Товч агуулга
- Хэргийн талаарх мэдээллийг ЦЕГ-ын дотоод хяналт шалгалтын дагуу шалгаж байна.
- Дөрвөн алба хаагчийг ажлаас чөлөөлсөн бөгөөд хэрэг гомдол, өргөдлийн шатанд байгаа гэв.
- Чөлөөлөгдсөн алба хаагчид зэвсэглэн оргон зайлсан нь худал.
Ganaa Ganaa нэртэй фэйсбүүк хэрэглэгч “Хүчингийн хэрэг үйлдсэн цагдаагийн алба хаагч нар зэвсэглэн оргон зайлжээ!” гэсэн мэдээллийг өөрийн фэйсбүүк хуудастаа 2024.04.04-ний өдрийн 15:40 цагт нийтэлжээ.
Түүний энэхүү мэдээлэлд зургаан цагийн дотор 155 хүн хариу үйлдэл үзүүлж, 91 хүн бусадтай хуваалцсан байна.
Уг мэдээллийг нягталж өгөх хүсэлт ирлээ.
Factcheck:
Өчигдөр буюу 2024 оны дөрөвдүгээр сарын 3-ны өдөр өрөг.мн сайтаар уг хэргийн талаар буюу 13 настай хүүхдийг цагдаагийн дөрвөн алба хаагч хүчирхийлсэн байж болзошгүй хэмээн хэрэг үүсгэсэн гэдгийг мэдээлсэн. Улмаар уг асуудлаар өнөөдөр Цагдаагийн ерөнхий газрын Дотоод хяналт, аюулгүй байдлын газраас мэдээлэл хийсэн. Ингэхдээ тус газрын дарга, цагдаагийн хурандаа Н.Мишигдорж энэхүү хэргийн талаарх мэдээллийг дотоод хяналт шалгалтаар олж авсан бөгөөд энэ дагуу хэргийг шалгаж байгаа гэсэн юм.
Дөрвөн алба хаагчийг ажлаас чөлөөлсөн бөгөөд хэрэг гомдол, өргөдлийн шатанд байгаа гэдгийг хэлэв.
Тэгвэл уг хэргийг үйлдсэн байж болзошгүй чөлөөлөгдсөн алба хаагчид зэвсэглэн оргон зайлсан эсэх талаар ЦЕГ-ын Хэвлэл мэдээллийн төвөөс тодруулахад үгүйсгэлээ.
Өөрөөр хэлбэл, хэрэгт холбогдсон этгээдүүд зэвсэглэж оргон зайлсан хийгээд тусгай бүлгийнхэн баривчлахаар хөдөлсөн гэсэн мэдээлэл нь ХУДАЛ байна.
Мөн ажлаас чөлөөлөгдсөн алба хаагчдын тухайд гэм буруутай эсэх нь тогтоогдоогүй бөгөөд шалгалтын ажил үргэлжилж байгаа юм.
