2021 оны аравдугаар сарын 9-ний өдөр Miniih – Минийх нэртэй фэйсбүүк хуудаст “Ажилгүй залууст 1 сая төгрөгийн тэтгэмж өгч эхэллээ” гэсэн гарчиг бүхий мэдээллийг оруулжээ. Уг мэдээллийн доор хүмүүс халамжийн бодлогоо зогсоох талаар, ажил хийж буй хүмүүсийн татварын мөнгөөр ажилгүй хүмүүсийг тэтгэж байгаа тул зогсоохыг шаардсан агуулга бүхий сэтгэгдлүүдийг үлдээжээ.
Дээрх мэдээллийг нягталлаа.
Уг мэдээллийн линк дээр дарвал https://xyznews24.com/ гэх сайт уруу орж байна. Мэдээллийн гарчгаас бусад текстэд “Тэтгэмж” гэх үг нэг ч байхгүй бөгөөд агуулга нь ч мөн өөр байна.
Тодруулбал, Хөдөлмөр нийгмийн хамгааллын яам, Соёлын яам, Батлан хамгаалахын яам, Боловсрол шинжлэх ухааны яам хамтран ажилгүй залуусыг нэг сая төгрөгийн тэтгэлэгтэй сургах “Оролцоо” төслийн мэдээг уг сайт нийтэлсэн байна.
Уг төсөл нь сүүлийн гурван сар ажил хийгээгүй залуусыг 14 хоногийн сургалтад хамруулж, үлдсэн 14 хоногт нь дадлага хийлгэн ажилд зуучлах юм. Төслийн анхны сургалт есдүгээр сарын 2-нд эхэлж, одоогийн байдлаар 1937 залуу хамрагдан, дадлагадаа гарсан талаар ХНХЯ-наас мэдээлээд буй.
Өөрөөр хэлбэл төслийн хүрээнд сургалтад хамрагдсан ажилгүй залууст олгож буй сая төгрөгийн тэтгэлгийг ажилгүй бүх хүнд сая төгрөг олгохоор болсон мэт гарчиг өгч иргэдийг төөрөгдүүлсэн байна.
