Монгол Улс шинэ коронавирусээс урьдчилан сэргийлэх дархлаажуулалтад АстраЗенека вакциныг ашиглахыг түр хугацаагаар хойшлуулсан талаарх мэдээллийг цахим орчинд түгээж эхэллээ.
Дани, Норвеги, Исланд улс Оксфордын их сургууль болон Англи-Шведийн “АстраЗенека” компанийн хамтран боловсруулсан вакцины хэрэглээг түр зогсоож, уг вакцин цусны бүлэгнэл үүсгэж байгаа эсэхийг судлахаар болсон талаарх мэдээллийг өнөөдөр өглөө ВВС мэдээлсэн.
Уг мэдээлэлтэй холбоотойгоор манай улс дархлаажуулалтдаа ашиглаж байгаа АстраЗенека вакциныг мөн түр хугацаагаар хойшлуулахаар болсон гэх мэдээлал цахим орчинд гараад байгаа юм.
Энэхүү мэдээллийг нягталлаа.
Энэ талаар Эрүүл мэндийн яамны хэвлэлийн төлөөлөгч Б.Ууганбаяр “АстраЗенека вакциныг Европын 8 улс түр хойшлуулсан мэдээлэл байна. Ийм мэдээллийг судалж байна. Зарим хэвлэл Монголд хийхгүй болсон мэт ташаа ойлголт төрүүлэхүйц мэдээлэл явуулж байна. Монгол Улсын хувьд вакцинжуулалт хэвийн үргэлжилж байгаа болно” гэсэн тайлбарыг өглөө.
Харин вакцинжуулалтыг хариуцан ажиллаж буй Нийслэлийн онцгой комисс “АстраЗенека вакцинаар дархлаажуулалтыг үргэлжлүүлж байна. Түр зогсоох талаар ямар нэг шийдвэр гараагүй” гэлээ.
Өөрөөр хэлбэл АстраЗенека вакциныг дархлаажуулалтад хэрэглэхийг түр зогсоосон гэдэг мэдээлэл ташаа байна.
