Товч агуулга
Хэдийгээр ДОХ өвчин нь вирусээр үүсгэгддэг ч коронавирусээс маш өөр болохыг эрдэмтэд тайлбарлажээ.
КОВИД-19-ийн эсрэг вакцин ХДХВ/ДОХ халдварлуулах ямар ч боломжгүй ба вакцин хийхэд ямар ч үнэмшилтэй механизм байхгүй.
КОВИД-19-ийн эсрэг вакцинуудын аль нь ч ХДХВ-ийн шинжилгээнд саад болохгүй гэдгийг мэдэгдээд бүүстер тунд ХДХВ-ийн ямар ч элемент агуулагдахгүй, боломж байхгүй гэдгийг хэлжээ.
Нягтлах мэдээ
Tsendee Purev гэх фэйсбүүк хэрэглэгч коронавирусийн эсрэг вакцины гурав дахь тунг хийлгэсэн хүмүүс ДОХ-ын шинжилгээ өгөх шаардлагатай талаар ноцтой постыг 2022.02.11-ний өдөр оруулжээ.
Уг постод
“Гурав дахь тунг тариулсан хүмүүс очиж ХДХВ/ДОХ-ын шинжилгээ өгөөрэй. Үр дүн нь таныг гайхшруулж магадгүй. Тэгээд Засгийн газраа шүүхэд өгөөрэй.” ~ Люк Монтанье, Нобелийн шагналт вирус судлаач Их Британийн Эрүүл мэндийн газраас мэдээлснээр: Гурван удаа нэмэлт тун хийлгэж буй хүмүүс ХДХВ-ийн халдвартай “сэтгэл түгшээсэн” эерэг шинжилгээний хахиу авч байна. 💀💀💀💀💀” гээд
Micheal Lloyd Chapman хэмээх фэйсбүүк хэрэглэгчийн постны зургийг шэйрэлсэн байна.
Тухайн постны доор коммент бичсэн хүмүүс бүгд итгэсэн төдийгүй “Яагаад гэвэл 3 дахь хийлгэсэн вакцин дотор нь ХДХВ/ДОХ-ын вирус байгаа🤦♂️🤦♂️🤦♂️” гэсэн сэтгэгдэл хүртэл бичжээ.
Дээрх агуулгыг нягталлаа.
Factcheck 1:
Энэ агуулгыг хоёрдугаар сарын 11-нээс цахим орчинд тарааж эхэлжээ. Тухайлбал, Bikers of America,
Dr. Robert Gibson гэх фэйсбүүк хэрэглэгчийн энэ тухай шэйрэлсэн мэдээг Фэйсбүүк “ТАШАА мэдээлэл” гэж шүүлтүүр тавьсан байна.
Factcheck 2:
Уг постод эш татсан Люк Монтанье хэмээх Нобелийн шагналт вирус судлаачийн талаарх мэдээллийг хайв. Тэрбээр Францын эрдэмтэн бөгөөд ДОХ өвчний шалтгаан болдог, хүний дархлал олдмол хомсдлын вирус буюу HIV-ийг хоёр бусад эрдэмтний хамт илрүүлсэн ажлаараа Нобелийн шагналыг багаараа 2008 онд хүртэж байсан бөгөөд 2022.02.08-ны өдөр нас баржээ.
Люк Монтанье нь амьд сэрүүн байхдаа SARS-CoV-2 буюу коронавирусийг лабораториос алдагдсан, хүний үүсгэсэн вирус хэмээн маргаж байсан ч энэ нь нотлогдоогүй байна.
Мөн энэ хүн “Гурав дахь тунг тариулсан хүмүүс очиж ХДХВ/ДОХ-ын шинжилгээ өгөөрэй. Үр дүн нь таныг гайхшруулж магадгүй” гэж байр суурь илэрхийлсэн үг өгүүлбэр байхгүй болохыг Reuters агентлаг мөн нягталжээ.
Харин 2020.04.17-нд CNEWS хэмээн телевизийн нэвтрүүлэгт тэрээр “SARS-CoV-2 вирусийн геномд HIV-ийн элементүүд орсон гэж ярьсан боловч эрдэмтдийн зөвлөл няцааж байжээ.
Factcheck.mn өмнө нь энэ талаар мөн нягтлан хүргэж байсан ба гэдгийг АШУҮИС-ийн Дархлаа судлалын тэнхимийн ахлах багш, эмнэл зүйн дархлаа судлаач эмч, Анагаах ухааны доктор Т.Хонгорзул дараах байдлаар тайлбарлаж байсан юм.
Амьсгалын цочмог халтай хамшинжийн коронавирус 2 (SARS-CoV-2) нь маш өндөр эмгэг төрүүлэх чанартай бөгөөд албан ёсоор коронавируст өвчин-19 (COVID-19) гэж нэрлээд байгаа дэлхий нийтийн цар тахлын үүсгэгч шинэ вирус юм. SARS-CoV-2 нь Coronaviridae бүлийн Betacoronavirus-ийн төрөлд харьяалагддаг, ихэвчлэн халуурах, хуурай ханиалгах, булчин сулрах, ядрах зэрэг амьсгалын замын шинж тэмдгээр илэрдэг.
Коронавирусууд нь эсийн цитоплазмд репликацид ордог, бүтцийн дөрвөн уурагтай (S уураг, бүрхүүлийн E уураг, мембраны М уураг, нуклеокапсидийн N уураг), эерэг утгат, дан утаслагт РНХ агуулсан вирус юм.
