Zorigtbaatar Nergui Borjigon гэх нэртэй фэйсбүүк хэрэглэгч БНХАУ-ын вакцинтай холбоотой мэдээллийг  тавдугаар сарын 14-ний өдөр оруулжээ. Уг мэдээллийг 150 хүн хуваалцжээ.

Тухайн иргэний оруулсан мэдээлэлд хэд хэдэн асуудлыг хөндсөн бөгөөд үүнийг нягталлаа.

Zorigtbaatar Nergui Borjigon “Хятад вакцины орц найрлагын талаар багахан бичвэр оруулчихъя!

-Vero cell ( африкийн ногоон сармагчны бөөрний эпител эсийг Vero cell буюу веро эс гэж нэрлэдэг. -Веро эс дээр эсийн вирусын өсгөвөр хийж вакцин хийхэд ашигладаг.)
-Хөнгөн цагааны гидроксид ( aluminum hydroxide )
-Фосфат буюу phosphate. ( фосфорын элемент )
-Натри сульфат ( sodium dodecyl sulfate )
-поливинилиденийн фторид ( polyvinylidene fluoride буюу тусгай хуванцар. Poly acetal ч гэж нэрлэдэг)
-Полиэфир ( Polyethylene glycol буюу PEG ч гэж нэрлэдэг. Газрын тосноос гаргаж авдаг полиэфирийн нэгдэл )

Хятад вакцинууд нь эдгээр химийн хүнд элементүүдээр коронавирусыг идэвхгүйжүүлж сармагчны веро эс дээр өсгөвөр хийсэн вакцин юм! Өөрийн гаргаж авсан вакцинаа өөрийн улсын иргэд дээр туршилт хийгээгүй дан өөр улсын иргэд дээр туршилт хийснийг дурдах нь илүүц биз ээ! PEG болон тусгай хуванцрууд нь хүний биед хорт хавдар үүсгэх аюултай бодис. Хөнгөн цагааны гидроксид нь мэдрэлийн системд нөлөөлж, мэдрэлийн эдэд хуримтлагдаж, төв мэдрэлийн тогтолцоонд ноцтой эмгэг үүсгэх аюултай. Түүнчлэн бөөрний үйл ажиллагааны доголдол үүсгэдэг байна. Дээрх эмгэг нь ихэвчлэн хөнгөн цагааны гидроксид агуулсан вакцинаар дамжин үүсдэг байна. Фосфор бод хүний биед байдаг хүний биед маш их хэрэгтэй элемент юм. Хүний яс, шүдний чухал элемент нь фосфор. Гэхдээ фосфорын илүүдэл нь зүрх судасны өвчлөлийн эрсдэл нэмэгдэж, зүрхний шигдээсний эрсдэлийг нэмэгдүүлдэг. Энэ нь цусан судасны дотоод хананд кальцийг хуримтлуулж, улмаар бөглөрөл үүсгэдэг байна. Натрийн сульфат ихдэж хордлогот шинж тэмдэг нь гэдэс гүйлгэх, шингэн алдах, ялгадас цустай гарах, цусны даралт буурах ба цусан дах натрийн хэмжээ ихсэх гэх мэтийн шинж  тэмдэг илэрдэг. Хятад вакцины өгч буй сөрөг шинж тэмдгүүд хүн бүрд харилцан адилгүй байгаа нь хүний бүрийн биеийн онцлогоос шалтгаалж буй юм. Жишээ нь хүн бүрийн идэж ууж, хэрэглэж буй зүйлс харилцан адилгүй байдгаас хүн бүрийн бие дэх эрдэс бодис нь их бага янз бүр байх нь ойлгомжтой. Тиймээс хүн бүрд янз бүрийн нөлөөлөл үзүүлээд буй хэрэг. Тиймээс вакцин эм тариаг маш болгоомжтой, маш сайн судалж туршилт хийж байж нийтийн хүртээл болгодог учиртай!” гэжээ.

Factcheck:

Монгол Улсад орж ирсэн БНХАУ-ын Бээжингийн биологийн бүтээгдэхүүний хүрээлэн ба Синофарм үйлдвэрийн BBIBP-CorV /Vero Cell/ вакциныг уламжлалт аргаар гаргаж авсан.

Бээжингийн биологийн бүтээгдэхүүний хүрээлэнгийн судлаачид орон нутгийн эмнэлэгт хэвтэн эмчлүүлж байсан өвчтөнүүдээс коронавирусийн гурван хэв шинжийг ялган авсан.

Эсийн дотор үржиж олшрох чадвартай нэг хэв шинжийг сонгон авч, коронавирусийн арвин нөөцтэй болсны дараагаар вирусийг бета-пропиолактон гэдэг бодис ашиглан химийн аргаар идэвхгүйжүүлсэн. Идэвхгүй болсон вирус халдвар үүсгэдэггүй ч бүтцийн уургууд нь хэвээр үлддэг. Вирусийг идэвхгүйжүүлсний дараагаар цэвэршүүлж, маш бага хэмжээний хөнгөн цагаанд суурилсан бодистой хольсон.

