Коронавирусийн халдварын эсрэг вакцинтай холбоотой олон нийтийг төөрөгдүүлсэн мэдээллүүд цахим сүлжээнд тархсаар байна.
Фэйсбүүк сүлжээнд “Хүүхэд нь коронавирусийн халдвартай. Ээж нь зүгээр. Гэвч хөхний сүүний өнгө нь өөрчлөгджээ” гэсэн агуулгатай пост жилийн өмнө буюу 2021.1 сард цахим орчинд тарж, зөвхөн энэ постыг 10к хүн шэйрлэжээ. Жилийн өмнөх энэ постыг сүүлийн үед дахин шэйрлэх болсон тул AFP агентлаг нягталж, олон нийтэд мэдээлснийг хүргэж байна.
Factcheck:
Массачусетс мужийн Бостон хот дахь, Харвардын Анагаахын сургууль дахь сургалтын хамгийн том эмнэлэг болох Бригам ба Эмэгтэйчүүдийн эмнэлгийн эх, ургийн эмчилгээ хариуцсан эмч Кэтрин Грэй “Ээжийн идэж байгаа хоол хүнс болон ууж байгаа эм зэргээс шалтгаалан хөхний сүү олон янзын өнгөтэй байж болдог. Харин эсрэг биетүүд нь хөхний сүү болон өөр ямар ч төрлийн шингэний өнгийг хувиргадаггүй” хэмээн AFP агентлагт тайлбарлажээ.
Харвардын Анагаах Ухааны Сургуулийн профессор болох тэрбээр хэлэхдээ хоолны дэглэм, эм тариа, тэр ч байтугай өдрийн цаг хүртэл сүүг өөр өөр өнгөтэй болгох хүчин зүйл болдог гэдгийг тайлбарлаад дээрх зургийн тухайд КОВИД-19 биш дээр дурдсан шалтгаануудтай холбоотой байх боломжтой гэжээ.
Хөхний сүүний өнгө улаан, ягаан л биш бол өөр өнгөтэй болж өөрчлөгдөхөд айж, санаа зовох зүйлгүй гэдгийг нэмж хэлсэн байна.
Вашингтон дахь Хөхүүл эхийн сүүгээр хооллох төвийн олон улсын зөвлөлийн итгэмжлэгдсэн зөвлөх Жина Болинг ногоон өнгөтэй сүү нь КОВИД-19-ийн эсрэг биетийг тусгайлан илтгэхгүй гэдэгтэй санал нэг байгаагаа мөн илэрхийлжээ. Тэрбээр “Сүүний өнгө ногоовтор болох нь хэд хэдэн шалтгаантай байж болно. Тэглээ гээд энэ нь КОВИД-19-ийн илрэл гэсэн үг биш” гэсэн байна.
КОВИД-19-ийн эсрэг биет хөхний сүүгээр дамжин хүүхдийг халдвараас сэргийлж мэдэх ч хөхний сүүний өнгийг өөрчилдөг гэсэн нэг ч нотолгоо байхгүй гэдгийг хүүхдийн эмч Лори Фэлдмэн Уинтер мөн хэлжээ.
Тиймээс дээрх пост нь олон нийтийг төөрөгдүүлсэн, ТАШАА мэдээлэл байна.
Эх сурвалжууд:
https://factcheck.afp.com/doc.afp.com.9Z62KQ
НҮБ-ын Хүүхдийн сангийн дэмжлэгтэйгээр бэлтгэв.
