Дэлхий дахинд тархаад байгаа коронавирусийн омикрон хувилбартай холбоотойгоор олон нийтийн сүлжээгээр энэ талаарх иргэдийг төөрөгдүүлсэн мэдээлэл маш их тархаж байна.
Германы институт нийт омикроны халдвараар өвчилсөн хүмүүсийн 96% нь вакцины бүрэн тунтай байсан гэсэн мэдээлэл мөн олон нийтийн сүлжээнд таржээ. Энэхүү мэдээллийг нягталж өгөх хүсэлт уншигчаас ирсний дагуу FactCheck.mn нягталлаа.
FactCheck:
Германы Роберт Кохын институт тус улс дахь бүртгэгдсэн Омикроны халдварын тохиолдлуудын 95.58% нь бүрэн вакцин хамрагдсан, 28% нь бүүстер тун хийлгэсэн, 4.42% нь вакцинд хамрагдаагүй байсан талаар 2021 оны арванхоёрдугаар сард мэдээлсэн нь тайлангийн алдаа байсан бөгөөд залруулжээ.
Халдварт өвчний судалгаа, урьдчилан сэргийлэх чиглэлээр ажилладаг Германы Засгийн газрын хэрэгжүүлэгч агентлаг болох Роберт Кохын институтийн хэвлэлийн төлөөлөгч Ронжа Венчел “Ройтерс” агентлагт энэ талаарх тайлбараа мэйлээр илгээсэн байна. Тэрбээр “Манай институт тийм тайлан нийтлээгүй. Омикроны вакцинд хамрагдсан болон хамрагдаагүй талаар тойм гаргасан бөгөөд 186 хүн вакцинд хамрагдаагүй байсан гэдэг нь буруу. 1,097 хүн нь хамрагдаагүй байсан гэдэг нь зөв тоо” хэмээн мэдэгдсэн байна.
Түүнчлэн Герман улсад Омикроны тархалт бага, илэрсэн халдварын ихэнх нь дельта хувилбар байгаа ба тус институт омикрон хувилбарт вакцины үр дүн ямар байгаа талаарх судалгааг хараахан хийгээгүй байгааг Ронжа Венчел мөн мэдэгджээ.
Тиймээс дээрх мэдээлэл нь ТАШАА байна.
Коронавирусийн цар тахал, вакцинтай холбоотой аливаа мэдээллийг заавал нягталж, баталгаатай эх сурвалжаас авахыг FactCheck.mn сануулсаар байна.
Эх сурвалжууд:
https://www.reuters.com/article/factcheck-rki-omicron-idUSL1N2TK195
НҮБ-ын Хүүхдийн Сангийн дэмжлэгтэйгээр бэлтгэв.
