Иргэний хөдөлгөөний намын дарга асан Ж.Занаа КОВИД-19-ийн эсрэг вакцины найрлагын талаар пост оруулсныг 33 хүн цааш хуваалцжээ. Цар тахлын энэ үед ташаа мэдээллийг олон нийтэд түгээж, түүнд нь нэг хүн итгэхэд л эрүүл мэндээрээ үнэлж баршгүй хохирол амсах эрсдэлтэй.
Иймээс түүний пост дахь мэдээллийг нягтлан хүргэхдээ коронавирустэй холбоотой аливаа мэдээллийг заавал нягталж байхыг дахин дахин сануулж байна.
Тэрбээр вакцины найрлага нь дараах 4 найрлагатай хэмээн бичсэнийг нягтвал(Өгүүлбэрүүдэд постод бичсэн эхээр нь бичив).
Нэг. ДОХ-н вирус, HIV1- хүний дархлааны эсрэг вирус, тиймээс вакцин хийлгэсэнээр ДОХ-н синдром, дархлааны хомсдол гаж нөлөө болж илрэх болно.
FACTCHECK:
HIV/1-ийн вакцины туршилтын явцад өнгөрсөн 25 жилд 30 мянга гаруй хүнд хийсэн судалгаагаар нэг ч хүн ДОХ тусаагүй байна (Энэхүү вакцин нь хэрэглээнд нэвтрээгүй байгааг анхаарна уу). Учир нь вакцин ДОХ өвчин үүсгэгч жинхэнэ вирус агуулдаггүй байна. Судалгааны явцад уг вакцинаар тарихад урвал илэрдэг ч тэр нь бусад вакцины адил тарьсан хэсэг өвдөх, халуурах ба хоёр хоногоос хэтрэхгүй арилдаг тухай бичжээ.
Хэдийгээр ДОХ өвчин нь вирусээр үүсгэгддэг ч коронавирусээс маш өөр болохыг эрдэмтэд тайлбарлажээ. Уг өвчнийг үүсгэгч ХДХВ буюу ретровирус нь удмын мэдээллээ олшруулахдаа хүний цагаан эсийн эрхтэнцрүүдийг ашигладаг ба ийнхүү хуулбарлах явцад олон удаа мутацид өртдөг байна. Тиймээс уг вирусийн эсрэг бие үүсгэхэд бэрхшээлтэй байдаг.
Хоёр. Үүний дараа вакциндуулсан хүмүүст халуун хумхаагийн вирус хүний ДНХ-д нөлөөлнө. Энэ нь халуун хумхаагаар өвчлөхөд хүргэнэ.
FACTCHECK:
Нэгдүгээрт, Халуун хумхаа өвчний үүсгэгч нь вирус биш, цусны улаан эсэд халдварладаг Plasmodium гэж нэрлэгддэг шимэгчээр (паразит) үүсгэгддэг халдварт өвчин.
Өөрөөр хэлбэл, коронавирустэй ямар нэгэн холбоогүй, өөр төрлийн халдварт өвчин гэсэн үг.
Хоёрдугаарт, уг шимэгчийг хүнд тараадаг үүсгэгч нь зөвхөн халуун оронд байдаг. Харин уг өвчний эсрэг хэрэглэдэг байсан гидроксихлорохиныг COVID-19-ийг эмчлэхэд үр дүнтэй гэсэн ташаа мэдээлэл олон нийтийн сүлжээнд гарч байсныг мэргэжлийн байгууллагууд удаа дараа няцаажээ.
Гурав. ДНХ болон уургийн бүтцийг сүйтгэдэг тайлбарлаж чадаагүй байгаа 157 нэмэлтүүд (Патент US 8,243,718 B2)
FACTCHECK:
COVID-19-ийн вакцин нь тухайн хүний ДНХ-ийг өөрчлөхгүй гэдгийг эрдэмтэд тайлбарласан байна. Энэ тухай эргэлзээ төрүүлсэн мэдээллийг 2020 оны арванхоёрдугаар сарын 11-нд AFP нягталсныг өмнө нь factcheck.mn мэдээлж байсан.
Чилийн их сургуулийн, халдварт өвчнөөр мэргэшсэн профессор Жаннетт Дабанч Пенья энэ тухай тайлбарлахдаа “Вакцин нь зарим уургийг илэрхийлэх зориулалттай тул бидний бие махбод тэдгээрийг тодорхойлж, шаардлагатай хамгаалалтыг бий болгодог. Вирус ийм л байдаг. Харин бидний генийн мэдээллийг удирдах боломжгүй” гэжээ.
Дөрөвт, нано тоосонцрууд, 5G-ийн тусламжтайгаар вакциндуулсан хүнийг хянана, Аденовирусын вектор ChAdOx1 нь Ковид19-ийн вирусыг тээж явдаг, PCT/US2019/048084 нано тоосонцор нь 5G-н тусламжаар таныг хянах болно. Ариутгалын бодис болох мөнгөн ус, эсвэл формалдегид, бас антибиотик. Хүний мэдрэлд нөлөөлнө, альцхаймэр зэрэг өвчинтэй болно. К вакцин ийм л найрлагатай байна. /ДАШРАМД ХЭЛЭХЭД, БИ ЯГ ИЙМ МЭДЭЭЛЭЛ ОЛЖ АВАХ ГЭЭД ЭМЯ-НААС ХҮССЭН БОЛОВЧ АВЧ ЧАДААГҮЙ ХЭВЭЭР Л БАЙНА/
FACTCHECK:
Вакцинаар дамжуулан нано чип тарьж, 5G технологиор хянах боломжтой эсэх талаар factcheck.kz 2020 оны тавдугаар сарын 23-нд нягталжээ.
Уг мэдээлэлд нановакцин нь наночип биш гэдгийг тодотгосон байна. Түүнчлэн баримтуудыг нягталсны үндсэн дээр вакцинаар дамжуулан нано чип тарьж, 5G технологиор хянах боломжгүй гэдгийг тайлбарлажээ.
Нано чипүүд нь ямар ч хэмжээтэй байсан эрчим хүчний хангалттай багтаамжгүй ба радио долгионы дохиог хүлээн авах чадваргүй тул 5G ашиглан хянах боломжгүй байна.
Иргэний хөдөлгөөний намын дарга асан Ж.Занаагийн түгээсэн вакцинтай холбоотой мэдээлэл худал болох нь нотлогдож байна.
Эх сурвалжууд:
- АШУҮИС-ийн Эмгэг физиологийн тэнхмийн багш АУ-ы доктор О.Зэсэмдорж
- НҮБ-ын Хүүхдийн сангийн Эрүүл мэндийн ахлах зөвлөх, доктор Б.Цогтбаатар
- https://www.hvtn.org/en/participants/HIV-myths-facts.html
- https://www.unaids.org/en/resources/presscentre/featurestories/2021/february/20210209_how-was-a-covid-19-vaccine-found-so-quickly
- https://www.dw.com/en/fact-check-effective-and-ineffective-covid-19-treatments/a-56277961
- https://factcheck.mn/post/3945
- https://factcheck.afp.com/vaccines-dont-change-your-dna
