Handaa Byamba хэмээх фэйсбүүк хэрэглэгч долдугаар сарын 18-нд коронавирусийн талаар нэгэн пост оруулсныг 106 хүн шэйрлэжээ.
Тэрхүү постод “Уханий хатгалгаа өвчин ( уушиг муу 450 хүний амь авсан!) болон коронавирус хэмээх нэг ч үхэлгүй ханиад хоёроо ялгаж салгаж ойлгооч!!!
Одоогоос 40 орчим жилийн өмнө бэлгийн замаар халдварладаг дох өвчин гарангуут АНУ-ын ХӨСҮТ-ээс эмчлэх вакциныг 2 жилийн дотор гаргана хэмээн зарлажээ. Гэтэл өнөөдрийг хүртэл гаргаж чадаагүй маш их хөрөнгө мөнгө зарцуулснаа хэрхэн нөхөх, мөн 8 тэрбум хүн ихдэж байгаа тул 4 тэрбум болгох арга нь хуурамч КОВИД байсан юм. Өөрөөр хэлбэл 1 сумаар 2 туулай буудсан!!! Үхлийн тун- хүнцэлтэй вакцинаа тарихын тулд үхлээр нь айлгаж эхэлсэн. (Уханий жүжиг!)Дараа нь маск, шинжилгээ, вакцинаараа коронавирусыг тараасан. Ингэж л энэ түүх эхэлсэн. Хулхидаж боловуу!? Зогсоо!!! Жамаараа амьдармаар байна” гэжээ.
Коронавирусийн цар тахлын үед мэдээллийг баттай эх сурвалжаас авч, үргэлж нягталж байхыг FactCheck.mn сануулсаар байгаа билээ. Учир нь төөрөгдүүлсэн ташаа мэдээлэлд итгэх нь эрүүл мэндээрээ хохирох эрсдэлтэй бөгөөд ташаа мэдээлэл түгээсэн хүн үүнд хариуцлага хүлээхгүй гэдгийг мэргэжилтнүүд анхааруулсаар байна.
Дээрх пост дахь агуулгыг нягталлаа.
“Уханий хатгалгаа өвчин ( уушиг муу 450 хүний амь авсан!) болон коронавирус хэмээх нэг ч үхэлгүй ханиад хоёроо ялгаж салгаж ойлгооч!!!”
FactCheck:
БНХАУ-ын Хубэй мужийн Ухань хотод шалтгаан нь тодорхойгүй уушгины хатгалгаа бүртгэгдэж, зарим тохиолдолд хүндэрч байгаа талаар 2020 оны нэгдүгээр сарын 3-нд ДЭМБ анх мэдээлсэн. Тухайн үед буюу нэгдүгээр сарын 5-ны байдлаар өвчлөлд өртөгсдийн тоо 59 болж, 163 хавьтлыг эмнэлгийн хяналтад авсан гэж мэдээлж байв.
Уг хатгалгаа нь коронавирусийн нэг төрөл болохыг тогтоож, COVID-19 хэмээн албан ёсоор нэрлэх болсныг Дэлхийн Эрүүл Мэндийн Байгууллага 2020.02.11-нд зарласан бол 2021.03.12-нд тус байгууллага цар тахал болохыг албан ёсоор хүлээн зөвшөөрсөн юм. Өөрөөр хэлбэл, энэ хоёр нь тусдаа өвчин биш нэг ойлголт буюу нэг өвчин гэжээ.
Коронавирусийн халдвар бол энгийн ханиад томуу биш юм. Өнөөдрийн байдлаар энэхүү вирусийн улмаас дэлхийн 220 орны 4,151,655 хүн нас бараад байгаа ба Монгол Улсад нас баралтын тоо 755 болоод байна.
“Одоогоос 40 орчим жилийн өмнө бэлгийн замаар халдварладаг дох өвчин гарангуут АНУ-ын ХӨСҮТ-ээс эмчлэх вакциныг 2 жилийн дотор гаргана хэмээн зарлажээ. Гэтэл өнөөдрийг хүртэл гаргаж чадаагүй маш их хөрөнгө мөнгө зарцуулснаа хэрхэн нөхөх, мөн 8 тэрбум хүн ихдэж байгаа тул 4 тэрбум болгох арга нь хуурамч КОВИД байсан юм”
FactCheck:
Энэ талаар бид өмнө нь нягтлан хүргэж байсан.
