Корона гэгч тахал дэлхий дахинаа гарлаа гэсэн нь ЖҮЖИГ биш

Tseren Ichinhorloo хэмээх фэйсбүүк хэрэглэгч коронавирусийн талаар дараах постыг оруулсан нь маш олон хүний хандалтыг авчээ. Долдугаар сарын 14-нд нийтэлсэн уг постыг 253 хүн лайк дарж, 232 хүн шэйрлэж, 68 хүн коммент бичжээ.

Тэрхүү постод:

Корона гэгч тахал дэлхий дахинаа гарлаа гэсэн ЖҮЖИГ массыг АЙДАСТ автуулан 2 жил болоход хүүхдүүд хичээлээсээ хоцрогдож, жижиг дунд бизнесийнхэн элгээрээ хэвтэж, дундаж давхрагагүй улс болон, хил хаагдснаар юмны үнэ тэнгэрт хадлаа.

Үүнээс бид сургамж авч гадны улсаас хамааралтай амьдрах биш өөрсдөө гурил будаа, жимс ногоогоо тарьж, малын түүхий эд, сүү цагаагаа боловсруулан жижиг дунд үйлдвэрээ хөгжүүлэх хэрэгтэйг ухаарах цаг болжээ. 

Манайхтай ойролцоо 5 сая хүн амтай Норвеги улс 20 сая хүний хоолыг зөвхөн малын дайвар бүтээгдэхүүн сүү цагаан идээнээс бэлддэг. Бидэнд гаднаас сурах, хөгжих юм маш их. 

Анх заавал вакцин шахуулсан хүн л дархлаажина гэж хүчээр хийсэн боловч энэ нь дархлаа байж чадсангүй. Халдвар тараагч болж хувирав.

Миний хувьд вакцины ахлах мэргэжилтэн Өлзийтогтох эмчийн ярилцлагаас өөрийн дархлаагаар даваад гарч болохыг мэдснээс хойш үр дүн, орц найрлага нь мэдэгдэхгүй туршилтын шатандаа байгаа Ко19 вакцин хийлгэхгүй байхаар шийдсэн. Тэгээд ч вакцины гаж нөлөөгөөр олон хүн амь нас хөдөлмөрийн чадвараа алдсан боловч хэн ч хариуцлага хүлээгээгүй. 

Мөн гадаадын олон эрдэмтэн мэргэжилтэнгүүд Ко19 вакцины олон гаж нөлөөг хэлсээр, сануулсаар.

Манайх 6 сарын эхээр гэр бүлээрээ Корона тусаад эдгэрсэн. Вакцин хийлгээгүй хүмүүс нь хөнгөн тусаад вакцины 1, 2-р тунд хамрагдсан нь хүндэвтэр туслаа. Бага насны хүүхдүүд эерэг гарсан боловч шинж тэмдэг илэрсэнгүй өнгөрөв. Вирусын эм, С, Д бусад амин дэмийг гэрээр уугаад 10 хонгийн дотор бүрэн эдгэрлээ.

Тусаад эдгэсэн учраас биед эсрэг биет үүссэн, дархлаа суусан вакцин хийлгэх шаардлагагүй. Туссан ч зүгээр л ханиад гэдэг нь батлагдлаа.

Одоо делта мутаци гэж сүржигнэн хүн амыг айлгах гэж маш их хичээж байна. Айх шаардлагагүй.

Байгалийн жамаараа Корона тусаад өнгөрсөн хүмүүс яах ч үгүй. Туссан ч хөнгөн тусна.

Корона вакцин хийлгэсэн хүмүүс харин яахыг хэлж мэдэхгүй.

ДАХИН НЭМЖ БҮҮ ХОР ШАХУУЛ!!!

3, 4-р тун гэж байхгүй шүү Монголчуудаа!!!

Хүүхдүүддээ бүр ч хэрэггүй!

Монголын минь унаган байгалийн жимс, ногоо, цэвэр агаар, буянт малын минь мах, сүү цагаан идээ, зүгээр л элс шороо, уул ус маань бүгд амин дэм бидний монгол дархлаа, монгол ухаанаараа л бүгдийг давж чадна. Урин дулааны улирлыг ашиглаж эрүүл агаарт биеэ шарж, эко хүнсээ хэрэглэж эрүүл мэндээ сайн дархлаажуулж аваарай гэжээ.

Коронавирусийн цар тахлын үед мэдээллийг баттай эх сурвалжаас авч, үргэлж нягталж байхыг FactCheck.mn сануулсаар байгаа билээ. Учир нь төөрөгдүүлсэн ташаа мэдээлэлд итгэх нь эрүүл мэндээрээ хохирох эрсдэлтэй бөгөөд ташаа мэдээлэл түгээсэн хүн үүнд хариуцлага хүлээхгүй гэдгийг мэргэжилтнүүд анхааруулсаар байна.

