Гоо Гоо хэмээн фэйсбүүк хаягаас “АНУ-ын Дээд шүүх бүх нийтийн вакцинжуулалтыг цуцаллаа” гэсэн гарчиг бүхий постыг 2021.06.13-нд нийтэлжээ.
Уг постод “АНУ-д Дээд шүүх бүх нийтийн вакцинжуулалтыг цуцалжээ. Билл Гейтс, АНУ-ын Халдвар судлалын ахлах мэргэжилтэн Фаучи, Биг Фарма нар АНУ-ын Дээд шүүхэд өнгөрсөн 32 жилийн хугацаанд хийсэн бүх вакцинууд нь иргэдийн эрүүл мэндэд аюулгүй байсныг нотолж чадаагүй тул шүүхэд ялагдлаа! Энэ нэхэмжлэлийг сенатор Кеннеди тэргүүтэй хэсэг эрдэмтэд гаргасан байна. Бага Роберт Кеннеди: “Шинэ COVID вакцинаас ямар ч хамаагүй зайлсхийх хэрэгтэй” гэсэн агуулгыг дурдсан бөгөөд 190 хүн лайк дарж, 36 хүн коммент бичиж, 275 хүн шэйрэлжээ.
Цар тахлын энэ хүнд үед коронавирусийн эсрэг вакцины талаар маш олон мэдээлэл олон нийтийн сүлжээнд тарж байгаа тул иргэд найдвартай, албан ёсны эх сурвалжаас мэдээллийг авч, аливаа мэдээллийг заавал нягталж байхыг FactCheck.mn сануулсаар байгаа билээ.
Коронавирусийн халдварын эсрэг дархлаажуулалт дэлхий даяар эрчимтэй явагдаж байгаа энэ үед дээрх мэдээлэл зөвхөн Монголд төдийгүй бусад улс оронд тархаж, олон хүний анхаарлыг татжээ. Вакцин эсэргүүцсэн ээжүүд мөн дээрх мэдээллийг эш татаж буй.
Тийм ч учраас уг мэдээллийг олон улсын баримтыг нягтлагчдын төлөөлөл болох US Today-ийн сэтгүүлчид нягталсныг бид хүргэж байна.
FactCheck:
Яг энэ агуулга бүхий мэдээллийг Нигерийн Inspirer Radio хэмээх цахим хуудаст 2021 оны тавдугаар сарын 23-нд анх нийтэлжээ. Улмаар уг мэдээллийг баримтжуулсан зураг олон нийтийн сүлжээгээр тархаж, олон орны хүмүүст хүрсэн байна.
АНУ-ын Дээд шүүх вакцинжуулалтын эсрэг шийдвэр гаргаагүй байна. Мөн Нигерийн Inspirer Radio-г эрхлэн ажиллуулдаг компанийн гүйцэтгэх захирал Ikedieze Kanu Okorie уг мэдээллийн талаар нотолгоо байхгүй гэдгийг өөрөө мэдэгдсэнээс гадна тавдугаар сарын 26-нд буюу гурван өдрийн дараа уг ташаа мэдээллийн нягталсан байдлаар нийтэлжээ.
Тэрхүү нягталсан мэдээллийн эх сурвалж нь France-Presse агентлаг(AFP) бөгөөд тус агентлаг энэ тухай мэдээллийг өнгөрсөн дөрөвдүгээр сард нягталж, мэдээлсэн байна. Баримтыг нягтлах явцад нь АНУ-ын Northeastern их сургуулийн Хуулийн сургуулийн Эрүүл мэндийн бодлого, хуулийн төвийн захирал, хуулийн ухааны профессор Вэнди И.Пармет тус улсын Дээд шүүх хүүхдийг сургуульд сурахаас өмнө вакцин хийлгэхийг шаардсан мужийн хуулиуд Үндсэн хуультай нийцсэн гэж үзэж байсныг дурдаад, Дээд шүүхийн түүхэнд вакцины талаарх шийдвэрээ хүчингүй болгосон тохиолдлыг мэдэхгүй гэдгээ хэлжээ.
АНУ-д бүх нийтийн вакцинжуулалтыг цуцалсан тохиолдол сүүлийн үед гарсан эсэхийг Дээд шүүхийн албан бус архив буюу Oyez төслийн нээлттэй мэдээллээс шүүхэд байгаагүй аж. Албан ёсны хуудаст ч мөн сүүлийн үед тийм шийдвэр гарсан тохиолдол огт байгаагүй ажээ. Олон нийтийн сүлжээгээр тархсанчлан Гейтс, Фаучи нарыг хамтран яллагдагчаар нэрлэсэн тохиолдол аль ч хайлтад байгаагүй.
Нэгдсэн улсын хуулинд бүх иргэдэд вакцин хийлгэхийг үүрэг болгосон хууль гэж байдаггүй, харин мужууд болон ажил олгогчид вакцин хийлгэх шаардлага тавьдаг байна. Тухайлбал, 50 муж улсад улсын сургуульд явах хүүхдүүдэд зарим вакцин хийлгэсэн байхыг шаарддаг. Харин COVID-19-ийн вакциныг шаардах тухай нэг ч муж улс шийдвэр гаргаагүй байна.
Гоо Гоо гэх хэрэглэгчийн уг постод “Бага Роберт Кеннеди: “Шинэ COVID вакцинаас ямар ч хамаагүй зайлсхийх хэрэгтэй” гэсэн байв.
Үүнийг ч мөн нягталсан байна.
FactCheck:
“Энэ мэдээлэл бол үнэн биш бөгөөд хаанаас ийм зүйл гарч ирж яригдсаныг мэдэхгүй юм” хэмээн Кэннэди US Today-д албан ёсны байр сууриа илэрхийлж, и-мэйл илгээжээ.
Эх сурвалжууд:
https://factcheck.afp.com/us-supreme-court-did-not-rule-against-mandatory-vaccination
https://factcheck.afp.com/us-supreme-court-did-not-rule-against-mandatory-vaccination
https://www.supremecourt.gov/docket/docket.aspx
НҮБ-ын Хүүхдийн Сангийн дэмжлэгтэйгээр нягтлав.