Хэдийгээр ДОХ өвчин нь вирусээр үүсгэгддэг ч коронавирусээс их ялгаатай болохыг эрдэмтэд тайлбарлажээ. Уг өвчнийг үүсгэгч ХДХВ буюу ретровирус нь удмын мэдээллээ олшруулахдаа хүний цагаан эсийн эрхтэнцрүүдийг ашигладаг ба ийнхүү хуулбарлах явцад олон удаа мутацид өртдөг байна. Тиймээс уг вирусийн эсрэг вакцин бүтээхэд бэрхшээлтэй байдаг гэжээ.
“Үхлийн тун- хүнцэлтэй вакцинаа тарихын тулд үхлээр нь айлгаж эхэлсэн. (Уханий жүжиг!)Дараа нь маск, шинжилгээ, вакцинаараа коронавирусыг тараасан. Ингэж л энэ түүх эхэлсэн. Хулхидаж боловуу!? Зогсоо!!! Жамаараа амьдармаар байна”
FactCheck:
Вакцины найрлагад хүнцэл ордог гэсэн албан мэдээлэл байхгүй байна.
Вакцины найрлагын талаар бид өмнө нь мөн нягтлан мэдээлж байв.
Монгол Улсад хүн амын дийлэнх хувийг дархлаажуулахад ашигаласан, БНХАУ-ын Бээжингийн биологийн бүтээгдэхүүний хүрээлэн ба Синофарм үйлдвэрийн BBIBP-CorV /Vero Cell/ вакциныг уламжлалт аргаар гаргаж авсан.
Уг вакцины дагалдуулсан зааварт найрлагадаа доорх бодисыг агуулсан гэсэн байна.
Үндсэн найрлага: идэвхгүйжүүлсэн 19n-CoV-CDC-Tan-HB02
Туслах найрлага: хөнгөн цагааны гидроксид,
Нэмэлт бодисууд: натрийн устөрөгчийн фосфат, натрийн хлорид, натрийн дигидрофосфат агуулжээ.
Хөнгөн цагаан вакцины найрлагад нэмэлтээр орсноор хүний дархлааны хариу урвалыг илүү сайжруулах нөлөөтэй. Вакцины найрлага дахь хөнгөнцагаан нь хүний биед ямар нэгэн сөрөг нөлөө үзүүлдэггүй болохыг өнгөрсөн 60 жилийн судалгаа нотолно гэдгийг АНУ-ын Хүнс болон эмийн захиргаанаас мэдээлжээ. Хөнгөн цагааны агууламжтай бусад вакциныг ЭНД-ээс харж болно.
Нэмэлт бодисуудын тухайд тус вакцины 2021 оны тавдугаар сарын 26-нд шинээр танилцуулсан судалгаагаар тус вакцины үндсэн бодисгүйгээр туслах бодис тарьсан үр дүнг нийтэлжээ. Судалгаанд үндсэн ба туслах бодистой вакцин нь үр дүнтэй талаар тайлбарласан байна. 25,000 хүнийг хамруулсан уг судалгаагаар BBIBP-CorV /Vero Cell/ вакцин нь халдвараас урьдчилан сэргийлэх үр дүн 75%, өвчний хүндрэлээс 100% сэргийлж байгаа нь тогтоогджээ.
Вакцины тухайд хүнд металл гэж нэрлэгдэж байгаа нь мөнгөн ус. Гэхдээ энэ нь бидний төсөөлж байгаа мөнгөн уснаас огт өөр гэдгийг тайлбарлах хэрэгтэй. Зарим вакцины найрлагад багтдаг Тимеросал хэмээх нэгдэл нь маш бага хэмжээний мөнгөн усны агууламжтай бөгөөд бактери, мөөгөнцрийн халдвараас сэргийлэх үүрэгтэй байдаг байна.
Мөнгөн ус бол дэлхийн царцдас, агаар, хөрс, усанд байдаг химийн элемент. Дэлхий үүссэнээс хойш галт уулын дэлбэрэлт, чулуулгийн өгөршил, нүүрс шатаах зэргээс хүрээлэн буй орчинд мөнгөн ус татагдаж байдаг аж. Харин үүнийг нь байгаль дээрх зарим төрлийн бактериуд мөнгөн усыг метил мөнгөн ус болгон хувиргадаг байна. Энэ нь загас, амьтан зэргээр дамжин хүний хоол тэжээлийн сүлжээнд нэвтрэх бөгөөд их хэмжээгээр биед орвол хортой нөлөө үзүүлдэг аж.