Дээрх пост дахь коронавирустэй холбоотой агуулгуудыг нягталлаа.

Корона гэгч тахал дэлхий дахинаа гарлаа гэсэн ЖҮЖИГ массыг АЙДАСТ автуулан 2 жил болоход…

FactCheck:

Коронавирусийн цар тахал бол жүжиг биш юм. Үүнийг нотлох тоо баримтаас дурдвал, өнөөдрийн байдлаар энэхүү вирусийн улмаас дэлхийн 220 орны 4,151,655 хүн нас бараад байна. Монгол Улсад нийт өвчилсөн хүний тоо 2021.07.23-ны байдлаар 153,787 болсон бөгөөд уг вирусийн халдварын улмаас 755 хүн нас барав. 

ДЭМБ энэхүү вирусийн халдварыг “цар тахал” болохыг 2021.03.12-нд албан ёсоор зарласан юм. 

Цар тахал гэдэг нь тахал үүсгэж буй өвчний шинж, түүний эсрэг авах арга хэмжээ өөрчлөгдөөгүй гэсэн үг бөгөөд харин өвчний хамрах газар зүйн хүрээ тэлснийг хэлж байгаа нэр томьёо юм.

ДЭМБ -ын гаргасан мэдэгдэлд дурдсанаар хүн ам дархлаагүй ямар нэгэн шинэ өвчин гарч урьдчилсан таамаглалыг даван олон нийтийг хамарч дэлхий нийтээр тархах үед цар тахал хэмээн тодорхойлдог аж.

Дэлхий нийтийг хамарсан цар тахлууд, түүний хохирлыг доорх зургаас харна уу. 

Эх сурвалж: visualcapitalist

“Анх заавал вакцин шахуулсан хүн л дархлаажина гэж хүчээр хийсэн боловч энэ нь дархлаа байж чадсангүй. Халдвар тараагч болж хувирав”.

FactCheck:

Вакцин нь халдвар авах шалтгаан болохгүй.  

Монгол Улс дархлаажуулах зорилтот бүлэг буюу 18-аас дээш насны иргэдийнхээ 73.9%-ийг БНХАУ-ын Синофарм үйлдвэрийн идэвхгүйжүүлсэн коронавирусийн вакцин болох BBIBP-CorV /Vero Cell/ вакцинаар дархлаажуулаад байна. 

Энэхүү вакциныг гарган авсан талаарх тайлбарыг харвал:

Бээжингийн биологийн бүтээгдэхүүний хүрээлэнгийн судлаачид орон нутгийн эмнэлэгт хэвтэн эмчлүүлж байсан өвчтөнүүдээс коронавирусийн гурван хэв шинжийг ялган авсан.

Эсийн дотор үржиж олшрох чадвартай нэг хэв шинжийг сонгон авч, коронавирусийн арвин нөөцтэй болсны дараагаар вирусийг бета-пропиолактон гэдэг бодис ашиглан химийн аргаар идэвхгүйжүүлсэн. Идэвхгүй болсон вирус халдвар үүсгэдэггүй ч бүтцийн уургууд нь хэвээр үлддэг. Вирусийг идэвхгүйжүүлсний дараагаар цэвэршүүлж, маш бага хэмжээний хөнгөн цагаанд суурилсан бодистой хольсон.

Хөнгөн цагаан нь вакцины нөлөөгөөр өрнөх дархлааны хариу урвалыг идэвхжүүлж, дархлаа тогтохыг нэмэгдүүлдэг.

Өөрөөр хэлбэл, вакцины найрлага дахь идэвхигүйжүүлж цэвэршүүлсэн вирусийн хэсэг нь халдвар үүсгэхгүй, харин вирусийн эсрэг дархлаа тогтоох замаар тухайн хүнийг хүндээр өвчлөх болон нас барах эрсдэлээс сэргийлж байна.  

Монгол Улсын хувьд вакцины үр дүн нас барах эрсдэлээс 92% хамгаалж байгаа гэсэн судалгааг ХӨСҮТ-өөс гаргасан ба хэрэв вакцинжуулалт хийгээгүй бол долдугаар сарын эхний байдлаар нас баралт 15,600-46,000-д хүрэх байсныг доктор Т.Бэгзсүрэн тооцоолсноо танилцуулсан. 

