Нийслэлийн Засаг дарга Б.Пүрэвдагва энэ оны зургаадугаар сарын 2-нд А/820 дугаар захирамж гаргаж, цахилгаан скүүтер, мопедын түрээсийн үйлчилгээтэй холбоотой өмнөх А/387, А/552 дугаар захирамжуудыг хүчингүй болгожээ.

Энэ нь Авлигатай тэмцэх газар (АТГ)-аас нийтийн эзэмшлийн талбайд үйл ажиллагаа явуулж буй цахилгаан скүүтер, мопедын түрээсийн үйлчилгээ нь эрх зүйн зохицуулалтгүй, иргэдийн амь нас, эрүүл мэнд, аюулгүй байдал хангагдаагүй гэж үзэн, энэ оны дөрөвдүгээр сарын 28-нд Нийслэлийн Засаг даргад шаардлага хүргүүлсэнтэй холбоотой аж.

АТГ-ын комиссар Б.Билэгтийн мэдээлснээр, Авлигын эсрэг хуулийн 18.4.2-т заасан “Авлига гарч болох нөхцөл боломж бүрдүүлсэн гэж үзвэл төрийн байгууллага, албан тушаалтны гаргасан тушаал, шийдвэр, журам, дүрмийг хянаж хүчингүй болгуулах санал боловсруулж эрх бүхий байгууллагад оруулах” бүрэн эрхийн хүрээнд дээрх захирамжуудыг хянаж, үйл ажиллагааг түдгэлзүүлэх шаардлагыг хүргүүлжээ.

Түүний хэлснээр, нийтийн эзэмшлийн талбай ашиглах болон цахилгаан мопед түрээсийн үйлчилгээ эрхлэх энгийн зөвшөөрлийг нэр бүхий зургаан аж ахуйн нэгжид олгосон байсан байна. Гэвч уг зөвшөөрөл нь өмнө нь олгож байгаагүй шинэ төрлийн зөвшөөрөл байсан бөгөөд хүний амь нас, эрүүл мэндийг хамгаалах шаардлагатай холбоотой зохицуулалт, зөвшөөрлийн жагсаалттай давхцаж байгаа эсэх, улсын тэмдэгтийн хураамжийн хэмжээ зэрэг асуудал тодорхойгүй байсан гэж АТГ үзжээ.

Мөн скүүтер, мопедыг хууль тогтоомжид ямар төрлийн тээврийн хэрэгсэлд хамааруулах нь тодорхой бус байсан төдийгүй нийслэлийн зарим хэрэгжүүлэгч агентлаг хуульд заагаагүй эрх хэрэгжүүлсэн нөхцөл байдал тогтоогдсон байна.

Үүнээс гадна түрээсийн үйлчилгээ эрхлэгч компаниуд зориулалтын зам, зогсоол байгуулах, хөдөлгөөний аюулгүй байдлыг хангах тэмдэг, тэмдэглэгээ байрлуулах үүргээ бүрэн хэрэгжүүлээгүй нь дээрх захирамжуудыг хүчингүй болгох үндэслэл болсон гэж АТГ тайлбарлав.

Энэ талаар Тээврийн цагдаагийн албанаас тодруулахад, скүүтер болон мопедын жолооч нар одоогоор Монгол Улсын Замын хөдөлгөөний дүрмийн 25 дугаар зүйлд заасан шаардлагыг мөрдөх ёстой гэв.

Тус дүрэмд мопедыг 16-аас дээш насны хүн жолоодох эрхтэй бөгөөд унадаг дугуйн зам, эгнээгээр зорчих ёстой гэж заасан байдаг. Харин унадаг дугуйн зам байхгүй эсвэл ашиглах боломжгүй тохиолдолд зорчих хэсгийн баруун захад байрлан явж болно. Мөн ийм замгүй үед явган хүний замаар цагт 10 км-ээс илүүгүй хурдтай зорчихыг зөвшөөрсөн байна.

Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн Г.Отгонтамир “Одоогоор замын хөдөлгөөний дүрэм хүчин төгөлдөр хэвээр мөрдөгдөж байгаа. Зөвхөн нийслэлийн захирамжууд хүчингүй болсон болохоос хөдөлгөөнд оролцох үндсэн журам өөрчлөгдөөгүй” гэж мэдэгдлээ.