МИАТ 6 онгоцтой 120 даргатай – ТАШАА

Товч агуулга:

  • МИАТ 2 алба, 4 газар, 24 хэлтэс, 6 тасагтай буюу удирдлагын тоо 120 хүрэхгүй байна.
  • Нийт ажилтны дийлэнх нь үйлдвэрлэлийн үйл ажиллагаа явуулдаг.
  • МИАТ компани нислэг үйлдэхээс гадна Агаарын хөлгийн засвар үйлчилгээний газар, Газрын үйлчилгээ гэсэн гурван чиглэлээр үйл ажиллагаа явуулдаг.
  • Тус компаний бүх үйл ажиллагаа ИНЕГ-ийн багц дүрэм, Олон Улсын Агаарын Тээврийн Холбоо, АНУ, ЕХ, бусад орны эрх бүхий байгууллагаас холбогдох дүрэм, журмын дагуу явдаг.

Otgonbayar Jadambaa гэх фэйсбүүк хэрэглэгч 2024.02.25-ны өдөр МИАТ-ын удирдлага, зохион байгуулалтын схем бүхий зурагтай пост оруулжээ.

Уг постод “Та нар яагаад МИАТ ер нь Агаарын тээврийн салбар Нислэг маш үнэтэй байгааг мэдэх үү?

6 онгоцтой 120 даргатай юм билээ тэгээд өнөөдүүл нь шахаа хийсээр байгаад Улаанбаатараас-Бээжин 1.500.000 Бээжингээс хаашаа ч ниссэн 100.000 – 300.000 юм билээ.

Аялал жуулчлалын салбараа хөгжүүлэх гэж байгаа бол хэлбэртэх биш хамгийн эхэнд дарга ангиасаа сална даа! За бараг сонгуулиар салгана даа хулгайч нараас нь” гэжээ.

Энэхүү постыг нягталж өгөх хүсэлт ирсний дагуу нягталлаа.

МИАТ компани нь Монгол Улсын ИНЕГ-аас баталсан ИНД-119, 108, 141, 145, Олон Улсын Агаарын Тээврийн Холбоо(IATA)-ны IOSA, ISAGO, Америкийн нэгдсэн улсын FAA FAR-129, FAR-145, Европын Холбооны EASA Part-145, TCO, ACC3, бусад орны эрх бүхий байгууллагаас холбогдох дүрэм, журмын дагуу гэрчилгээжсэн буюу үйл ажиллагаагаа явуулдаг байна. Тэдгээр гэрчилгээний тодорхойлолт, хязгаарлалтуудын хүрээнд байнгын хяналт дор, бүхий л шаардлагыг хангаж ажилладаг гэсэн үг. Мөн компанийн үндсэн заавар гэж байх бөгөөд уг зааврын дагуу компанийн салбар албад, нэгжийн дэлгэрэнгүй бүтэц, үйл ажиллагааны чиглэл, уялдаа холбоо, ажилтнуудад тавигдах ажлын байрны ерөнхий шаардлага болон бусад холбогдох үйл ажиллагааг зохицуулж явдаг байна.

МИАТ компанийн бүтцийг харвал 2 алба, 4 газар, 24 хэлтэс, 6 тасагтайгаар ажилладаг байна. Эдгээр алба, газар, хэлтэст нийт 1,078 ажилтан ажилладаг бөгөөд дийлэнх хувь нь үйлдвэрлэлийн үйл ажиллагаа явуулдаг. “Цөөхөн онгоцтой хэрнээ 1000 гаруй ажилтантай гэдэг нь зөвхөн нислэг үйлдвэрлэлд оролцоход ийм бүтэцтэй ажиллаж байна гэж ойлгоод байгаа. МИАТ компани нислэг үйлдэхээс гадна Агаарын хөлгийн засвар үйлчилгээний газар, Газрын үйлчилгээний байгууллагатай. Үндсэндээ агаарын тээврийг дагасан бизнесийн гурван чиглэлээр үйл ажиллагаа явуулдаг” гэдгийг МИАТ компани тайлбарлав.

Бид энэ талаар мэргэжлийн хөндлөнгийн хүмүүсийг тайлбарыг мөн авлаа.

Тэдний нэг болох Бат инженер дээрх постын зураг дээрх бүтцийг 1998 оноос хэрэгжиж ирсэн схем бөгөөд мэргэжлийн бус хүн тэр бүтцэд ажиллах боломжгүй гэдгийг хэллээ. “МИАТ 1998 онд Францад бүртгэлтэй А310 гээг онгоц авсан. Тэр үед Францын DGAC буюу манайхаар ИНЕГ-тай адил бүтэц нь манайхыг ажилтнуудаа олон улсынхтай ойролцоо болго гэсэн асуудал тавьсан. Тэр нь үйл ажиллагаагааг аюулгүй, эмх цэгцтэй болгоход хэрэгтэй болохоос биш намын хүмүүс тэр бүтцэд орж ирээд ажиллаад байдаг юм байхгүй” гэдгийг тэрбээр тайлбарласан юм. Өөрөөр хэлбэл, зайлшгүй байх ёстой ажилтнуудын бүтэж ажээ.

