Tulga Dandii хэмээн фэйсбүүк хаягнаас “Хятад вакцины 2-р тун бол үхлийн аюултай эрсдэл” гэсэн постыг тавдугаар сарын 17-нд хуваалцжээ. Уг постыг 1.8К хүн шэйрлэж, 147 хүн коммент бичиж, 143 хүн лайк дарсан байна.
Тус постод “Хятад вакцины найрлагад хялгасан судасны дотор талын ханын гялгар гадаргуу үүсгэгч эд эсийг идэмхий натри шиг идэн хялгасан судасны цусны циркуляцыг блоклон эргэлтийг зогсонги байдалд оруулдаг бодис орсон байна гэдгийг эрдэмтэд хөдөлбөргүй тогтоожээ. Нэгэнт хялгасан судсаар цус гүйхгүй болохоор богино эргэлт үүсч зүрхний доторхи кронари систем, амин судас аортад нэмэгдэл ачаалал үүсч бөглөрөн (atheromatose) нас барчихаж байна.Энэ бол зүрхний шигдээс биш, судасны потологи хүлхэнцэр ерөөсөө биш, хичнээн удаа шигдээс өгсөн хүмүүс амьд явж л байдаг. Энийг эмч нар судасны цус харвалт гэж ярьдаг, түргэн дуудаад амждаггүй юм” гэжээ.
Уг мэдээллийг нягталлаа.
Factcheck:
Монгол Улсад ашиглаж байгаа, БНХАУ-ын Синофарм үйлдвэрийн идэвхгүйжүүлсэн буюу Вироселл вакцины найрлагыг харвал
Үндсэн найрлага: идэвхгүйжүүлсэн 19n-CoV-CDC-Tan-HB02
Туслах найрлага: хөнгөн цагааны гидроксид,
Нэмэлт бодисууд: натрийн устөрөгчийн фосфат, натрийн хлорид, натрийн дигидрофосфат агуулжээ.
Хөнгөн цагаан вакцины найрлагад нэмэлтээр орсноор хүний дархлааны хариу урвалыг илүү сайжруулах нөлөөтэй. Вакцины найрлагад хөнгөн цагаан нэмэлтээр оруулснаар ямар нэгэн сөрөг нөлөө үзүүлдэггүй болохыг өнгөрсөн 60 жилийн судалгаа нотолно гэдгийг АНУ-ын Хүнс болон эмийн захиргаанаас мэдээлжээ. Хөнгөн цагааны агууламжтай бусад вакциныг ЭНД-ээс харж болно.
Нэмэлт бодисуудын тухайд тус вакцины 2021 оны тавдугаар сарын 26-нд шинээр танилцуулсан судалгаагаар тус вакцины үндсэн бодисгүйгээр туслах бодис тарьсан үр дүнг нийтэлжээ. Ийнхүү судлахад үндсэн бодисыг туслах бодисын хамт тарихад үр дүн өндөр гарсан талаар тайлбарласан байна. 25,000 хүнийг хамруулсан уг судалгаагаар урьдчилан сэргийлэх үр дүн 75%, хүндрэлээс 100% сэргийлж байгаа нь тогтоогджээ.
Харин вакцинаас шалтгаалж нас барсан гэсэн нотолгоо алга. Вакцин хийлгээд гарсан хамгийн ноцтой хүндрэл нь нэг хүн тариулсны дараа маш хүндээр дотор муухайрч бөөлжих зэрэг шинж тэмдэг илэрсэн тул эмнэлэгт хэвтүүлж эмээр эмчилсний дараа бүрэн эдгэрчээ. Өөр нэг тохиолдол нь вакцины дараа баруун дээд мөч хүчгүй болсон, ам, шүд мэдрэмжгүй болсон тул харьяа эмнэлэгтээ хэвтсэний дараа Гилайн-Баррегийн синдром, Тархмал хатуурал, Трансфер Смелит, АДЕМ -үүд үгүйсгэгдсэн. Одоогийн байдлаар тус өвчин нь вакцинтэй хамааралтай эсэхийг тогтоогоогүй байгаа аж.
НҮБ-ын Хүүхдийн Сангийн дэмжлэгтэйгээр нягтлав.