Өнгөрсөн хугацаанд коронавирусийн 20,000 орчим хувилбар бүртгэгдсэнээс альфа буюу Их Британи, дельта буюу Энэтхэгийн хувилбар хамгийн аюултай гэдгээрээ анхаарал татаж байгаа. 

Монгол Улсад өнгөрсөн хугацаанд хоёр удаагийн халдварын давалгаа гарсан хэмээн ХӨСҮТ болон ЭМЯ судалгаагаараа үзэж байгаа бөгөөд хоёр дахь давалгааны үеийн халдварын 80-90% нь альфа хувилбар байсан хэмээн үзэж байна. Өөрөөр хэлбэл, халдварлах чадвар илүү өндөр хувилбар тархсанаас өвчлөх хүний тоо өссөн хэмээн үзжээ. 


Одоо делта мутаци гэж сүржигнэн хүн амыг айлгах гэж маш их хичээж байна. Айх шаардлагагүй.

Байгалийн жамаараа Корона тусаад өнгөрсөн хүмүүс яах ч үгүй. Туссан ч хөнгөн тусна.

Корона вакцин хийлгэсэн хүмүүс харин яахыг хэлж мэдэхгүй”.

FactCheck:

Коронавирусийн Дельта хувилбар буюу Энэтхэг улсаас гаралтай мутац нь халдварлах чадвар улам өндөр болсон бөгөөд одоогоор дэлхийн 98 улсад бүртгэгдээд байна. 

Дельта хувилбарын халдварлах болон хүндрэл үүсгэх байдал бусад хувилбараас 67% өндөр байна. Мөн амт үнэр мэдрэхгүй байх шинж тэмдэг илрэхгүй байгаа тохиолдлууд байгааг ЭМЯ мэдээлсэн. Дельта хувилбараар эмнэлэгт хэвтэх байдал альфа хувилбараас хоёр дахин өндөр байгааг мөн хэлсэн.

вирус мутацид орсноор вакцины үр дүнг тодорхой хэмжээгээр бууруулах магадлалтай байна.  Тухайлбал, Синофармын вакцины COVID-19 өвчнөөс урьдчилан сэргийлэх хувь альфа хувилбарын үед 73 байсан бол дельта хувилбарын үед 47, халдвараас урьдчилан сэргийлэх хувь альфа хувилбарын үед 65 байсан бол дельта хувилбарын үед 41% болж буурсан мэдээлэл байна.


Эх сурвалж: healthdata.org

Үндэсний статистикийн хорооны хийсэн судалгаагаар КОВИД-19-ийн дархлаажуулалтад хамрагдсан иргэдийн 35.5 хувь нь өвчилсөн гэсэн дүгнэлт гарсан бол нийт халдвар авсан иргэдийн 64.5 хувь, нас барсан хүмүүсийн 61.6% нь огт вакцинд хамрагдаагүй байжээ.

Манай улсад коронавирусийн дельта хувилбараар 7 хүн өвчлөөд байгаа.

Тиймээс дээрх пост дахь мэдээлэл нь иргэдийг төөрөгдүүлсэн байна.

Эх сурвалжууд:

http://www.healthdata.org/covid/covid-19-vaccine-efficacy-summary?fbclid=IwAR1uXdMoZO9FvoIz0XeJuRoiJC7UiXh5j3o4oGySjnNpu4Ap-IWljz7L4o8

https://www.reuters.com/article/uk-factcheck-covid-vaccine-ingredients-idUSKBN2AQ2SW

https://www.cdc.gov/vaccinesafety/concerns/adjuvants.html

https://www.cdc.gov/vaccines/hcp/conversations/downloads/vacsafe-thimerosal-color-office.pdf

https://www.chop.edu/centers-programs/vaccine-education-center/vaccine-ingredients/thimerosal

https://www.nytimes.com/interactive/2020/health/sinopharm-covid-19-vaccine.html

https://covid19.trackvaccines.org/vaccines/5/https://www.facebook.com/watch/live/?v=336487258026872&ref=watch_permalink&t=0

НҮБ-ын Хүүхдийн Сангийн дэмжлэгтэйгээр, АШУҮИС-ийн Дархлаа судлалын тэнхмийн эрхлэгч, АУ-ы доктор Т.Хонгорзултай хамтран нягтлав.

