Долдугаар сарын 15-нд Bolormaa Bat-Ulzii нэртэй Фэйсбүүк хэрэглэгч доорх постыг нийтлэжээ. Уг постод 18 хүн сэтгэгдэл бичиж, 50 хүн цааш түгээсэн байна.
Бид уг мэдээллийг нягталлаа.
“ЕВРОП ЭМНЭЭС доорх 3 төрлийн эм ковидын вируст сайн үйлчилж бна. Дэлхийн олон эмч нар энэ эмээр халдвар авсан, шинж тэмдэгтэй олон хүмүүсийг хэдхэн хоногт (ихэнхдээ 1-3 хоног) эмчилсэн бна. Амёрикийн нэг эмч гэхэд гидроксихлорхининээр 500 гаран өвчтөнг богино хугацаанд 1-4 хоногт эдгээснэ Трампад мэдэгдэж, Америкт үхэл гарч бх үед энэ эмээр эмчлэхийг санал болгож, үр дүнгээ танилцуулж байсан.
1. Амантадин.
2. Гидроксихлорхинин. Маляри( хумхаа) өвчний эм.
3. Ивермектин (Ивомек).
Энэ гурван эмийн аль нэгийг эмч нар хэрэглэж олон хүнийг хүндрүүлэхгүй, авраад бна” Бид уг мэдээллийг нягталлаа.
FactСheck:
Амантадин – ҮНЭН
Амантадиныг COVID-19 өвчний үр дагаврыг бууруулахад ашиглаж болно. Судалгаанаас үзэхэд амантадин эмийг хэрэглэж байсан Паркинсоны өвчтэй (тархи, мэдрэлийн архаг өвчин) коронавирусийн шинжилгээ эерэг хүнд COVID-19 өвчний шинж тэмдэг илрээгүй байна.
Амантадин эмийн үйлдлийг шүлтлэг бодисын адилаар лизосомын мембраныг нэвтэрч вирусийн РНХ чөлөөлөгдөж эсрүү нэвтрэхээс сэргийлдэг гэж үзэж байна. Амантадиныг томуугийн А вирусийн эсрэг эмчилгээнд ашигладаг бөгөөд вирус үржиж олшрох эхний үе шатыг хориглодог аж. Амантадин нь Коронавирусийн Е сувгийг нэвтэрч вирус эсийг халдварлуулахаас сэргийлдэг байна.
Гидроксихлорхинин – ХУДАЛ
ДЭМБ 10мянга гаруй COVID-19 өвчтэй хүнийг хамруулсан 30 орчим судалгааны үр дүнд үндэслэсэн гидроксихлорхининыг Коронавирусийн эсрэг эмчилгээнд ашиглахыг зөвшөөрөөгүй байна. Гидроксихлорхинин нь COVID-19 шалтгаант нас баралтыг бууруулаагүй ба өвчтөний амьсгалын аппаратын хэрэгцээг мөн адил бууруулаагүй аж. COVID-19-ийг эмчлэхийн тулд гидроксихлорхинин хэрэглэх нь зүрхний хэм алдах, цус, тунгалгийн эмгэг, бөөрний гэмтэл, элэгний үйл ажиллагаа алдагдах зэрэг эрсдлийг нэмэгдүүлнэ. Тус эмийг зөвхөн аутоиммун өвчин эсвэл хумхаа өвчний үед хэрэглэхэд аюулгүй гэжээ.
Ивермектин (Ивомек) – ХУДАЛ
ДЭМБ эмнэлзүйн туршилт судалгаанд үндэслэн ивермектин эмийг COVID-19-тэй өвчтөнд хэрэглэхгүй байхыг зөвлөжээ. Уг эмийг COVID-19-ийн эмчилгээнд хэрэглэж болох эсэх талаар эмнэлзүйн судалгаа хийгдэж байгаа бөгөөд үр дүн нь харилцан адилгүй, эргэлзээтэй байгаа тул олон нийт дур мэдэн хэрэглэхийг зөвшөөрөөгүй байна.
Эх сурвалж:
- www.ncbi.nlm.nih.gov/pmc/articles/PMC7290190/
- pubmed.ncbi.nlm.nih.gov/32542661/
- www.who.int/news-room/q-a-detail/coronavirus-disease-(covid-19)-hydroxychloroquine
- www.drugs.com/medical-answers/ivermectin-treat-covid-19-coronavirus-3535912/
- www.bmj.com/content/370/bmj.m3379
НҮБ-ын Хүүхдийн Сангийн дэмжлэгтэйгээр, АШУҮИС-ийн Дархлаа судлалын тэнхмийн эрхлэгч, АУ-ы доктор Т.Хонгорзултай хамтран нягтлав.
