Хоёрдугаар сарын 18-ны өдөр ClubHouse аппликэйшн дээр хэсэг сэтгүүлчид вакцины талаар ярилцахаар өрөө үүсгэжээ. Уг өрөөнд УИХ-ын гишүүн М.Оюунчимэг оролцож, мэдээлэл өгөх үеэрээ “ДЭМБ-ын хүлээн зөвшөөрсөн 3 вакциныг авах бололцоо байгаа учраас бид үүн дээр илүү анхаарлаа хандуулж байна” гэсэн нь цахим орчинд бичлэг болон таржээ.
Түүний хэлсэн энэхүү мэдээллийг бид нягталлаа.
“ДЭМБ-ын хүлээн зөвшөөрсөн 3 вакциныг авах бололцоо байгаа”
Factcheck:
2021 оны хоёрдугаар сарын 19-ний өдрийн 12:00 цагийн байдлаар ДЭМБ-аас хоёр вакциныг бүртгэж, баталгаажуулаад байгаа юм.
Тодруулбал, 2020 оны 12-р сарын 31-ний өдөр Америкийн эмийн үйлдвэрийн томоохон компани болох “Pfizer” болон Германы “BioNTech” компаниуд хамтран гарган авсан Pfizer/BioNTech вакциныг коронавируст халдвараас урьдчилан сэргийлэх анхны вакцин хэмээн баталгаажуулсан.
Харин 2021 оны хоёрдугаар сарын 15-ны өдөр ДЭМБ Их Британийн Oxford-ын их сургууль болон Шведийн AstraZeneca компанийн хамтарсан AstraZeneca вакциныг яаралтай горимд хэрэглэх зөвшөөрөл олгосон юм.
Одоогоор нэмж зөвшөөрөл олгосон, баталгаажуулсан вакцин байхгүй.
“ДЭМБ-ын хүлээн зөвшөөрсөн 3 вакциныг авах бололцоо байгаа учраас бид үүн дээр илүү анхаарлаа хандуулж байна”
Factcheck:
Манай улсын хувьд шинэ коронавирусаас урьдчилан сэргийлэх вакцинжуулалтын ажилд дөрвөн төрлийн вакциныг ашиглахаар болсныг эрүүл мэндийн сайд С.энхболд хэлсэн.
Үүнд, АНУ, Германы хамтран гаргасан Pfizer/BioNTech, Оксфордын их сургууль Шведийн хамтран гаргасан AstraZeneca, БНХАУ-ын үйлдвэрлэж буй Синофарм, ОХУ-ын үйлдвэрлэж буй Спутник В вакцин болно.
Дөрвөн вакцины хоёр нь баталгаажсан бол хоёр нь баталгаажих шатандаа байна. БНХАУ болон ОХУ-ын вакциныг 2021 оны 3-4-р сардаа багтаан баталгаажуулж зөвшөөрөл олгох төлөвлөгөөтэй судалгааны ажил үргэлжилж байгааг ДЭМБ-аас мэдээлсэн.
Эдгээрээс харахад УИХ-ын гишүүн М.Оюунчимэгийн өгсөн мэдээлэл ташаа байна.