Харин Тимеросал нь мөнгөн усны өөр хэлбэр болох этилмеркуриг агуулдаг. Этилмеркури болон метилмеркури хүний биед ороод өөр өөр аргаар задардаг болохыг харьцуулсан судалгаагаар тогтоосон байдаг. Өөрөөр хэлбэл, этилийн мөнгөн ус метилийн мөнгө уснаас илүү хурдан задардаг байна. Тиймээс томуугийн вакцины найрлагад багтдаг этилмеркури нь байгаль дээрх мөнгөн усны төрөл болох метилмеркуригээс ялгаатай бөгөөд хүний биед хөр нөлөөгүй аж. Яг л метилийн спирт болон этилийн спирт шиг ялгаатай нөлөөтэй болохыг ойлгох хэрэгтэйг мэргэжилтнүүд тайлбарладаг.
АНУ-ын Хүнс болон эмийн захиргаа(FDA)-ны шийдвэрээр бага насны хүүхдийн товлолт вакцины найрлагаас тимерозыг хассан ба 2001 оноос хойш ашиглаагүй байна. Одоогоор зөвхөн томуугийн эсрэг вакцинд мөөгөнцөр болон бусад хор хөнөөлтэй бичил биет үржихээс сэргийлэх зорилгоор энэхүү бодисыг ашиглаж байгаа аж.
Вакцин нь вирусийн халдвар авах шалтгаан болохгүй
Вакцин нь вирусийг дамжуулдаггүй. Үүнийг тайлбарлавал:
Бээжингийн биологийн бүтээгдэхүүний хүрээлэнгийн судлаачид орон нутгийн эмнэлэгт хэвтэн эмчлүүлж байсан өвчтөнүүдээс коронавирусийн гурван хэв шинжийг ялган авсан.
Эсийн дотор үржиж олшрох чадвартай нэг хэв шинжийг сонгон авч, коронавирусийн арвин нөөцтэй болсны дараагаар вирусийг бета-пропиолактон гэдэг бодис ашиглан химийн аргаар идэвхгүйжүүлсэн. Идэвхгүй болсон вирус халдвар үүсгэдэггүй ч бүтцийн уургууд нь хэвээр үлддэг. Вирусийг идэвхгүйжүүлсний дараагаар цэвэршүүлж, маш бага хэмжээний хөнгөн цагаанд суурилсан бодистой хольсон.
Хөнгөн цагаан нь вакцины нөлөөгөөр өрнөх дархлааны хариу урвалыг идэвхжүүлж, дархлаа тогтохыг нэмэгдүүлдэг.
Өөрөөр хэлбэл, вакцины найрлага дахь идэвхигүйжүүлж цэвэршүүлсэн вирусийн хэсэг нь халдвар үүсгэхгүй, харин вирусийн эсрэг дархлаа тогтоох замаар тухайн хүнийг хүндээр өвчлөх болон нас барах эрсдэлээс сэргийлж байна.
Монгол Улсын хувьд вакцины үр дүн нас барах эрсдэлээс 92% хамгаалж байгаа гэсэн судалгаа гарсан ба хэрэв вакцин тарьж хүн амаа дархлаажуулаагүй бол долдугаар сарын эхний байдлаар нас баралт 15,600-46,000-д хүрэх байсан гэж тооцоолсноо доктор Т.Бэгзсүрэн танилцуулсан.
Вакцин үхэлд хүргэсэн ба нас баралтын шалтгаан болсон нотолгоо өнөөдрийн байдлаар бүртгэгдээгүй байна.
Эх сурвалжууд:
ЭМЯ
ХӨСҮТ
https://www.reuters.com/article/uk-factcheck-covid-vaccine-ingredients-idUSKBN2AQ2SW
https://www.cdc.gov/vaccinesafety/concerns/adjuvants.html
https://www.cdc.gov/vaccines/hcp/conversations/downloads/vacsafe-thimerosal-color-office.pdf
https://www.chop.edu/centers-programs/vaccine-education-center/vaccine-ingredients/thimerosal
https://www.nytimes.com/interactive/2020/health/sinopharm-covid-19-vaccine.html
https://covid19.trackvaccines.org/vaccines/5/
НҮБ-ын Хүүхдийн Сангийн дэмжлэгтэйгээр, АШУҮИС-ийн Дархлаа судлалын тэнхмийн эрхлэгч, АУ-ы доктор Т.Хонгорзултай хамтран нягтлав.