Мөн уг бүтэц нь МИАТ нэг онгоцтой байсан ч, 100 онгоцтой байсан ч яг л байх ёстой бүтэц гэдгийг тэрбээр баталгаажуулж хэлсэн.

Агаарын тээвэр бол зогсолтгүй үргэлжилж байдаг үйлчилгээний салбар. Монгол Улсын Хөдөлмөрийн тухай хуулийн

  • 84.1-д Долоо хоногийн ердийн ажлын цаг 40-өөс илүүгүй байна.
  • 87.2.Нэг ээлжийн ердийн ажлын цагийн үргэлжлэл найман цагаас илүүгүй байна гэж тус тус заажээ.

Долоо хоногт 168 цагтай гэж үзвэл тасралтгүй үйл ажиллагааг хангахын тулд зөвхөн нэг ажлын байран дээр доод тал нь дөрвөн ээлжийн хүн ажиллах шаардлагатай болж байна.

“Өдрийн аль ч цагт МИАТ-ийн нэг онгоц агаарт байж байдаг. Жишээлбэл, алсын зайн нислэгүүд дандаа шөнө нисэж, үүрээр буудаг. Ээлжийн ажилтай хүмүүс нь өдөр шөнөгүй л тэндээ байж байдаг учраас өдрийн найман цагтай, гэр бүлийн жижиг компани шиг төсөөлж болохгүй” гэдгийг Бат инженер нэмж тайлбарласан юм.

Монгол Улсын иргэний агаарын тээврийн салбар доорх хууль эрх зүй, олон улсын гэрээний хүрээнд үйл ажиллагаа явуулдаг байна.

Монгол Улсад Иргэний нисэхийн дүрмээрээ нэг нисгэгч сард 100 цагаас илүү нисэж болохгүй гэсэн шаардлагатай бөгөөд жилд хоёр удаа давтан сургалтад заавал суух шаардлагатай байдаг байна. Тэгэхээр нэг онгоцыг зөвхөн 1-2 нисгэгч жолооддоггүй ба боловсон хүчний илүүдэлгүй, харин дутагдалтай байдаг байна.

Онгоц сонирхогч, математикч мэргэжилтэй, агаарын тээврийн менежментээр мэргэшсэн иргэн Б.Маргад мөн энэ талаар тайлбар өгсөн. Тэрбээр “МИАТ яагаад том байгаа гэхээр яг үйлчилгээ талдаа газрын үйлчилгээнд бараг 300 хүн байгаа.

Яагаад Хүннү эйр, Аэромонголиагаас их хүн байна гэхээр тэд зөвхөн МИАТ-ынхаа ажлыг хийдэггүй. Туркиш Эйрлайнсын онгоц нислээ гэхэд тэнд бүртгэлийг нь МИАТ хийдэг. Тэгэхээр ээлжээр ажиллах ёстой, ээлж нь хэдэн хүнтэй байх ёстойг заахаар олон болчихдог” гэдгийг тайлбарласан юм.

Мөн үнэ тарифын талаар “Дэлхийн дунджаар онгоцны нэг суудлыг нэг км зөөхөд дунджаар 7-10 центийн зардал гардаг. Энэ нь дунджаар 500 доллар байдаг.

Нислэг бүр дүүрэн явахгүй. МИАТ 80%-тай байгаа нь маш өндөр тоо. Хамаг хүчин чадлаараа нисэж байна гэсэн үг. Цагийн хуваарь зарлаад, МИАТ Сөүл рүү өдөр бүр нисэхээр боллоо гэхэд 50 хүнтэй байлаа гээд нисэхгүй гэдэггүй. Тэгэхээр зарим нислэг нь 50, зарим нь 100 хүнтэй явна. Нийт нислэгийнх нь дунджаар нь суудал ашиглалтыг гаргадаг. 70% ч өндөр тоо. Эрээнээс хямд байна гээд байгаа. Эрээний онгоц 50 хүнтэй яваад байгаа байхгүй юу. Тэртэй тэргүй хоосон явах гээд, 500 долларыг Эрээнээс олж чадахгүй, цөөн хүнтэй учраас 100 доллароор Монголоос хүн аваад 500-г биш 400-г алдая гэсэн л бодлого. Түүнээс биш өртгөөрөө зарж байгаа гэсэн үг биш юм.

