“Шинэ вирус Лямбда нь Дельтагаас 2 дахин аюултай Сэрэмжлүүлж байсан “супер мутант” мөн, 3 аюултай мутант нийлэгжжээ. ЭМЯ ард түмэн тэмцэлд бэлэн байх ёстой Зайнаас ч халдварлана Яаралтай Спутник, ганц аврал!” гэсэн мэдээллийг Tserenkhuu Ishtseden хэмээн фэйсбүүк хэрэглэгч постолжээ.
Түүний постыг 157 хүн шэйрлэж, 1К хүн лайк дарсан байна.
Уг мэдээллийг нягталлаа.
Factcheck:
COVID-19 цар тахлын үүсгэгч SARS-CoV-2 коронавирусийн хувилбарыг ДЭМБ сонирхол татсан (этта, иотта, каппа, лямбда) ба анхаарал татсан (альфа, бетта, гамма, дельта) хэмээн Грек цагаан толгойн үсгээр тодорхойлон ангилж байна. Коронавирусийн анхаарал татсан дельта хувилбар нь халдварлах чадвар өндөр, хоруу чанар нь нэмэгдсэн, нийгмийн эрүүл мэндийн хариу арга хэмжээний үр дүнд сөргөөр нөлөөлж байгаа бол сонирхол татсан лямбда хувилбарыг вирусийн шинж чанарт нөлөөлөх урьдчилан мэдэгдэж буй генетикийн өөрчлөлттэй, цаг хугацаа өнгөрөх тусам олон оронд тархалт нэмэгдэж, томоохон хэмжээний олон тооны COVID-19 кластер үүсгэсэн болохыг тогтоожээ. Одоогийн байдлаар дэлхий нийтээр анхаарал татсан (дельта) хувилбарт сонирхол татсан (лямбда) хувилбараас илүү анхаарал хандуулж, тандалт судалгаа үргэлжилж байна. ОХУ-ын улсын Sputnik V вакцины үр дүнг коронавирусийн хувилбарт харьцуулан тодорхойлсон судалгаа одоогоор нийтлэгдээгүй байна. Харин Pfizer (Comirnaty) болон АstraZeneca вакцины үр дүнг альфа болон дельта хувилбарын үед үнэлсэн судалгааны үр дүн нийтлэгдсэн байна.
Lambda (λ) хувилбарыг ДЭМБ С37 хэмээн томъёолж байна. Коронавирусийн уг хувилбар анх 2020 оны наймдугаар сард буюу жилийн өмнө Перу улсад бүртгэгджээ. Харин 2021.06,17-нд уг вирус 29 улс үндэстэнд бүртгэгдсэн талаар ДЭМБ мэдээлсэн бөгөөд “Сонирхол татаж буй хувилбар” хэмээн тус байгууллага тодорхойлж байна.
Ямар ч байсан бусад хувилбартай харьцуулахад тархалт хурдан ч илүү аюултай гэсэн нотолгоо одоогоор байхгүйг ДЭМБ-ын вирусологич Жайро Мендез-Рико хэлсэн байна.
Тухайлбал, Их Британид 6 тохиолдол бүртгэгдсэн бөгөөд зургадугаар сарын 22-ноос хойш уг хувилбараар нас барсан нэг ч тохиолдол гараагүй байгаа аж.
Харин Перу улсад уг хувилбарын тархалт илүү хурдацтай байгаа аж. Латин Америкийн орнуудад уг вирус хамгийн их тархаад байгаа бөгөөд үүний шалтгаан нь эрүүл мэндийн тусламж үйлчилгээний тогтолцоо, урьдчилан сэргийлэх арга хэмжээг дагаж мөрдөж чадахгүй байгаа, хүнд хөдөлмөр эрхэлдэг, вакцины хомсдол зэрэг илүү нөлөөлж байгааг Перу хот дахь UPCH их сургуулийн вирус судлаач Пабло Цүкаяама хэлжээ.
Тиймээс дээрх мэдээлэл нь иргэдийг ТӨӨРӨГДҮҮЛСЭН ташаа мэдээлэл байна.
Эх сурвалжууд:
https://www.who.int/en/activities/tracking-SARS-CoV-2-variants/
https://www.dw.com/en/coronavirus-lambda-variant-spreads-across-latin-america/a-58035249
https://www.dw.com/en/coronavirus-lambda-variant-spreads-across-latin-america/a-58035249
НҮБ-ын Хүүхдийн Сангийн дэмжлэгтэйгээр, АШУҮИС-ийн Дархлаа судлалын тэнхмийн эрхлэгч, АУ-ы доктор Т.Хонгорзултай хамтран нягтлав.
