@Batbold33455566 гэх твиттер хэрэглэгч “Дельтагийн дэгдэлтийн шинэ голомтоор Украиныг ДЭМБ тодрууллаа, прогноз тийм л байна.
Украины хэрэглэсэн вакцин манайтай усны дусал шиг адилхан, барууны цөөн тооны вакцин за тэгээд жунгаа вакцинанд бүх нийтийг хамруулсан, огтхон ч үр дүнгээ өгөөгүй” гэсэн агуулгыг жиргэжээ.
Уг жиргээг нягталлаа.
Factcheck:
Украин улсад COVID-19-ийн дельта хувилбарын анхны тохиолдол 2021.06.23-нд батлагджээ.
Долдугаар сарын 27-ны байдлаар тус улсад дельта вирусийн нийт 13 тохиолдол бүртгэгдээд байгааг ЭМ-ийн сайд нь мэдэгдсэнийг Украин дахь ДЭМБ-ын төлөөлөгчийн газрын тэргүүн Жарно Хабихт ярьсан байна.
Тус улс нь Европын орнуудаас цар тахалд хамгийн их өртсөн оронд тооцогдож буй. Учир нь Украинд вакцинжуулалт маш бага хувьтай байгаа талаар The Lancet сэтгүүлийн өгүүлэлд дэлгэрэнгүй мэдээлсэн байна.
2021.07.27-ны байдлаар тус улсад COVID-19-ийн 2,249,344 тохиолдол батлагдсанаас 52,876 хүн нас баржээ. Өдөрт 681 тохиолдол бүртгэгдсэн байна.
43,733,762 хүн амтай тус улсын 5.6% нь вакциндаа хамрагдаад байгаагаас нэг сая гаруй хүн л хоёр тунгаа авчээ.
Украинд коронавирусийн эсрэг вакцинжуулалт Европын бусад улсаас нэг сарын дараа эхэлсэн байна. Хэдийн ийнхүү эхэлсэн ч иргэд нь идэвх муутай байснаас 25,000 хүн нь нас баржээ. Энэ нь вакцины талаарх иргэдийн эргэлзээтэй холбоотой гэж үзсэн байна.
Судалгаагаар Украины иргэдийн 29% нь л вакцин аюулгүй гэж үзжээ.
Украин дахь UNICEF-ийн төлөөлөгч Лотта Силвандерийн хэлснээр Зөвлөлтийн үед дархлаажуулалтын төв байгууллага муу ажилласан, иргэд эрүүл мэндийн системд итгэдэггүй болон нийгэмд сөрөг ул мөр үлдээсэн зарим үйл явдалтай холбоотойгоор ийнхүү иргэд нь вакцинд итгэлгүй, идэвх сул байгаа гэжээ. Тодруулбал, 2008 онд нэгэн хүү улаанбурханы вакцин хийлгэсний дараа нас барсан байна. Хэдийгээр хүүгийн үхэл вакцинаас шалтгаалаагүй ч хэвлэл мэдээллийн хэрэгсэл вакцинтай холбон мэдээлснээс үүдэн таван жилийн хугацаанд хүүхдийн дархлаажуулалтад хамрагдалт 80%-аас 50% хүртэл буурч байжээ.
Үүнтэй холбоотойгоор тус улсын иргэдийн 50% нь COVID-19-ийн вакцинд хамрагдах төлөвлөгөөтэй байгаагаа мэдэгдсэн байна. Харин ДЭМБ хүн амын 65-70% нь дархлаажих хэрэгтэй хэмээн үзэж буй.
Тус улсад
- Pfizer/BioNTech – BNT162b2
- Janssen (Johnson & Johnson) – Ad26.COV2.S
- Serum Institute of India Covishield (Oxford/AstraZeneca formulation)
- Sinovac – CoronaVac
гэсэн дөрвөн төрлийн вакциныг ашиглахыг зөвшөөрчээ.
Гэхдээ нийт вакцины нөөцийнх нь 80% АстраЗенека бол цөөн хэмжээний Файзер вакцин татан авсан ба Синофарм үйлдвэрийн вакцинаас Засгийн газар нь татгалзаж байгаа ажээ.
Өнөөдрийн байдлаар дельта вирус хамгийн их тархаад байгаа орнуудыг доорх зургаас харна уу.
Монгол Улсын хувьд зорилтот хүн амынхаа 60%-ийг вакцинд бүрэн хамруулсан талаар Засгийн газар өнөөдөр мэдээлсэн. Үүний 74%-д нь БНХАУ-ын Синофарм үйлдвэрийн вакциныг ашигласан.
Хоёрдугаар сарын 23-наас эхлүүлсэн вакцинжуулалт ийнхүү үр дүнтэй, иргэд идэвхтэй байснаар нас баралтаас вакцин 92%-тай хамгаалж байгааг ХӨСҮТ болон ЭМЯ хамтран судалж тогтоосон тухай ХӨСҮТ-ийн захирал Л.Баттөр мэдээлсэн.
Хэрэв вакцинжуулалтыг ингэж явуулаагүй бол долдугаар сарын эхэн гэхэд нас баралт 15 мянга, цаашлаад 40 мянга давах байсан гэсэн тооцооллыг УОК-ын Эрдэмтдийн зөвлөлийн гишүүн, доктор Т.Бэгзсүрэн танилцуулсан юм.
Тиймээс дээрх жиргээ нь иргэдийг ТӨӨРӨГДҮҮЛСЭН байна.
Коронавирусийн цар тахлын энэ үед мэдээллийг заавал нягталж, баттай эх сурвалжаас авч байхыг FactCheck.mn сануулсаар байгаа. Хэрэв буруу мэдээллээс болж тухайн иргэн эрүүл мэндээрээ хохирвол хэн нэгэн хариуцлага хүлээхгүй гэдгийг мэргэжлийн байгууллагууд ч анхааруулж байна.
Эх сурвалжууд:
ЭМЯ
ХӨСҮТ
https://www.thelancet.com/journals/laninf/article/PIIS1473-3099(21)00156-0/fulltext
https://www.statista.com/statistics/1243632/covid-19-vaccination-by-age-ukraine/
https://graphics.reuters.com/world-coronavirus-tracker-and-maps/countries-and-territories/ukraine/
https://qz.com/india/2036052/delta-variant-is-causing-a-surge-in-covid-cases-globally/
НҮБ-ын Хүүхдийн Сангийн дэмжлэгтэйгээр нягтлав.
