Япон улс манай улсад 1.3 сая хүнд шаардлагатай вакцин нийлүүлэхээр болсон талаар Пүрэв гарагт Гадаад харилцааны яамнаас мэдээлсэн. 

Уг мэдээлэлд “КОВИД-19 цар тахал болон нийгмийн эрүүл мэндийн онцгой байдлын үеийн чадавхыг бэхжүүлэхэд чиглэсэн 21.5 сая ам.долларын буцалтгүй тусламжийн энэхүү төсөл нь 2 үе шаттай хэрэгжиж, Монголын хүн амын 1.3 сая хүнд шаардлагатай тун вакциныг Япон Улсын Засгийн газар НҮБ-ын Хүүхдийн сан (UNICEF)-аар дамжуулан нийлүүлж, вакцины “хүйтэн хэлхээ”-г бүрдүүлэх тоног төхөөрөмжийн хангамжийг шийдвэрлэх юм” гэж мэдээлэв.

Энэ талаар олон нийтийн сүлжээнд “Япон улсаас Монголд вакцин өгнө” хэмээн түгээж эхэлсэн. 

Уг мэдээллийг нягтлан хүргэж байна. 

UNICEF-ээс олон нийтэд өгсөн мэдээлэлд “Төслийн хүрээнд Монгол Улсын хүн амын 40 хувийг КОВИД-19-ийн эсрэг дархлаажуулахад хүрэлцэх 2.7 сая тун вакцин болон дархлаажуулалтын хүйтэн хэлхээний шаардлагатай тоног төхөөрөмжийг худалдан авах, дархлаажуулалтын талаарх мэдээлэл, сурталчилгаа хийх үйл ажиллагааг санхүүжүүлнэ” гэжээ.

Өөрөөр хэлбэл, Япон улсаас вакцин ирэхгүй, харин вакцинаа хангах санхүүгийн дэмжлэгийг уг хамтын ажиллагааны хүрээнд үзүүлэхээр байна. 

Мөн ГХЯ-ны Төрийн нарийн бичгийн дарга Н.Анхбаяр “Япон улсын Засгийн газар НҮБ-ын Хүүхдийн сангаар дамжуулан оруулж ирэх, эсвэл манай яам олон талт хамтын ажиллагааны хүрээнд оруулж ирэх гэсэн хоёр хувилбар яригдаж байна. Хэрэв Япон улс вакцины асуудлаа шийдвэл заавал Японоос вакцин орж ирнэ гэсэн үг биш, тухай үйлдвэрлэгч компаниас ирж болно. AstraZeneca, Pfizer, Moderna гэсэн гурван төрлийн вакцин орж ирэх юм. Вакцины олдоц муу байгаа учраас зургадугаар сараас ирнэ гэдэг бодитой хугацаа” хэмээн тайлбарлалаа.