Bachi Nyangar гэх фэйсбүүк хэрэглэгч 2022.01.31-нд “Pfizer, AstraZeneca, Sinopharm & Sputnik вакциныг микроскопоор томруулан хараад их хэмжээний графен (хар тугалга шиг). Ихэнх хүмүүс цус нь бүлэгнэж, зүрх нь гэнэт зогсоод байгаа үндсэн шалтгаан болоод байгаа” гэсэн пост оруулсныг 147 хүн шэйрэлжээ.
Уг мэдээллийг нягталж өгөх хүсэлт уншигчаас ирсний дагуу нягталлаа.
Factcheck:
Ийм агуулгатай мэдээлэл Монгол төдийгүй олон улсад 2021 оноос эхлэн тархжээ. Хамгийн сүүлд 2022 оны нэгдүгээр сараас олон нийтийн сүлжээнд дахин тархсан тул Politifact, Fullfact, AP, Reuters тэргүүтэй баримтыг нягтлагчид энэ талаар нягталж, баримттай мэдээллийг хүргэсээр байна.
Pfizer компанийн хэвлэлийн төлөөлөгч Жерика Питтс КОВИД-19-ийн эсрэг вакцинд графин байхгүй гэдгийг Politifact-д албан ёсоор мэдэгджээ. Миннесотагийн их сургуулийн халдварт өвчин судлалын профессор, доктор Ребекка Вуртц Pfizer төдийгүй бусад вакцины найрлагад графин байхгүй гэдгийг мөн тайлбарласан байна.
Графены исэл нь биоанагаах ухааны салбарт хэрэглэгддэг маш жижиг хэмжээтэй химийн нэгдэл юм. Энэхүү нано нэгдлийн хоруу чанар ба сөрөг нөлөөллийн талаар судалсаар байгаа аж. Тухайлбал, Жон Хопкинсын их сургуулийн Халдварт өвчний мэргэжилтэн, доктор Амеш Адаля графены ислийг хүний эсэд хортой нөлөө үзүүлэхээргүй хэмжээгээр вакцины найрлагад ашиглах боломжтойг AP News-д ярьж байжээ.
“Графеныг биоанагаахын зорилгоор, тэр дундаа вакцины судалгаанд туршиж байгаа ба туршилтын шатандаа явж байна. Эмнэл зүйн туршилт судалгаа хийсний дараа хэрэглээнд гарах хүртэл удаан хугацаа хэрэгтэй болно” гэж Сөүлийн үндэсний их сургуулийн Наноматериалын мэргэжилтэн, профессор Хон Бён Хи 2021 оны долдугаар сарын 19-нд Франс Пресс агентлагт ярьсан байна.
Коронавирусийн эсрэг вакцинд хийсэн хэд хэдэн судалгаагаар вакцин цусны бүлэгнэлтийн шалтгаан болж байгаа нь тогтоогдоогүй байгааг олон судлаач тайлбарлажээ.
Зүрхний өвчлөлийн талаар өмнө бид мөн хүргэсэн. Тодруулбал, Европын Анагаах ухааны агентлаг( ЕМА)-аас гаргасан 2022.01.30-ны өдрийн тайланд Европын Холбооны улсуудад 570 сая тун файзер (комирнати) вакцин хийснээс нийт 582,074 гаж нөлөө илэрсэн мэдээлэл бүртгэгджээ.
Мөн ЕМА-ийн 2021 оны 12 дугаар сарын тайланд 2020 оны 12 сараас 2021 оны 12 сар хүртэл нэг жилийн хугацаанд Европын Холбооны улсын хүн амыг 479 сая тун файзер (комирнати) вакцинаар дархлаажуулсан байна.
Уг тайланд файзер (комирнати) вакцины шалтгаант зүрхний булчингийн үрэвсэл (миокардит) ба зүрхний гялтан хальсны үрэвсэл (перикардит)-ийн тохиолдлын эрсдэл маш ховор буюу 10,000 хүний 1-д тохиолдох магадлалтай гэжээ.
Өөрөөр хэлбэл, COVID-19 вакцин нь цус бүлэгнэлт ба зүрхний өвчлөлийн шалтгаан болж байна гэсэн мэдээллийг олон улсын мэргэжлийн байгууллагуудын мэдэгдэл үгүйсгэж байна.
Иймд дээрх пост нь олон нийтийг төөрөгдүүлсэн ТАШАА мэдээлэл бөгөөд олон улсын баримтыг нягтлагчид ХУДАЛ гэж үнэлсэн байна.
Эх сурвалжууд:
https://fullfact.org/online/graphene-oxide/
https://chem.snu.ac.kr/research-faculty/faculty/fulltime?mode=view&profidx=77
https://www.ema.europa.eu/en/medicines/human/EPAR/comirnaty#safety-updates-section
АШУҮИС-ийн Дархлаа судлалын тэнхимийн ахлах багш, эмнэл зүйн дархлаа судлаач эмч, Анагаах ухааны доктор Т.Хонгорзултай хамтран бэлтгэв.
