УИХ-ын чуулганы Пүрэв гарагийн хуралдааны үеэр УИХ-ын гишүүн Х.Болорчулуун асуулт асуухдаа вакцины талаар байр сууриа илэрхийлсэн юм.
Тэрбээр "Эрдэмтэд зургаадугаар сарын дундуур КОВИД-19 буурна гэсэн ч буураагүй. Тодорхой хугацааны дараа буурах байх. Орон нутагт өвчлөл бага байхад вакцин тариад зуу зуугаараа гараад эхэлсэн. Газар газрын батлагдаагүй вакцинуудыг хийж, туршилтын туулай болж гүйцлээ" гэсэн юм.
Түүний үгийг нягталлаа.
"Орон нутагт өвчлөл бага байхад вакцин тариад зуу зуугаараа гараад эхэлсэн".
Factcheck:
COVID-19 цар тахалтай холбоотойгоор гурав дахь удаа тогтоосон Бүх нийтийн бэлэн байдлын зэрэг буюу хатуу хөл хориог хоёрдугаар сарын 23-наар дуусгавар болгох хүртэл орон нутагт төмөр замаас голомтолсон халдвар хумигдаад байсан юм.
Харин гуравдугаар сарын 1-ний өдрөөс Улаанбаатар хотоос орон нутаг руу гарах хөдөлгөөнийг нээснээр аймгуудад халдвар зөөвөрлөгдөж эхэлсэн билээ.
Тодруулбал, 2021.03.03-нд Завхан аймагт 2 хүн халдвартай нь батлагдаж тус аймагт анх удаа COVID-19 бүртгэгдсэн бол 6-ны өдөр Төв аймаг мөн л анхны халдвар бүртгэгдэж, дөрвөн хүн өвчлөв.
Архангай аймагт 2021.03.07-нд нэг тохиолдол батлагдсанаар аймгуудын халдвар цааш үргэлжилж, дөрөвдүгээр сарын 13-нд Дундговь аймагт есөн хүн өвчилснөөр 19 аймагт халдвар тархсан.
Халдварын тархалт өндөртэй аймгуудад гуравдугаар сарын 27-ноос вакцинжуулалтыг эхлүүлсэн бол тавдугаар сарын 2-ноос 21 аймаг руу БНХАУ-ын Синофарм үйлдвэрийн вакцин хүргүүлэх ажил эхэлж, тавдугаар сарын 22-ноос хоёр тунг хийж эхэлсэн.
Тавдугаар сарын 24-нд гэхэд гурван аймаг "Ногоон бүс" болсон нь
Говьсүмбэр аймагт - 16
Баянхонгор аймагт - 24
Дундговь аймагт - 21 хоногийн турш шинээр халдвар илрээгүй. Мөн
Дорноговьд - 6
Хэнтийд - 9
Ховдод - 5 хоног халдвар бүртгэгдээгүй байв. Өөрөөр хэлбэл, вакциныг орон нутагт эхлүүлснээр халдвар нэмэгдэх бус, буурсан байна.Харин зургаадугаар сар гарснаас хойш халдварын тоо дахин эрчимтэй нэмэгдсэн нь орон нутаг руу зорчих хөдөлгөөн нэмэгдсэнтэй холбоотой хэмээн ХӨСҮТ-ийн захирал Б.Баттөр хэлсэн юм.
Тухайлбал, тавдугаар сарын 24-нд Ерөнхийлөгчийн сонгуулийн сурталчилгаа эхэлснээс хойш аймгуудад халдварын тохиолдол дахин эрчимжээд байна.
"Газар газрын батлагдаагүй вакцинуудыг хийж, туршилтын туулай болж гүйцлээ."
Factcheck:
Монгол Улс 2021.02.23-наас вакцинжуулалтыг албан ёсоор эхлүүлсэн ба дөрвөн төрлийн вакцинаар иргэдээ дархлаажуулж байна. Эдгээрээс ОХУ-ын Спутник V вакцинаас бусдыг нь ДЭМБ зөвшөөрсөн юм.
AstraZeneca
Британи-Шведийн AstraZeneca компани, Оксфордын их сургуулийн хамтран бүтээсэн коронавирусийн эсрэг AstraZeneca вакциныг 2021.02.16-нд Дэлхийн Эрүүл Мэндийн Байгууллага яаралтай горимд хэрэглэх зөвшөөрөл олгосон.
Синофарм үйлдвэрийн идэвхгүйжүүлсэн вакцин
БНХАУ-ын Синофарм үйлдвэрийн идэвхгүйжүүлсэн вакцинаас 4.3 сая тунг авсан бөгөөд ДЭМБ 2021.05.08-нд зөвшөөрөл олгосон.
Спутник V
Энэхүү вакцинд одоогоор ДЭМБ зөвшөөрөл өгөөгүй байна. Манай улс ОХУ-аас тус вакцинаас 60,000 тунг авсан.Pfizer-BioNTech
ДЭМБ-аас хамгийн анх буюу 2020.12.31-нд коронавирусийн эсрэг вакциныг бүртгэсэн нь Pfizer-BioNTech. Уг вакцинаас 209,980 тунг манай улс авсан бөгөөд өнөөдрийн байдлаар жирэмсэн эмэгтэйчүүд болон 16-17 насныхныг дархлаажуулж байна.ДЭМБ ийнхүү вакцинуудад зөвшөөрөл олгохдоо гурван шатны эмнэл зүйн туршилтын судалгааны үр дүнд суурилж шийдвэр гаргадаг.
Вакцин бол цар тахал, халдварт өвчнөөс сэргийлэх хамгийн гол арга гэдгийг олон улсын мэргэжилтнүүд зөвлөсөөр байгаа юм.
Вакцинууд коронавирусийн хувилбаруудад хэрхэн үр дүн үзүүлж байгаа талаар ЭНД дарж харна уу.
Эх сурвалж:
Эрүүл мэндийн яам
ХӨСҮТ
ДЭМБ
http://www.healthdata.org/covid/covid-19-vaccine-efficacy-summary
НҮБ-ын Хүүхдийн Сангийн дэмжлэгтэйгээр нягтлав.