Энэ зургийн alt аттрибут хоосон байна. Нэр нь - unicef-japan-gov-1024x576.png
Төстэй мэдээлэл

“Украины дээгүүр иргэний ямар ч улсын агаарын тээвэр нисэхгүй байгаа юм байна. Буудчихна гээд. Тэгсэн чинь ганц онгоц нисэж байсан нь манай “МИАТ” гэнэ ээ. Хөөрхөн үү?” гэсэн постыг ulsturch.mn гэх фэйсбүүк хуудас өчигдөр оруулсан. Украины агаарын замыг тойрсон шар онгоцууд дунд Украины агаарын хилээр явж буй цэнхэр онгоц бүхий зурагтай энэхүү мэдээлэл өнөөдөр олон […]

Тэгвэл уг мэдээллийг нягталж шалгахад зураг эвлүүлсэн байжээ. Мөн япон хэл дээрх текстэд Ерөнхий сайд гамшиг болсон газартай танилцсан тухай л өгүүлжээ. Харин түүний доод хэсгийн зургийг эвлүүлэн хуурамчаар хийжээ. Уг зурган дээрх үйл явдал бол 2019 оны 10 сарын 17-ны өдөр Японы зүүн хойд хэсгээр далайн хүчтэй хар шуурганд өртсөн Фукушима, Мияги зэрэг мужийн […]

Засгийн газраас өргөн барьсан Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуулийг 2023 оны 31-ний өдөр УИХ баталсан. Гэвч хуулиа мөрдөж баталсан мэт ч энэ нь өмнөх жилүүдийн адил нүд хуурсан ажил хэвээр байгаа юм. Төсвийн тогтвортой байдлын тухай хуулийг Засгийн газар, УИХ хэрэгжүүлж байгаа эсэхийг нягталлаа. Factcheck: […]

Цахим орчинд найруулагч Б.Баатарын эргэлзээтэй мэдээлэл агуулсан дээрх жиргээ бүхий зураг тараад буй. Уг зургийг нягталж шалгах хүсэлт ирсний дагуу бид нягталлаа. Дээрх жиргээг найруулагч Б.Баатар жиргэсэн нь үнэн бөгөөд энэ оны есдүгээр сарын 11-ний өдөр itoim.mn сайтад нийтлэгдсэн нийтлэлийг дахин жиргэхдээ дээрх мэдээллийг хамт оруулжээ. Тус нийтлэл нь Академич, МУИС-ийн профессор С.Нарангэрэлийн “Монгол төрийн ёс […]

Вакциныг албадан хийж байгаа гэж үзэж буй иргэд Нюрнбергийн шүүхэд хандах эрхтэй хэмээх пост цахим орчинд тархаад буй. Тухайлбал, Khulan Ruchira хэмээх фэйсбүүк хэрэглэгч “Вакциныг албадан хийж байгаа ЭМЯ, ДЭМБ-ыг олон улсын Нюрнбергийн дайны шүүхээр “хомроголон устгах гэмт хэрэг хийж байна” гэж одоо шүүж эхэлсэн тул та 2-дах тунгаа тариулах хэрэггүй, харин өөрийн гомдлоо интернетээр […]

Товч агуулга: Баянзүрх дүүргийн 26-р хорооны нутагт өнөөдөр(2024.01.24) болсон дэлбэрэлтийн улмаас үүргээ гүйцэтгэж байсан Онцгой байдлын гурван алба хаагч амиа алдсан харамсалтай хэрэг гарсан. StOne, S’s boutique зэрэг нэртэй фэйсбүүк хэрэглэгчид “Хичнээн хайрлаж өсгөсөн хөвгүүд ээжийгээ үлдээгээд, аавийгаа орхиод одчихов доо. Гүн эмгэнэл илэрхийлье” гэсэн үгтэй пост цахим орчинд тараад байна. Тухайн постод ашигласан зураг […]

Өөр мэдээ олдсонгүй.

Хандив

FactCheck.mn сайт нь бие даасан, хараат бус редакц бөгөөд бид сурталчилгаа олгогчдод биш, иргэдэд үйлчилдэг. Бид аливаа компани, улстөрч, засгийн газрын нөлөөнд автахгүй, зөвхөн олон нийтийн эрх ашгийн төлөө ажиллана.

Гэвч нягтлан шалгах ажил нь цаг, мөнгө, шаргуу хөдөлмөр шаарддаг билээ.

Иймд, манай редакц хараат бус байдлаа хадгалж, илүү хүчтэй болоход таны дэмжлэг чухал юм!

Та бидний үйл ажиллагааг дэмжиж байвал ХАС БАНК 5001984178 ЭССТ НҮТББ дансаар хандив өгөх боломжтой. Гүйлгээний утган дээрээ ХАНДИВ гэдгээ тодорхой бичээрэй. Хүсвэл нэр, холбогдох утасны дугаар зэрэг хувийн мэдээллээ оруулж болно.

Биднийг дэмжсэн танд маш их баярлалаа.

Мэдээлэл хайх