Монгол Улсад 55,000 багш ажил, хөдөлмөр эрхэлж байна
Жил бүрийн аравдугаар сарын 5-нд дэлхий нийтээр багш нарын баярыг тэмдэглэн өнгөрүүлдэг. Энэ өдрийг 1994 оноос эхлэн ЮНЕСКО (UNESCO) болон Олон улсын хөдөлмөрийн байгууллага (ILO) хамтран зарлаж, дэлхийн олон орон тэмдэглэж ирсэн.
Энэ өдрийг тэмдэглэж буй гол зорилго нь багш нарын хөдөлмөрийг үнэлэх, боловсролд оруулж буй хувь нэмрийг нь олон нийтэд хүргэх, багшийн эрх зүйн баталгааг хамгаалах, ажиллах нөхцөлийг нь сайжруулах юм. 2025 онд “Багшлах ажлыг хамтын мэргэжил болгон шинээр тодорхойлох” гэсэн агуулгаар дэлхий нийтээрээ тэмдэглэж байна.
Манай улсын боловсролын салбарт өнөөдрийн байдлаар 55,000 багш ажил, хөдөлмөр эрхэлж байна. Багшийн дундаж цалин ₮2 сая байгаа бол дөнгөж их сургуулиа төгссөн шинэ багшийн цалин ₮1.4 сая буюу улсын дунджаас 30% доогуур байна.
Мөн нийт багш нарын 41% нь 35-аас доош насны залуу багш нар байгаа бөгөөд 5 ба түүнээс дээш жил ажилласан багш нарын 60% нь ажлаас гарахад бэлэн байгааг салбарын сайд дурдсан юм.
Сонирхуулахад, Монгол Улсын Засгийн газраас 2026 оныг “Боловсролыг дэмжих жил” болгон зарласан.
