Bachi Nyangar гэх фэйсбүүк хэрэглэгч наймдугаар сарын 23-нд “Сингапурын Эрүүл Мэндийн КО бол зохиомол гэдэгт бүрэн дүгнэлт хийжээ” гэх агуулгыг нийтэлсэн байна. Түүний постыг 182 хүн цааш түгээж, 174 хүн лайк даржээ.
Уг постод (постыг засваргүйгээр доор оруулав):
“Сингапурын Эрүүл Мэндийн Яам ДЭМБ-ийн үгэнд оролгүй КОВИД туссаад нас барсан хүнд задлан шинжилгээ хийж үзжээ. Тэд вирус олоогүй, харин хэсэг хорт бактер цусны бөөгнөрөл үүсгэж улмаар амьсгалахад хэцүү болгож амийг нь тасалдах байхыг олж харжээ. Мөн COVID туссан өвчтөнд Aspirin өгч үзээд судлаад нэмэр болохыг нь тогтоожээ. Одоо Сингапурын Эрүүл Мэндийн КО бол зохиомол гэдэгт бүрэн дүгнэлт хийжээ.
Энэ судалгаа хийснээр эмнэлэгт ирсэн 14,000 хүнийг нэг өдрийн дотор эмчилээд гэрт нь буцаажээ.
Эх сурвалж: Singapore Ministry of Health” гэсэн байна.
Энэхүү агуулгыг нягталлаа.
FACTCHECK:
Энэ тухай анх зургадугаар сарын 12-нд Zoki Stojanovski гэх фэйсбүүк хэрэглэгч олон нийтийн сүлжээнд түгээснийг баримтыг нягтлагчид шалгаж, ХУДАЛ болохыг баталгаажуулжээ.
Дээрх бүх мэдээлэл ХУДАЛ болохыг Сингапурын ЭМЯ албан ёсны хуудсаараа дамжуулан мэдэгдсэн байна.
Баримт 1. Сингапур улс КОВИД-19-ийн халдвараар өвчилсөн хүнд огт задлан шинжилгээ хийгээгүй бөгөөд коронавирусийн эмгэг жамын талаар ийм мэдэгдэл гаргаагүй.
Баримт 2. Шинжлэх ухааны нотолгоонд суурилсан олон судалгааны үр дүнгээр Коронавируст өвчин-19 (COVID-19) нь Амьсгалын цочмог халтай хамшинжийн коронавирус 2 (SARS-CoV-2) вирусээр үүсгэгддэг болох нь баталгаажсан. Энэ өвчин нь бактериар үүсээгүй болохыг ДЭМБ ч албан ёсоор мэдэгдсэн.
Зарим тохиолдолд SARS-CoV-2 вирусээр халдварласан хүн нянгийн халдвар давхар авч , хүндэрч болзошгүй бөгөөд энэ нь томуу гэх мэт бусад вируст өвчний үед ч ажиглагддаг байна. Ийм тохиолдолд нянгийн халдварын эсрэг антибиотикийг эмчилгээнд хэрэглэдэг байна.
Баримт 3. Задлан шинжилгээ нь ДЭМБ-ын дүрмийг зөрчиж байна гэсэн агуулга нь мөн худал байна. ДЭМБ задлан шинжилгээ хийхийг хориглоогүй бөгөөд COVID-19 өвчний шалтгаант анхны задлан шинжилгээг Сингапур улсад хийсэн байх магадлалтай байна. Өнгөрсөн жил зөвхөн Македонид 10 гаруй задлан шинжилгээ хийжээ.
Баримт 4. COVID-19 өвчний эмчилгээнд шинж тэмдэг ба хүндрэлээс хамаарч ялгаатай эмийг хэрэглэх ба дан ганц аспиринаар энэхүү өвчнийг эмчлэх боломжгүй юм. Аспирин нь дааврын бус үрэвслийн эсрэг эмийн бүлэгт хамаардаг, өвдөлт ба үрэвслийн эсрэг ерөнхий үйлдэлтэй ба вирусийн эсрэг өвөрмөц нөлөөгүй гэдгийг АШУҮИС-ийн Дархлаа судлалын тэнхмийн эрхлэгч, АУ-ы доктор Т.Хонгорзул хэлж байна. Сингапур улс COVID-19 өвчний эмчилгээний удирдамжиндаа өөрчлөлт оруулаагүй болохыг тус улсын ЭМЯ нь мэдээлсэн байна.
Мөн вирусийн халдварыг ганцхан шөнийн дотор эдгээх шинжлэх ухааны үндэслэл огт байхгүй гэдгийг АУ-ны доктор Б.Цогтбаатар өмнө нь мэдээлж байсан.
Вирусийн халдварт өртсөн хүн хэд хоногт эдгэх нь тухайн өвчтний дархлааны байдал, эрүүл мэндийн байдал, хооллолт гэгчлэн олон хүчин зүйлээс хамаардаг болохыг тэрбээр тайлбарласан.
Тиймээс дээрх пост дахь агуулга бүхэлдээ ХУДАЛ, иргэдийг төөрөгдүүлсэн байна.
Цар тахлын энэ үед аливаа мэдээллийг нягталж, мэргэжлийн эх сурвалжаас авахыг FactCheck.mn сануулсаар байна билээ.
Эх сурвалжууд:
https://www.gov.sg/article/false-message-circulating-on-changes-to-treatment-protocols
https://apps.who.int/iris/bitstream/handle/10665/331538/WHO-COVID-19-lPC_DBMgmt-2020.1-eng.pdf
https://www.facebook.com/sghealthministry/posts/10159182946525631
https://www.facebook.com/zoki.stojanovski.509/posts/504157637397095
https://medlineplus.gov/druginfo/meds/a682878.html
НҮБ-ын Хүүхдийн Сангийн дэмжлэгтэйгээр, АШУҮИС-ийн Дархлаа судлалын тэнхмийн эрхлэгч, АУ-ы доктор Т.Хонгорзултай хамтран бэлтгэв.
