Medee.mn сайтын фэйсбүүк хуудаст 2024.11.04-ний 15:50 цагт “Иргэн Ч.Батаа: МИАТ маань асар хүнд байгаа тухай сонсоод шилэн данс руу орж харахад эхний хагас жилийн байдлаар 50,7 тэрбумын алдагдалтай ажиллажээ. Орон нутгийн нислэгийн алдагдлыг, гадаад нислэгийн орлогоос нөхөж ажилла гэж шахаж байгааг сонсож байсан юмсан. Түрээсээр онгоц авсан байгаа, өр нэмэгдэж хүүний зардал өссөн, бусад зардлууд дээрээ менежмент хийхгүй бол ч зогслоо шүү.” гэсэн пост оруулжээ.

Энэхүү мэдээллийг нягталж өгөх хүсэлт ирсний дагуу нягталлаа.

Factcheck:

МИАТ төрийн өмчит компанийн шилэн дансыг шалгаж үзлээ. Тус компанийн 2024 оны хагас жилийн байдлаар 50.77 тэрбум төгрөгийн алдагдалтай тайланг хавсаргажээ. Гэвч компанийн үйл ажиллагааг хагас жилийн тайлангаар дүгнэх нь өрөөсгөл. Тиймээс өнгөрсөн 2022, 2023 оны тайланг мөн шилэн данснаас шүүж үзэв.

2022 оны жилийн эцсийн байдлаар МИАТ компани 36.9 тэрбум төгрөгийн ашигтай ажилласан бол 2023 онд 52.5 тэрбум төгрөгийн ашигтай ажиллажээ. Компанийн борлуулалтын орлого л гэхэд 2022 онд 483 тэрбум төгрөг байсан бол 2023 оны эцэс гэхэд 814.3 тэрбум болж 60% өссөн байна. Тэгвэл 2024 оны хагас жилийн тайлангаар буюу эхний таван сарын борлуулалтын орлого нь 374.5 тэрбум буюу 2022 оны бүтэн жилийн борлуулалтын хэмжээнд дөхөж очжээ.

Эндээс үйл ажиллагаа доголдоогүй болохыг харж болно.

Энэ талаар тус компанийн захирал Б.Мөнхтамир хэвлэлд мөн тайлбар өгч, эрс үгүйсгэжээ.

Мөн 2023 онд 814 тэрбум хүрсэн борлуулалтын орлогоо 2024 онд 1.1 их наяд төгрөгт хүргэх төлөвлөгөөний дагуу ажиллаж байгаагаа Б.Мөнхтамир ярьжээ.

МИАТ компаниас алдагдал өссөн талаар тодруулахад дараах дөрвөн шалтгаанаар тайлбарлав. Үүнд:

• Агаарын тээврийн либералчлалын үр дүнд үнийн өрсөлдөөн ихэсч, орлого өнгөрсөн оны мөн үеэс 13% буюу 42 тэрбум төгрөгөөр өссөн боловч төлөвлөгөөнөөс 16% буюу 72 тэрбум төгрөгөөр буурсан. Дундаж тарифаар тооцоход тухайлбал Сөүлийн чиглэлийн орлого сард тутам 15-50% буурсан.
• ОХУ-аас нийлүүлж буй шатахууны биржийн үнэ олон улсын зах зээлийн үнээс өндөр болсон нь зардлыг 20 орчим хувиар өсгөсөн.
• Бойнг-757, 767 онгоц хоёулаа нарийвчилсан үзлэгт орсон.
• Техник үйлчилгээний нийт зардал 2023 оны мөн үеэс 24 тэрбум төгрөгөөр өссөн нь нөлөөлжээ.

Эдгээр нь зардал өсгөсөн ч МИАТ компани зогсох хэмжээнд хүрсэн гэдэг үндэслэл болохгүй байна.

МИАТ компани зөвхөн агаарын зорчигч тээврийн үйлчилгээнээс гадна транзит тээвэр, агаарын хөлгийн засвар, газрын үйлчилгээ буюу онгоцыг газарт байх үйлчилгээг зэргийг үзүүлж энэ бүхнээс орлого олж байна.

Тухайлбал, 2024 онд л гэхэд БНСУ-ын Корэйн Эйр компани долоон онгоцоо МИАТ компанийн засварын төвөөр засуулж, үйлчилгээ авахаар захиалга өгчээ.

Өөрөөр хэлбэл, хагас жилийн тайланд үндэслэн компанийн үйл ажиллагааг зогсоход хүрсэн гэх дээрх мэдээлэл нь ҮНДЭСЛЭЛГҮЙ бөгөөд олон нийтийг ТӨӨРӨГДҮҮЛСЭН байна.

Аливаа мэдээллийг баталгаатай эх сурвалжаас авч, нягталж байхыг Factcheck.mn сайт сануулж байна.

Эх сурвалж:

• МИАТ ТӨХК
• Шилэн данс
• iKon.mn
• UBN.mn