Есдүгээр сарын 3-наас эхэлж “Эрдэнэс Тавантолгой” ХК-ийн хувьцааны ногдол ашгийг хуваарилан иргэдэд тарааж эхэлсэн.
Үүнтэй холбоотойгоор нийгмийн сүлжээ тэр дундаа facebook, twitter, зарын сайт зэрэг сүлжээгээр “Эрдэнэс Тавантолгой” ХК-ийн хувьцааг худалдан авах, барьцаалж зээл олгох, ногдол ашгийн мөнгийг шуурхай олгоход тусална гэх мэдээллүүд ихээр гарч эхэлсэн.
Уг мэдээллийг шалгах хүсэлт уншигчаас ирсний дагуу бид нягталлаа.
“Эрдэнэс Тавантолгой” ХК-ийн хувьцааг худалдан авах, барьцаалах боломжгүй юм байна. Өөрөөр хэлбэл, Монгол Улсын Засгийн газрын 2012 оны 181 дүгээр тогтоолын хүрээнд “Эрдэнэс-Тавантолгой” ХК-ийн иргэдэд эзэмшүүлсэн хувьцаа нь захиран зарцуулахгүй байх нөхцөлтэй буюу арилжаалагдах, бусдад шилжүүлэх боломжгүй байхаар зохицуулсан.
“Эрдэнэс-Тавантолгой” ХК –ийн 1072 хувьцаа дотоодын хөрөнгийн бирж дээр нээлттэй болсны дараа Санхүүгийн зохицуулах хорооны “Үнэт цаасаар гэрчлэгдсэн өмчлөх эрхийг бусдад бэлэглэх, өвлүүлэх тухай шинэчилсэн журам”-ын дагуу өвлөх, бэлэглэх эрх нээгдэнэ.
Мөн цахим орчинд тавигдаж буй мэдээ, мэдээллийг сайтар нягталж, эрх бүхий байгууллагаас гаргасан зөвлөмж, “Эрдэнэс Тавантолгой” ХК-ийн олон нийттэй харилцах алба, өөрийн хувьцааны данс нээлгэсэн үнэт цаасны компаниас 1072 ширхэг хувьцааны ногдол ашгийн талаарх мэдээллийг тодруулж эрсдэлээс урьдчилан сэргийлэхийг Санхүүгийн зохицуулах хорооноос албан ёсоор анхааруулжээ.
Нягталсан: Ц.Тамир (MCIR)
