Товч агуулга
- Вакцинууд нь тухайн халдварт өвчин, вирусийн шалтгаанаар үүсэх олон төрлийн эмгэгээс урт хугацаанд хамгаалах зорилготой.
- Улаанбурханы эсрэг вакцин ихэнх хүнд насан туршийн дархлаа бий болгосон бол Гепатит В-ийн вакцин дор хаяж 30 жил хамгаалдаг.
- Хүний папиллома вирусийн ДНХ умайн хүзүүний хорт хавдрын эсүүдээс байнга илэрдэг ба энэ нь вирусийн оролцоог нотолдог.
- ХДВ-ийн вакциныг эрт үед нь сэргийлэхэд умайн хүзүүний хорт хавдрын өвчлөлийг 20 ба түүнээс дээш жилээр мэдэгдэхүйц бууруулах боломжтой нь тогтоогдсон.
Батсайхан Амараа Амартүвшин гэх фэйсбүүк хэрэглэгч 2024.12.02-нд “Хэзээ ч 20 -30 жилийн дараах эрсдлээс хамгаалах вакцин дэлхий дахинд байхгүй!!! Умайн хүзүүний хорт хавдраас хэзээ ч папалома вирус илрээгүй!!!!” гэсэн пост оруулжээ.
Уг мэдээллийг нягталж өгөх хүсэлт ирсний дагуу нягталлаа.
“Хэзээ ч 20 -30 жилийн дараах эрсдлээс хамгаалах вакцин дэлхий дахинд байхгүй!!!”
Factcheck:
Вакцинууд нь тухайн халдварт өвчин, вирусийн шалтгаанаар үүсэх олон төрлийн эмгэгээс урт хугацаанд хамгаалах зорилготой. Ингэхдээ дархлааны системийг олон арван жилийн турш үр дүнтэй байх санах ойн эсийг хөгжүүлэхэд түлхэц үзүүлдэг.
Үүний зарим жишээг дурдвал:
Цагаанцэцэг өвчний эсрэг вакцин – уг өвчнийг устгахад хувь нэмэр оруулж, олон арван жилийн дархлааг хангасан.
Улаанбурханы эсрэг вакцин – Энэ вакцинд хамрагдсан ихэнх хүнд насан туршийн дархлаа бий болгодог.
Гепатит В вакцин – Энэ вирусийн эсрэг вакцинд хамрагдсан ихэнх хүнийг дор хаяж 30 жил хамгаалдаг.
Хүний папиллома вирусийн эсрэг вакцин нь өндөр эрсдэлтэй вирусийн хэв шинжийн халдвараас урьдчилан сэргийлж байгаа нь 15 жилийн судалгаагаар тогтоогдсон бөгөөд халдвар авахаас эрт үед нь сэргийлэх нь умайн хүзүүний хорт хавдрын өвчлөлийг 20 ба түүнээс дээш жилээр мэдэгдэхүйц бууруулах боломжтой нь тодорхой болсон.
“Умайн хүзүүний хорт хавдраас хэзээ ч папалома вирус илрээгүй!!!!”
Factcheck:
Хүний папиллома вирус (ХПВ), ялангуяа ХПВ-16, ХПВ-18 зэрэг өндөр эрсдэлтэй хэв шинжүүдийн байнгын халдвар нь умайн хүзүүний хорт хавдрын 70-90 хувийн гол шалтгаан нь болдог. Дэлхийн Эрүүл Мэндийн Байгууллага болон Хавдар судлалын үндэсний хүрээлэнгийн мэдээлснээр дэлхий даяар умайн хүзүүний хорт хавдрын тохиолдлын 90 гаруй хувьд нь ХПВ-ыг илрүүлдэг. Энэ нь умайн хүзүүний эсийн өөрчлөлтөд хүргэж, олон жилийн туршид эмчлэхгүй бол хорт хавдар болж хувирдаг. Үүнийг шинжлэх ухааны судалгаагаар баталгаажуулсан бөгөөд үүнээс ХПВ-ийн эсрэг вакцин үр дүнтэй хамгаалж байгаа нь мөн нотлогдсон.
Өөрөөр хэлбэл, ХПВ-ийн ДНХ умайн хүзүүний хорт хавдрын эсүүдээс байнга илэрдэг бөгөөд энэ нь вирусийн оролцоог нотолдог байна.
Тиймээс Батсайхан Амараа Амартүвшин дээрх пост дахь агуулга нь бүхэлдээ ХУДАЛ байна.
НЭМЭЛТ МЭДЭЭЛЭЛ
Манай улс умайн хүзүүний хорт хавдрын өвчлөлийн түвшнээрээ 2022 оны байдлаар дэлхийн 185 орноос 53-рт эрэмбэлэгдэж, дэлхийн дунджаас 3 дахин, Ази, Номхон далайн баруун бүсийн орнуудын, Зүүн Азийн орнуудын дунджаас 1.5 дахин өндөр байна.
Харин нас баралтын түвшнээр дэлхийн 185 орноос 69-рт эрэмбэлэгдэж дэлхийн дунджаас 1.3 дахин, Ази номхон далайн баруун бүсийн орнууд, Зүүн Азийн орнуудын дунджаас 2 дахин өндөр байна.
2023 онд 425 эмэгтэй энэ халдвараар оношлогдож, 160 эмэгтэй УХХХ-ын шалтгаанаар нас барж байна.
Хүний папиллома вирусийн эсрэг вакциныг дэлхийн 140 гаруй улс нэвтрүүлсэн бөгөөд 76 нь сургуульд суурилсан байдлаар зохион байгуулж байна.
Эрүүл ахуйн ердийн арга хэмжээ нь ХПВ-ийн халдвар дамжихаас урьдчилан сэргийлэхэд үр дүнгүй болох нь батлагдсан тул вакцин чухал ач холбогдолтой болох нь нотлогдсон.
Эрүүл мэндтэй холбоотой аливаа мэдээллийг заавал нягталж, албан ёсны баталгаатай эх сурвалжаас авч байхыг Factcheck.mn сануулж байна.
Эх сурвалжууд:
- Халдварт өвчин судлал, хяналтын төв
- ХСҮТ
- ХӨСҮТ
- ЭМЯ
- Хавдрын Үндэсний зөвлөл
- ДЭМБ
- АНУ-ын Хавдрын үндэсний төв