Хөнгөн цагаан нь вакцины нөлөөгөөр өрнөх дархлааны хариу урвалыг идэвхжүүлж, дархлаа тогтохыг нэмэгдүүлдэг. Вирусийг идэвхгүйжүүлж гарган авсан вакциныг 100 гаруй жилийн турш ашиглаж ирсэн бөгөөд халдварт саа, галзуу, А гепатит  зэрэг өвчний эсрэг вакциныг ижил аргаар гарган авсан байна. Тус вакциныг хүний булчинд тарихад антиген илчлэгч эсүүд гэж нэрлэгдэх дархлааны эсүүд идэвхгүйжүүлсэн вирусийг олзлон авдаг. Олзлон авч дотроо оруулсан идэвхгүйжүүлсэн вирусийг задалж тодорхой нэг жижиг хэсгийг гадаргуудаа гарган өгч дархлааны туслагч Т эсэд таниулж өгдөг.

Идэвхэжсэн дархлааны туслагч Т эс бусад дархлааны эсүүдийг идэвхжүүлж өгдөг. Идэвхгүйжүүлсэн вирусийн нөлөөгөөр идэвхэжсэн дархлааны В эс, өөрөөсөө эсрэг бие нэртэй уургийг нийлэгжүүлдэг. Ийнхүү вакцины нөлөөгөөр дархлааны эсүүд бэлтгэгдэж, амьд коронавирусийн халдвар биед орж ирэхэд эсрэг биеийг нийлэгжүүлж, нийлэгжсэн эсрэг бие нь амьд вирусийг эсэд нэвтэрч, халдвар үүсгэхээс сэргийлдэг.

Синофарм үйлдвэрийн BBIBP-CorV вакцин нь эмнэлзүйн туршилтаар хүнийг COVID19 өвчний үүсгэгч коронавирусийн халдвараас хамгаалж байгаа нь тогтоогдсон.

Вакцины нөлөөгөөр үүссэн хамгаалалт нь хэр удаан үргэлжлэхийг одоогоор хэн ч урьдчилан хэлэх боломжгүй байна. Вакцины нөлөөгөөр үүссэн эсрэг биеийн түвшин хэдэн сарын дараагаас буурах боломжтой.

Гэхдээ эсрэг биеийг нийлэгжүүлэх чадвартай санамжийн В эс нь коронавирусийн тухай мэдээллийг хадгалан хэдэн жилээс хэдэн арван жилийн турш биед орших чадвартай.

2020 оны 1 сард Синофарм үйлдвэр идэвхгүйжүүлсэн вакциныг үйлдвэрлэж эхэлсэн. 2020 оны 6 сард эмнэлзүйн 1 ба 2 шатны судалгаагаар тус вакцины нөлөөгөөр ямар нэг урвал, хүндрэл үүсээгүй ба вакцин тариулсан хүмүүст эсрэг бие үүсэж байгааг мэдээлсэн.

2020 оны 7 сараас эхлэн Арабын Нэгдсэн Эмират улс, Морокко, Перу зэрэг улсад эмнэлзүйн 3 шатны судалгаа эхэлсэн.

2020 оны 11 сарын байдлаар сая гаруй хятад хүн вакцинд хамрагдаад байгааг мэдээлсэн. 2020 оны 9 сард Арабын Нэгдсэн Эмират улс БНХАУ-ын BBIBP-CorV вакциныг бүртгэн авч эмнэлгийн ажилчдаа дархлаажуулсан ба 12 сард вакцины үр дүн 86 хувь байсныг мэдэгдсэн байдаг. 2020 оны 12 сард БНХАУ-ын засгийн газар вакцины үр дүнг 79.3 хувь байсныг мэдэгдсэн ч эмнэлзүйн 3 шатны судалгааны үр дүнг хараахан нийтлүүлээгүй байна.

2021 оны 1 сард Египет улс тус вакциныг бүртгэн авч, 2021 оны 3 сард Унгар улс тус вакцины нэг тунг 36 доллароор худалдан авахыг зөвшөөрсөн байдаг. 2021 оны 5 сарын 7-ны өдөр ДЭМБ Синофарм вакцины үр дүнг 78.1 хувь, яаралтай нөхцөлд хэрэглэх зөвшөөрлийг олгосон тухай мэдэгдээд байна.

Тиймээс дээрх мэдээллийн дийлэнх нь худал байна.

Эх сурвалж:
https://www.nytimes.com/interactive/2020/health/sinopharm-covid-19-vaccine.html
https://covid19.trackvaccines.org/vaccines/5/

НҮБ-ын Хүүхдийн Сангийн дэмжлэгтэйгээр нягтлав.