Tumee Tim гэх фэйсбүүк хэрэглэгч 2025.03.26-нд COVID-19 вакцины судалгааны үр дүнгийн талаар пост оруулжээ.

Уг постод “COVID-19 вакцины эрүүл мэндэд үзүүлэх нөлөөний талаарх хамгийн том судалгаа дуусчээ. Эрдэмтэд дэлхий даяар вакцин хийлгэсэн 99 сая хүний мэдээллийг судалсан бөгөөд “УГ ВАКЦИНЫГ ХҮНД ХИЙХ НЬ АЮУЛТАЙ” гэсэн дүгнэл гарчээ” гэжээ.

Энэхүү мэдээллийг нягтлах хүсэлт ирсний дагуу нягталлаа.

Factcheck:

2021 онд дэлхий даяар хийсэн КОВИД-19 вирусийн эсрэг вакцинд хамрагдсан 99,068,901 буюу 99 сая хүнийг хамруулсан, вакцины гаж нөлөөний талаарх томоохон судалгааг олон улсын эрдэмтэд хийсэн үр дүнг өнгөрсөн хоёрдугаар сард нээлттэй байршуулжээ.

Судлаачид вакцинд хийлгэснээс хойших 42 хүртэл хоногт ажиглагдсан хариу урвалыг ажиглан эрүүл мэндийн 13 төрлийн асуудлыг вакцинтай холбоотой эсэхийг судалжээ.

Энэхүү мэдээллийг олон улсад ч мөн цахим орчинд түгээж байгаа тул Factcheck.org-ийн баримт нягтлагчид мөн шалгаж, бодит мэдээллийг хүргэсэн байна.

Пенсильванийн их сургуулийн Перелман анагаах ухааны сургуулийн Биостатистикийн хэлтсийн захирал Moderna, Pfizer/BioNTech вакцинуудтай холбоотой ховор тохиолддог зүрхний өвчин, түүнчлэн AstraZeneca, Johnson & Johnson вакцинуудтай холбоотой ховор өвчний талаар Factcheck.org-ийн баримт нягтлагчдад мэдээлэл өгөхдөө энэхүү судалгаа нь өмнө нь тогтоогдсон, хэдийн илрүүлсэн гаж нөлөөг баталгаажуулсан болохыг дурджээ. Харин шинэ зүйл гэвэл Moderna болон AstraZeneca вакцины эхний тунтай холбоотой аутоиммун мэдрэлийн ховор өвчин болох ADEM-ийн бүртгэгдсэн ховор тохиолдлыг үргэлжлүүлэн судлах боломжтой талаар хэлжээ.

Судалгааны үр дүнг Tumee Tim гэх хэрэглэгч постод эш татахдаа 249 хувь, 378 хувь гэгчлэн маш өндөр тохиолдол мэдээр бичсэн нь шууд хүмүүсийг төөрөгдүүлж байна.

OE ratio гэдэг нь судалгаагаар илэрсэн бодит тохиолдлын тоог илэрч болох тохиолдлын тоотой харьцуулсан үзүүлэлт ажээ.

Энэ талаар “Судалгааны дүнгийн хэсгээс харвал 99 сая хүнд тухайлбал, Guillain-Barre хам шинж буюу захын мэдрэлийн гэмтэл, саажилт үүсгэдэг аутоиммун өвчний 76 тохиолдол илэрч болохоос 190 тохиолдол илэрсэн байна. Энэ нь 1 сая хүнд 1 тохиолдол илэрдэг байтал 2 болж нэмэгдсэн гэсэн үг” хэмээн Агапе эмнэлгийн Чих хамар хоолойн мэс заслын эмч, анагаах ухааны магист Б.Гантулга өөрийн хуудсаараа дамжуулан олон нийтэд тайлбарлажээ.

10,000 хүн амд 1-ээс цөөн тохиолдож байгаа эмгэгийг маш ховор эмгэг гэж анагаах ухаанд үздэг байна. Тэгэхээр 1 саяд 2 тохиолдол гэвэг нь маш ховор, бараг өвчлөл үүсгээгүйтэй адил ажээ.  

КОВИД-19 цар тахлын эсрэг дархлаажуулалт эхэлж байх үед өндөр настай, суурь өвчтэй гэх мэт эрсдэлт бүлгийн хүмүүсийг хамгийн түрүүнд хамруулах бодлогыг улс орон бүр баримталсан. Тиймээс хүндрэл бас өндөр байх боломжтойгоос гадна ковидоор өвчилсөн эсэхийг үнэлэх боломжгүй байсан учраас судалгааны үр дүнг болгоомжтой тайлбарлах ёстойг дурджээ. Яагаад гэвэл дээрх өвчнүүд КОВИД-19 вирусээр өвчилсөн хүмүүсийн дунд илүү өндөр бүртгэгдсэн болохыг онцолсон байна.

Дэлхийн Эрүүл Мэндийн Байгууллага (ДЭМБ)цаас 2020.03.11-нд COVID-19 цар тахлын талаар зарласнаас хойш дэлхий даяар 13.5 тэрбум гаруй тун COVID-19 вакциныг хийжээ. 2023 оны арваннэгдүгээр сарын байдлаар дэлхийн хүн амын 70.5-аас доошгүй хувь нь COVID-19-ийн вакцины дор хаяж нэг тунг авсан байна.

COVID-19 вакцин нь бүх вакцин, эмнэлгийн бүтээгдэхүүний нэгэн адил гаж нөлөө үзүүлдэг бөгөөд ховор тохиолдолд ноцтой гаж нөлөө үзүүлдэг. Вакциныг дэлхий даяар сая сая хүний ​​аминд хүрсэн шинэ вирусээс хамгаалах зорилгоор нэвтрүүлсэн бөгөөд вакцин хийлгээгүй бол олон сая хүний ​​аминд хүрэх магадлалтай байсан. Мэргэжилтнүүд болон засгийн газрууд, эрүүл мэндийн байгууллагуудын дунд COVID-19 вакцины ашиг тус нь эрсдэлээс давж байна гэдэгтэй өнөөг хүртэл санал нэг байгаа юм.

Иймд дээрх иргэн бодит судалгааны үр дүнг буруу, дутуу тайлбарлаж, олон нийтийг айдаст автуулж, ТӨӨРӨГДҮҮЛСЭН байна.