Агаарын тээвэр дэлхий дээр хамгийн их дүрэм журмаар зохицуулагдсан салбар. Яагаад гэвэл нэг дор маш олон хүний амь нас эрсдэлд ордог учраас. Түүнээс биш авто замын ослоор нас барж байгаа хүний тоо агаарын тээврээр нас барж байгаа хүний тоог харьцуулбал хамгийн аюулгүй тээвэр шүү дээ. Гэхдээ ЗГ, ОУ-ын байгуулагуудаас тавьж байгаа шаардлага нь маш өндөр” гэсэн юм.

Иймд “МИАТ 6 онгоцтой 120 даргатай” гэдэг мэдээлэл олон нийтийг төөрөгдүүлсэн ТАШАА мэдээлэл байна.

Эх сурвалжууд:
  • МИАТ
  • ИНЕГ
  • Бат инженер
  • Онгоц сонирхогч, математикч мэргэжилтэй, агаарын тээврийн менежментээр мэргэшсэн иргэн Б.Маргад
  • Legalinfo.mn

 

 

Төстэй мэдээлэл

Монгол төдийгүй олон улсад КОВИД-19-ийн вакцин халдварыг тарааж,

Нийслэлийн ИТХ-ын тэргүүлэгч Ж.Батбаясгалан өнөөдөр тохиож буй Улаанбаатар хот үүсэж хөгжсөний түүхт 381 жилийн ойн мэндчилгээ дэвшүүлэхдээ “Түүнчлэн онцлон нэг зүйлийг тэмдэглэн хэлэхэд, Нийслэлчүүд бид өмнөө тулгамдсан хамгийн том асуудал болох утаанаасаа салсан бахдам амжилттайгаар 381 жилийн ойтойгоо золгож байна” хэмээн дурдсан юм. Мэндчилгээнд дурдсан “УТААНААС САЛСАН БАХДАМ АМЖИЛТ” гэсэн үгс үнэхээр бодит байдалтай нийцэж […]

Коронавирусийн дельта хувилбар дэлхийн улс орнуудад илэрч, халдвар дахин нэмэгдэх болов. Үүнтэй зэрэгцээд олон нийтийн сүлжээгээр вакцинтай холбоотой олон нийтийг төөрөгдүүлсэн элдэв пост зөвхөн Монголд төдийгүй гадны улс орнуудад ч тархсаар байна. Тиймээс нийгэмд буруу ойлголт өгсөн мэдээллүүдийг олон улсын баримтыг нягтлагчид шалган нягталж түгээсээр байгаа юм. Наймдугаар сарын 5-нд USA Today-ийн нягталсан мэдээллийг хүргэе. […]

Мягмар гараг буюу 2020 оны арваннэгдүгээр сарын 17-ын өдөр УОК хуралдсаны дараа нийслэлийн автомашины хөдөлгөөнийг илүү хумихаар шийдвэрлэсэн талаар мэдээлэхдээ хоорондоо зөрүүтэй тоонууд хэлсэн юм Мэдээллийн үеэр нийслэлийн Засаг дарга Д.Сумъяабазар: Бүх нийтийн бэлэн байдлын зэрэгт шилжүүлсэнтэй холбоотойгоор тээврийн хөдөлгөөнийг нарийн цагийн хуваарьт шижлүүлсэн. Бид 17,000 тээврийн хэрэгсэл хөдөлгөөнд оролцоно гэж тооцоолсон. Гэтэл өнөөдрийн байдлаар бидний […]

Өөр мэдээ олдсонгүй.

Хандив

FactCheck.mn сайт нь бие даасан, хараат бус редакц бөгөөд бид сурталчилгаа олгогчдод биш, иргэдэд үйлчилдэг. Бид аливаа компани, улстөрч, засгийн газрын нөлөөнд автахгүй, зөвхөн олон нийтийн эрх ашгийн төлөө ажиллана.

Гэвч нягтлан шалгах ажил нь цаг, мөнгө, шаргуу хөдөлмөр шаарддаг билээ.

Иймд, манай редакц хараат бус байдлаа хадгалж, илүү хүчтэй болоход таны дэмжлэг чухал юм!

Та бидний үйл ажиллагааг дэмжиж байвал ХАС БАНК 5001984178 ЭССТ НҮТББ дансаар хандив өгөх боломжтой. Гүйлгээний утган дээрээ ХАНДИВ гэдгээ тодорхой бичээрэй. Хүсвэл нэр, холбогдох утасны дугаар зэрэг хувийн мэдээллээ оруулж болно.

Биднийг дэмжсэн танд маш их баярлалаа.

Мэдээлэл хайх