iкonnews.net гэх сайт "Hэг cypгуулийн 4 бaгш кoвидoop н.a.c бapжээ" гэсэн гарчигтай мэдээллийг нийтэлжээ.
Уг мэдээлэлд "Багш нар xaлдварт өртөж а.м.и а aл дaaд тохиолдол гарч байна. Toдруулбал, хичээл эхэлснээс хойш Hийслэлийн 23 дугaap cypгуулийн дөрвөн багш xaлдвapaap н.ac бa.pж ээ.
Xaмгийн сүүлд гэхэд 45 нacтай багш н.a.c бapж дөрвөн хүүхэд нь өнч ирч үлджээ. Tyxaйн багшийн нөxөр өнгөpcөн гypaвдугaap capд koвидын xaлдвapaap н а.с б ap.сан юм байна. Өнөөдрийн байдлaap EБС-ийн 1885 багш гэрийн тусгaapлалтад байгaa аж" гээд доор нь эх сурвалжаа дурдсан байна. Эх сурвалжийг орж үзвэл zarig.club гэх сайт руу хөтөлж байгаа юм.
FactCheck:
Нэг сургуулийн дөрвөн багш нас барсан талаар FactCheck.mn Нийслэлийн Боловсролын газрын дарга Ж.Гантулгаас тодруулахад "Бид боловсролын байгууллагад КОВИД-19-ийн нөхцөл байдал ямар байгаа талаарх мэдээллийг өдөр бүр авч байгаа. Нийслэлийн Боловсролын газарт ийм мэдээлэл ирээгүй" хэмээн үгүйсгэв.
Нийслэлийн ерөнхий боловсролын 23 дугаар сургуулийн захирал Ц.Цолмонбаатартай холбогдож, энэ тухай лавлахад "Манай сургуульд тийм зүйл болоогүй. Багш нас барсан нэг харамсалтай тохиолдол гарсан. Тухайн багш маань эрүүл мэндийн шалтгаанаар эмнэлэгт хэвтэж байхдаа коронавирусийн халдвар авсан байсан. Улмаар эмчлүүлж байхдаа тарианаас шалтгаалж эндсэн гэсэн харамсалтай хэрэг болсон. Энэ хэрэг шүүх дээр явж байгаа. Дөрвөн багш нас барсан гэдэг худал" гэсэн юм.
Цар тахлын энэ үед халдварт өвчинтэй холбоотой аливаа мэдээллийг баталгаатай эх сурвалжаас авч, мэдээллийг үргэлж нягталж байхыг FactCheck.mn сануулсаар байгаа билээ.
Дээрх хоёр сайтыг бид мөн нягталлаа.
ikonnews.net гэх сайтыг нягтлахад баттай эх сурвалжид тооцох боломжгүй байна.
Учир нь "Бидний тухай" гэсэн хэсэгт ямар ч мэдээлэл оруулаагүй, "Холбоо барих" хэсэгт албан ёсны и-мэйл хаяг, байршил байхгүй, зөвхөн 80087886 гэсэн гар утасны дугаар л тавьжээ.
Уг дугаарыг хайж үзвэл Barimt.com, sonornews.com гэсэн хоёр сайтын "Холбоо барих" хэсэгт мөн тавигдсан байна. Тус дугаар руу холбогдож дөрвөн багштай холбоотой мэдээллийн талаар асуухад эх сурвалжийг мэдээндээ оруулсан гэдгээ хэллээ.
"ikonnews.net сайт нь ikon.mn-тэй андуурагдаж, иргэдийг төөрөгдүүлж байна" гэсэн уншигчийн гомдол бидэнд ирсэн юм. Тиймээс нэрний талаар тодруулахад “Манайх 2017 оноос хойш ажиллаж байна. Ikonnews.net гээд ялгаатай. Хүмүүс нэрийг нь гүйцэд уншихгүй андуураад байгаа байх. Мэдээний эх сурвалжийн талаар манай админтай холбогдоод асууж болно” гэв. Админтай нь холбогдоход “Бид мэдээндээ эх сурвалжийг нь дурдсан байгаа” гэлээ. Уг эх сурвалжтайгаа холбогдож баталгаажуулсан эсэхийг нь асуухад “Үгүй, эх сурвалжаа дурдаад оруулсан” гэж хариуллаа.
zarig.club гэх сайт нь өөрийн хуудасны талаар ямар ч мэдээлэл тавиагүй бөгөөд холбоо барих ч цэсгүй байгаа юм. Түүнчлэн мэдээний булангуудаа монгол биш, гадаад нэрээр нэрлэсэн бөгөөд сайтын доод хэсэгт “All Rights Reserved By Zoom Bangla News” гэжээ.
Мэдээнд ашигласан зураг нь 2020 оны дөрөвдүгээр сард АНУ-д коронавирусийн халдварын нөхцөл байдал хүндэрч байх үед Нью-Йоркт авсан Reuters/Andrew Kelly гэх автортой зураг байна. Түүнчлэн мэдээнийхээ гарчгийн үгийг тасалж бичсэн зэргээс мэргэжлийн, албан ёсны цахим хуудас биш болохыг хялбар таниж болохоор байгаа юм.
Иймд энэ мэт баталгаагүй эх сурвалжаас мэдээлэл авахгүй байхыг иргэддээ дахин сануулъя.