Харин дархлаа олдмол хомсдол (ДОХ) өвчин нь хүний дархлаа хомсдолын вирус (ХДХВ)-ээр үүсгэгддэг, энэ вирус нь хүний дархлааны эсийн дотор сонгомлоор орж халдварлуулж, дархлааны эсийн тоог цөөрүүлдэг учир ДОХ гэж нэрлэгджээ. ХДХВ нь бэлгийн замаар, цус, цусан бүтээгдэхүүнээр дамжин халдварладаг байна.
ХДХВ нь Retroviridae бүлийн Lentivirus-ийн төрөлд харьяалагддаг, дархлаа дутмагшлын шинж тэмдгээр илэрдэг, бүтцийн 10 гаруй уурагтай дан утаслагт РНХ агуулсан вирус.
Аль аль нь РНХ агуулсан вирус боловч харьяалагдах төрөл зүйл, удмын мэдээлэл, гадаргуугийн бүтцийн уураг, хүнд халдварлах зам, хүний биеийн дотор халдварлах эс, илрэх шинж тэмдэг, анх тодорхойлогдон бүртгэгдсэн хугацаа зэрэг олон шинж байдлаар ялгаатай, өөр өөр вирус юм.
Factcheck 3:
Хэдийгээр ДОХ өвчин нь вирусээр үүсгэгддэг ч коронавирусээс маш өөр болохыг эрдэмтэд тайлбарлажээ. Уг өвчнийг үүсгэгч ХДХВ буюу ретровирус нь удмын мэдээллээ олшруулахдаа хүний цагаан эсийн эрхтэнцрүүдийг ашигладаг ба ийнхүү хуулбарлах явцад олон удаа мутацид өртдөг байна. Тиймээс уг вирусийн эсрэг бие үүсгэхэд бэрхшээлтэй байдаг.
КОВИД-19-ийн эсрэг вакцин ХДХВ/ДОХ халдварлуулах ямар ч боломжгүй ба вакцин хийхэд ямар ч үнэмшилтэй механизм байхгүй гэдгийг КОВИД-19-ийн эсрэг вакцины асуудал, ташаа мэдээлэлтэй тэмцэхээр сайн дураараа нэгдэж, тахал өвчнийг зогсоохоор ажиллаж буй дэлхийн өнцөг булан бүрийн эмч, мэргэжилтэн, эрдэмтдийн санаачилга болох Halo багийн зохицуулагч, Их Британийн Кардиф хотын эмч, доктор Доктор Бнар Талабани тайлбарлажээ. “Дэлхий дахинд 10 тэрбум тунг ашигласан өнгөрсөн хугацаанд үүнтэй холбоотой нэг ч нотолгоо байхгүй бөгөөд ташаа мэдээлэл хүмүүсийг яаж төөрөгдүүлдгийн тод жишээ бол энэ” гээд “КОВИД-19-ийн эсрэг болон бусад вакцинууд ДОХ/ХДХВ-ийн халдвар үүсгэхгүй бөгөөд биднийг энэ болон бусад вирусийн халдвар авахад илүү өртөмтгий болгодоггүй” гэдэг хариуг Reuters-т тодорхой хэлжээ.
Жон Хопкинсын Эрүүл мэндийн аюулгүй байдлын төвийн ахлах эрдэмтэн, доктор Амеш Адалжа хэрэглэхийг зөвшөөрсөн КОВИД-19-ийн эсрэг вакцинуудын аль нь ч ХДХВ-ийн шинжилгээнд саад болохгүй гэдгийг мэдэгдээд бүүстер тунд ХДХВ-ийн ямар ч элемент агуулагдахгүй, боломж байхгүй гэдгийг хэлжээ.
Factcheck 4:
Австрали улсын биотехнологийн CSL компани болон Күйнсландын их сургууль хамтран ад хөгжүүлж байсан коронавирусийн эсрэг вакцины туршилтыг ДОХ-ын эерэг хариу гаргаад байсан учраас зогсоосон талаар ДЭМБ тайлбарлаад тухайн хариу нь хуурамч эерэг хариу болохыг мөн баталгаажуулсныг дурджээ.
Австралийн CSL компани Reuters агентлагт албан ёсны хариу тайлбар ирүүлэхдээ тухайн вакцин ХДХВ-ийн вирус агуулаагүй бөгөөд халдвар үүсгэх магадлал ч байхгүй гэдгийг хэлсэн байна. Тухайн үед вакцины эмнэл зүйн нэгдүгээр шатны туршилтад орж, ХДХВ-ийн хариу эерэг гарсан бүх хүнийг хариу хуурамч эерэг байсныг тогтоож, нотолсон болохыг албан ёсоор хэлжээ.
Тиймээс дээрх мэдээлэл нь олон нийтийг төөрөгдүүлсэн ХУДАЛ агуулга байна.
Цар тахлын энэ үед коронавирус болон вакцинтай холбоотой аливаа мэдээллийг заавал нягталж, баталгаатай эх сурвалжаас авч байхыг FactCheck.mn анхааруулсаар байгаа билээ.
Эх сурвалжууд:
https://en.wikipedia.org/wiki/Luc_Montagnier
https://www.facebook.com/watch/?v=222654309067566
https://www.csl.com/news/2020/20201211-update-on-the-university-of-queensland-covid-19-vaccine
Chen N. Epidemiological and clinical characteristics of 99 cases of 2019 novel coronavirus pneumonia in Wuhan, China: a descriptive study. Lancet. 2020;395.
Chen Y, Liu Q, Guo D. Emerging coronaviruses: genome structure, replication, and pathogenesis. J Med Virol. 2020;92.
НҮБ-ын Хүүхдийн Сангийн дэмжлэгтэйгээр бэлтгэв.
