллийг фэйсбүүк хуудаст zuvlukh.com, erchuud.com, gerbul.life зэрэг домэйн бүхий веб хуудсууд түгээхээс гадна хувь хэрэглэгчид ч хаягаараа түгээн, үүнийг нь буруу хэмээн эсэргүүцсэн иргэд ч олон байгаа юм.
Тиймээс мэдээллийг нягталлаа.
FACTCHECK
Мөн вакцинд хамрагдаагүй хүүхдүүдийг сургуульд авахгүй талаар яригдаж эхэллээ – ХУДАЛ
ХӨСҮТ-өөс 2022 оны 7-р сарын 22-ны өдөр мэдээлэл хийсэн бөгөөд ингэхдээ “Халдварт Өвчин Судлалын Үндэсний Төвөөс цаг үеийн асуудлаар мэдээлэл өгч байна. Омикроны BA4, BA5 хувилбараар өвдсөн тохиолдолд хоолой өвдөх, халуурах, үе мөч өвдөх, тасралтгүй ханиалгах зэрэг шинж тэмдэгүүд нийтлэг илэрч байна. Тандалт, судалгааны албанаас хүмүүсийн эмнэлзүйн шинж тэмдгийг судалж үзжээ. Ингэхэд хоолой өвдөх 58 хувь, хуурай ханиалгах 56.3 хувь, толгой өвдөх 41.8 хувь, хоолой сэрвэгнэх шинж тэмдэг 41.4 хувь нь илэрсэн аж. Харин бага насны хүүхдүүдэд хоол боловсруулах замын хямралууд болох бөөлжих, суулгах зэрэг зовуурь 4-6 хувьд нь илэрч байна гэлээ. Наймдугаар сарын 1-нээс 5-11 насны хүүхдийг сарын зайтай хоёр удаагийн тунгаар дархлаажуулна” гэсэн юм.
Дээрх сайтын мэдээлэл нь arslan.mn сайтад нийтлэгдсэнтэй яг ижил боловч “Мөн вакцинд хамрагдаагүй хүүхдүүдийг сургуульд авахгүй талаар яригдаж эхэллээ” гэсэн ганц өгүүлбэрийг нэмсэн байгаа юм. Зураг болон текстийг тэр чигт нь хуулсан боловч ганц ийм өгүүлбэр нэмснээр агуулгыг тэр чигт нь өөрчилжээ. Өөрөөр хэлбэл санаатайгаар зураг болон текстийн агуулгыг өөрчилж худал мэдээллийг түгээж байгаа юм.
Эрүүл мэндийн сайдын тушаалын дагуу наймдугаар сарын 1-нээс эхлэн 5-11 насны хүүхдүүдийг КОВИД-19-ийн эсрэг дархлаажуулалтад хамруулах бэлтгэлээ хангаж байгаа бөгөөд вакцинд хамруулахдаа эцэг эхийн зөвшөөрөлд үндэслэн гарын үсэг зуруулж хийнэ гэдгийг ХӨСҮТ-өөс мэдэгдээд буй. Өөрөөр хэлбэл вакцин тариулсан эсэхээс хамаарч сургуульд суралцуулах эсэх асуудлыг хөндөхгүй, сургуульд авахгүй гэдэг нь худал мэдээлэл болно.
ДЭМБ-аас хүүхдийн вакциныг яаралтай горимоор хэрэглэх зөвшөөрөл өгсөн. Хүүхдүүдэд заавал вакцин тарихгүй. Тархвар судлалын заалтаар тарих юм. Аливаа вирус олныг хамарч байгаа тохиолдолд өвчний тархалтыг хязгаарлах, энэ өвчнөөс болоод эдийн засагт сөрөг нөлөө үзүүлэхээс сэргийлэх зорилгоор тархвар судлалын заалтаар хийнэ гэж хуульд заасан бөгөөд КОВИД-19-өөс урьдчилан сэргийлэх вакциныг Монгол Улсын хувьд сайн дурын үндсэн дээр хийж байгаа юм.
