@z_munkhsaikhan гэх твиттер хаягтай иргэн 2023.09.27-нд барилгын газар олголттой холбоотой дараах жиргээг оруулжээ. Тэрбээр ЗГХЭГ-ын дарга Д.Амарбаясгалангийн жиргээний доор “Сайдаа УБ хотод ийм газарт 15-23 давхар барилга барих зөвшөөрлийг 2023/09 сард ичихгүй өгсөн байна. Авилга 2 барилга гэж харж байна. Юун түгжрэл шийдэх. Үүндээр анхаарч өгөөч.” гээд доорх зургийг хавсаргасан байна.
Энэхүү мэдээллийг нягтлах хүсэлт уншигчдаас ирсний дагуу нягталлаа.
Factcheck:
Барилга барихаар зэхэж байгааг харуулсан тус зураг дээрх талбай нь Монголын Үндэсний Олимпын хорооны зүүн хойно, Цэнгэлдэх хотхоны байрны зүүн тал ажээ.
Уг байршилд ямар барилгын даалгавар байгааг Хот байгуулалт, хөгжлийн газрын цахим сайт дахь нээлттэй мэдээллээс харлаа.
Хан-Уул дүүргийн 15-р хорооны нутаг дэвсгэр, автомашины зогсоол байгаа уг хэсэгт дөрвөн өөр барилга архитектурын даалгавар байгаа нь харагдаж байна.
(Тод улбар шараар хүрээлэгдсэн хэсэг)
Тодруулбал, “Өөжин” ХХК-д 2019-2023 онд нийт дөрвөн удаагийн зөвшөөрөл олгожээ.
Нэгдүгээрт, 2019.07.21-нд 16 давхар бүхий нөхөн сэргээх сувллын зориулалттай барилгын ажлын даалгав гарсан бол 2022 онд Эмнэлэг, худалдаа, үйлчилгээний цогцолбор болж өөрчлөгджээ. Ингэхдээ барилгын давхрыг 24 болгож нэмсэн бөгөөд зөвшөөрлийг нэг жилийн хүчинтэй гаргажээ. Харин 2023 онд тус бүр таван давхар бүхий хоёр блок, үйлбилгээний албан конторын барилга болгон зориулалтыг өөрчилжээ.
“Өөжин” ХХК-ийг Улсын бүртгэлийн ерөнхий газрын нээлттэй мэдээллээс харвал 2014.10.01-нд Япон улсын иргэн Като Кэйчи, Монгол Улсын иргэн Энхбатын Бадар-Ууган нарын хамтран байгуулсан гадаад худалдааны чиглэлийн компани байж байгаад 2020.10.18-нд эцсийн өмчлөгч нь Энхбатын Бадар-Ууган болж өөрчлөгдсөн.
Э.Бадар-Ууган нь Монгол Улсын гавьяат тамирчин, хөдөлмөрийн баатар, олимпын аварга боксчин, Монголын Үндэсний Олимпийн Хорооны ерөнхий нарийн бичгийн дарга. МҮОХ-ны газарт түүний гэр бүлийн хамт эрхлэн ажиллуулдаг “Өөжинмед” нэртэй үр шилжүүлэн суулгах төвийн барилга баригдан үйл ажиллагаа явуулж байгаа юм.
