Bayaraa Terbish гэх фэйсбүүк хэрэглэгч “Өнөөдөр гэр бүл бүр 800,000,000 хүртэлх тэтгэлэг авдаг. энэ луйвар биш. Үүнийг авахын тулд сэтгэгдэл дээр “ok” гэж бичээрэй” гэсэн пост оруулсны доор 28 хүн ок гэж бичжээ.
Яг энэ агуулгатай пост өнгөрсөн оны сүүлчээс цахим орчин гарч эхэлсэн бөгөөд Gantul Saran гэх хэрэглэгчийн оруулсан постны доор 109 хүн “Ок” гэж бичжээ.
Factcheck:
Bayaraa Terbish гэх фэйсбүүк хаягаар ороод харвал уг хаяг нь хуурамч хаяг болох нь харагдаж байна. Нэг ч удаа пост оруулаагүй бөгөөд бусад группүүдэд “Танд ХААН банк байгаа бол танд 5,000,000 төгрөгийн санал байна Сайн байна уу гэж хэлээрэй.” гэх мэт постуудыг л оруулжээ.
Gantul Saran мөн “Ок” гэж бичээд мөнгө авахыг санал болгосон постуудыг л нүүр хуудсандаа нийтэлсэн байна.
Цахим луйвар ихсэж байгаа энэ үед иргэд коммент бичихээсээ өмнө тухай постын эзэн нь хуурамч хаяг буюу бот байгаа эсэхийг заавал орж нягталж байхыг зөвлөж байна.
Цахим залилангийн гол агуулга нь урамшуулал амлах, сугалаанд хожих тухай байдаг. Цаад зорилго нь данс, хувийн мэдээллийг нь аваад мэдээлэлд нь нэвтрэн дансыг нь хоослох зорилготой. Тиймээс цахим залиланд өртөхгүй байхын тулд үргэлж нягталж байхыг Factcheck.mn сануулж байна.
