Баянгол дүүргийн Шуурхай штабаас “12 дугаар сарын 01-ний өдрөөс өмнө зөвшөөрөл авсан 15 чиг үүргийн байгууллагуудын зөвхөн байгууллагын нэр дээрх тээврийн хэрэгслүүд QR кодоо дахин хэвлэж авна уу” гэсэн тайлбар болон доорх зургийг нийтэлжээ.
Энэхүү мэдээллийг иргэд зөвхөн байгууллагын нэр дээрх зөвшөөрөл бүхий автомашинуудад дахин хэвлүүлж байгаа нь тэдгээрийг л замын хөдөлгөөнд оролцохыг зөвшөөрч байна гэж ойлгон, бусдад түгээжээ.
Бид энэ мэдээллийг нягталсан юм.
Засгийн газрын 2020 оны 12-р сарын 21-ний өдрийн хуралдаанаар энэ сарын 23-ны 06:00 цагаас эхлэн 2021 оны нэгдүгээр сарын 6-ны 06:00 цаг хүртэл бүх нийтийн бэлэн байдлын хэсэгчилсэн зэрэгт шилжүүлэх шийдвэрийг гаргасан. Энэ хугацаанд нийт 15 салбарын үйл ажиллагааг явуулахаар болж байгаа юм. Тодруулбал, анх удаа тогтоосон бүх нийтийн бэлэн байдлын үеэр ажиллаж байсан зайлшгүй шаардлагатай 13 салбар дээр хүүхэд хамгаалал болон банкны салбарыг нэмэгдүүлсэн.
Хөл хорио тогтоож буйтай холбоотойгоор 12-р сарын 1-нээс өмнө нь зөвшөөрөл авсан машинууд бүгд QR кодоо дахин хэвлэж авах бөгөөд зөвхөн байгууллагын нэр дээрх автомашинууд дахин хэвлэж авна гэдэг нь ташаа мэдээлэл юм байна.
2020.12.22-ы 16:50 минутад нийслэлийн Засаг даргын орлогч Ж.Сандагсүрэнгийн хийсэн шинэ мэдээллээр арванхоёрдугаар сарын 14-нөөс өмнө QR код авсан 23,902 иргэний код маргааш идэвхжих бөгөөд шинээр хэвлэж машиндаа хадах нь. Шинээр QR код авах байгууллагын албан бичгийг үндэслэн зөвшөөрөл олгох юм байна. Хоцорсон хүмүүс байгууллагын хүсэлтээр автомашины дугаараа өгөөд зөвшөөрөл авч болно гэсэн юм.
