Tserenkhuu Ishtseden нэртэй Фэйсбүүк хэрэглэгч “16.07.21 ПАЛ ХИЙСЭН МЭДЭЭ” гэсэн нэгэн линкийг постолжээ.
Тэрбээр “Жунгаа вакцины үр дүн хүмүүс өөрсдөө халдвар аваад эдгэснээс үүссэн эсрэг биетэд ч хүрэхгүй байгааг эцсийн байдлаар тогтоожээ. Энэ тухай бараг бүх агентлагууд мэдээлж байна. Хятад улс энийгээ хүлээн зөвшөөрсөн нь “хохь чинь” гэж байгаа юм шиг…
БиоНТех вакцинаас 10 дахин (дахин шүү) муу вакцин-хор шахуулчихжээ.
ЗГ одоо шууд огцорно уу?
Үүнээс өөр үндэслэл гэж юу байхав дээ” гэжээ.
Уг постыг 4 цагийн хугацаанд 273 хүн шэйрлэж, 537 хүн лайк даржээ.
Дээрх агуулгыг нягталлаа.
FactCheck:
Уг фэйсбүүк хэрэглэгчийн хувцаалцсан Ria.ru сайтын мэдээллийг шалгалаа.
Тэрхүү мэдээ нь “Файзер вакцин Хятатын Синовак вакцинаас илүү үр дүнтэй” гэсэн гарчигтай байна. Өөрөөр хэлбэл, Синовак вакцинтай харьцуулахад Файзер 10 дахин илүү үр дүнтэй байгаа тухай мэдээлэл байна. Гэвч дээрх харьцуулсан судалгаанд дурдсан Синовак вакциныг Монгол Улсад ашиглаагүй.
Монгол Улсын хувьд дөрвөн төрлийн вакцинаар иргэдээ дархлаажуулж байгаа. Үүнд:
AstraZeneca
Британи-Шведийн AstraZeneca компани, Оксфордын их сургуулийн хамтран бүтээсэн коронавирусийн эсрэг AstraZeneca вакциныг 2021.02.16-нд Дэлхийн Эрүүл Мэндийн Байгууллага яаралтай горимд хэрэглэх зөвшөөрөл олгосон.
Синофарм үйлдвэрийн идэвхгүйжүүлсэн вакцин(Монголд ашиглаж буй)
БНХАУ-ын Синофарм үйлдвэрийн идэвхгүйжүүлсэн вакцинаас 4.3 сая тунг авсан бөгөөд ДЭМБ 2021.05.08-нд зөвшөөрөл олгосон.
Спутник V
Энэхүү вакцинд одоогоор ДЭМБ зөвшөөрөл өгөөгүй байна. Манай улс ОХУ-аас тус вакцинаас 100,000 тунг аваад байна.
Pfizer-BioNTech
ДЭМБ-аас хамгийн анх буюу 2020.12.31-нд коронавирусийн эсрэг вакциныг бүртгэсэн нь Pfizer-BioNTech. Уг вакцинаас 411,220 тунг манай улс авсан бөгөөд өнөөдрийн байдлаар жирэмсэн эмэгтэйчүүд болон 12-17 насныхныг дархлаажуулж эхэлсэн.
Өөрөөр хэлбэл, Монгол Улсад Синовак вакциныг нэг ширхэг тунг ч ашиглаагүй, “Синофарм” үйлдвэрийн вакциныг ашигласан.
Тиймээс дээрх мэдээлэл нь иргэдийг ТӨӨРӨГДҮҮЛСЭН байна.
Дээрх вакцинууд нь 79-95%-ийн үр дүнтэй бөгөөд коронавирусийн мутацуудын эсрэг үр дүн нь тодорхой хэмжээнд буурсан ч нас барах, өвчлөл хүндрэх зэрэг эрсдэлээс 90-ээс дээш хувиар хамгаалж байгаа нь манай улсад ч мөн судалгаагаар тогтоогдсоныг ХӨСҮТ мэдээлсэн юм.
Зураг. Коронавирусийн мутацуудын эсрэг акцинуудын үр дүн.
Эх сурвалж:
ХӨСҮТ
ЭМЯ
ДЭМБ
НҮБ-ын Хүүхдийн Сангийн дэмжлэгтэйгээр нягтлав.
