Монгол төдийгүй олон улсад КОВИД-19-ийн вакцин халдварыг тарааж, нас баралтын шалтгаан болж байна гэсэн агуулга бүхий пост олон нийтийн сүлжээнд тархсаар байгаа.
Тэгвэл энэ талаар олон улсын баримтыг нягтлагч Poynter.org хэд хэдэн удаагийн нягталгаа хийснийг нэгтгэн хүргэж байна.
FactCheck:
КОВИД-19-ийн эсрэг вакцин хийлгэсний дараа ядрах зэрэг түр зуурын зарим гаж нөлөө илэрдэг. Харин вакцинаас болж олон мянган хүн нас барсан гэж үзэхэд хүргэсэн шалтгаан нь АНУ-ын Холбооны нийгмийн эрүүл мэндийн байгууллагын мэдээллийн бааз болох VAERS(Вакцины сөрөг мэдээллийн систем)-ий дататай холбоотой. Уг дата мэдээлэл нь нотлогдоогүй тохиолдлуудыг ч бүртгэдэг нь вакцин эсэргүүцэгчдийн хувьд ташаа мэдээлэл түгээх хэрэгсэл болжээ.
Энэ бол нээлттэй систем бөгөөд вакцины хариу урвал, гаж нөлөөний талаар хэн ч, хаанаас ч хандах боломжтой байна. Тиймээс уг системд маш их мэдээлэл ирсэн ч тайлан баталгаажаагүй, бүрэн бус гэдгийг анхаарах хэрэгтэй.
Тухайлбал, Fox News-ийн хөтлөгч Такер Карлсон өнгөрсөн арванхоёрдугаар сараас хойш вакцинаас болж олон хүн нас барсан хэмээн ярьсан нь мөн дээр дурдсан батлагдаагүй, бүрэн бус дата мэдээлэл ашигласантай холбоотой буюу ХУДАЛ болохыг нягталсан байна.
2021.07.21-ний байдлаар VAERS-д бичигдсэн нас баралтуудаас нэг нь ч вакцинаас үүдсэн гэж нотлогдоогүй байгааг Америкийн Халдварт өвчний хяналт, сэргийлэлтийн төвөөс мэдэгдсэн.
Өөрөөр хэлбэл, коронавирусийн вакциныг ашиглаж эхэлснээс хойш вакцинаас шалтгаалсан нас баралт өнөөдрийн байдлаар батлагдаж, нотлогдоогүй байна.
