FactCheck.mn сайт арванхоёрдугаар сард “1 сар 1 сэдэв”-ийн хүрээнд “Хүүхдийн чихрийн хэтэрсэн хэрэглээ”-ний талаар холбогдох мэдээллүүдийг бэлтгэн хүргэж байгаа.
Тэгвэл энэ удаа бид хүүхдийн бэлэгний сахарыг хэмжиж үзсэн юм. Учир нь энэ сард хүүхдүүдэд хамгийн их чихэр, сахартай бэлэг худалдан авч өгдөг. Бэлгийг сонгохдоо хүмүүсийн хамгийн түгээмэл авдаг, 30-40 мянган төгрөгийн бэлгийг сонгон авч, ШУТИС-ийн Хүнс, хөнгөн үйлдвэрлэл, дизайны сургуулийн Био технологи, шим судлалын ахлах багш Н.Сугарын хамт хэмжиж үзсэн юм.
Тэгэхэд нэг уут бэлгэнд 147-383 грамм сахар байсан юм. Энэ нь зөвхөн сахрын хэмжээ бөгөөд тосны агууламж өндөр байгааг ахлах багш Н.Сугар хэлж байсан юм.
Мөн тэрбээр “Хүүхдүүдийн чихрийг тэр чигт нь хорих боломжгүй учраас хязгаарлах л чухал. Хүүхдэд багаас нь хоол, шим тэжээлийн боловсрол олгох ёстой. Аав, ээж нар ч өөрсдөө хоол, хүнсний талаарх мэдлэг, мэдээлэлтэй болох ёстой. Супер сайн хүнс, супер муу хүнс гэж байхгүй. Зөвхөн түүнийг хэмжээнд нь хэрэглэх л чухал. Хэрвээ та хүүхдэдээ ийм бэлэгнүүд авч өгөөд, хүүхэд идээд, ямар нэг байдлаар өвдвөл тэр таны л буруу болно. Учир нь та өөрөө авч өгсөн шүү дээ. Хүнсний бүтээгдэхүүний төрөл маш олон болох тусам хэрэглэгч хэрсүү байх ёстой” гэсэн юм.
Сонирхуулахад, хамгийн хямд бэлгэнд хамгийн их сахар агуулагдаж байсан бөгөөд үнэ өсөх тусам сахрын хэмжээ буурч байв.
