Сүүлийн өдрүүдэд мэдээ, мэдээллийн gogo.mn сайт мэт харагдах зорилготой "Gogo News" гэсэн нэртэй фэйсбүүк хуудас идэвхтэйгээр мэдээлэл түгээх болжээ.
Уг хуудсыг нягталж шалгахад ихэнхдээ gogo.mn сайтын албан ёсны хуудсаар түгээгдэж буй мэдээ, мэдээллийг давхар түгээдэг боловч дундуур нь илт сэтгүүл зүйн шаардлага хангаагүй, ёс бус үг хэллэг ашигласан, хандалт авах зорилготой мэдээллүүдийг түгээж иргэдийг хууран мэхэлж байна.
Ихэнхдээ мэдээ, мэдээлэл түгээдэг хуудас нь "media", "news" зэрэг хэвлэл мэдээлэлтэй холбоотой ангилалд оруулсан байдаг. Гэтэл уг фэйсбүүк хуудсын "about" хэсгийг хэрвал өөрийгөө "politician" буюу улс төрч гэсэн ангилалд оруулжээ. Түүнчлэн цахим хуудасруугаа шилжих ёстой холбоос дээрээ http://news.mn/ хэмээн байршуулсан боловч ч news.mn сайттай албан ёсны холбоо, хамаарал байгүйг тус сайтын холбогдох эх сурвалж хэллээ.
Бас нэгэн сонирхолтой зүйл нь дээрх хуурамч хуудас анх 2020 оны нэгдүгээр сарын 8-ны өдөр "Амар Мижид" нэртэй байгуулагдсан хэдий ч гуравдугаар сарын 21-ний өдөр хүртэл нэрээ хэд хэд сольжээ. Нэрээ хэзээ, хэрхэн сольсон талаарх дэлгэрэнгүй мэдээллийг доорх зурагнаас харж болно.
Энэ мэт хуудсуудыг хандалт авч, лайкын тоогоо өсгөх, улмаар түүнийгээ хэн нэгэнд зарж болруулан мөнгө олох зорилготойгоор ажиллуулах тохиолдол их байдаг. Тиймээс сонгууль дөхөж буй энэ цаг үед иргэд мэдээллийг авахдаа харсан бүхэндээ итгэлгүй, урьд өмнөхөөсөө илүү шүүлтүүртэйгээр хүлээн авах шаардлагатай болж буйг энэ мэт жишээ харуулж байна.
Мэдээллийг нягталсан: Fact Check Mongolia
