Товч агуулга

• Вакцин үхэлд хүргэсэн гэсэн нотолгоо өнөөдрийг хүртэл батлагдаагүй.
• Энэтхэгт нас барсан тохиолдлууд нь вакцинтай ямар ч холбоогүй нь батлагдсан.
• Билл ба Мелинда Гейтс сан Энэтхэг улсаас хөөгдөөгүйг тус улсын Засгийн газар мэдэгдсэн.
• Билл ба Мелинда Гейтс сан Энэтхэгт өнөөдөр ч идэвхтэй үйл ажиллагаа явуулж, эрүүл мэндийн салбарт нь хувь нэмрээ оруулж байна.

Bolormaa Natsagdorj гэх фэйсбүүк хэрэглэгч “Умайн хүзүүний хорт хавдрын эсрэг вакцин туршиж бгаад Гейтсийн сан Энэтхэгээс хөөгдөж бсан юм бна. Сөрөг нөлөөнөөс нь охид амиа алдаж, зарим нь эмгэгтэй болжээ” гэсэн пост нийтэлжээ.

Уг постыг нягталж өгөх хүсэлт ирсний дагуу нягталлаа.

Factcheck:

2007 онд Энэтхэгийн Засгийн газрын Анагаах ухааны судалгааны зөвлөл болон хоёр мужийн засаг захиргаа Хүний папиллома вирусийн эсрэг вакциныг орлого багатай иргэдэд үр ашигтайгаар хүргэх боломжтой эсэхийг судлах төслийн суурийг тавьж байжээ. Олон улсын ашгийн бус PATH байгууллага уг ажлыг шууд хариуцсан байна. Улмаар дархлаажуулалтыг 2009 оноос эхлүүлж, 2010.03 сар гэхэд 10-14 насны 24,000 орчим охидыг вакцинд хамруулжээ. Уг вакциныг Билл, Мелинда Гейтсийн сангаас санхүүжүүлсэн бөгөөд Энэтхэгээс гадна Перу, Уганда, Вьетнам улсад хэрэгжүүлсэн байна.

Гэвч орон нутгийн сонинууд вакцинжуулалттай холбоотой хэд хэдэн хүн нас барсан тухай мэдээлснээр 2009.10 сард олон нийтийн байгууллага, эрүүл мэндийн идэвхтнүүдийн нэгдэл уг төслийг зогсоохыг уриалжээ. Уг эсэргүүцэл улам ширүүссэн тул Засгийн газар нь дархлаажуулалтыг зогсоохыг зөвшөөрсөн байна. Гэхдээ дархлаажуулалтаас болж нас барсан тохиолдол гарсан эсэхийг шалгахыг эмч, судлаачдад үүрэг болгожээ. Ийнхүү 2011.02 сард уг ажлын хэсэг вакцинаас болж нас барсан тохиолдол гараагүй болохыг мэдээлсэн байна. Нэг охин живж амиа алдсан бол шавж устгах бодист хордож, хоёр хүн нас баржээ. Өөр хоёр хүн хумхаа өвчтэй байсан бол нэг нь хорт могойд хатгуулсан гээд нас барсан тохиолдлууд вакцинтай холбоогүй болох нь нотлогдсон байна.

Вакцинууд нь халуурах, толгой өвдөх, ухаан алдах, дотор муухайрах зэрэг гаж нөлөө үзүүлж болох бөгөөд энэ шинж тэмдгүүд богино хугацаанд үргэлжилдгийг CDC тэмдэглэсэн байна.

Гейтсийн санг Энэтхэгээс хөөгдсөн гэсэн мэдээлэл олон улсад тархаж байсан бөгөөд үүнийг Энэтхэгийн Засгийн газраас үгүйсгэжээ. BMGF буюу Билл ба Мелинда Гейтс сан Энэтхэг улсын Эрүүл мэнд, гэр бүлийн халамжийн яамтай хамтран ажиллаж, дэмжсээр байгаа гэдгийг тухайн үед албан ёсоор мэдэгдсэн байна. Өнөөдөр ч тус сан Энэтхэг улсад

Тус сан Энэтхэгт одоо ч идэвхтэй үйл ажиллагаа явуулж байна.

Иймд Bolormaa Natsagdorj -ийн пост олон нийтийг төөрөгдүүлсэн ХУДАЛ мэдээлэл байгаа тул иргэд аливаа мэдээллийг нягтаж, албан ёсны баттай эх сурвалжаас авахыг Factcheck.mn сануулсаар байна.

Нэмэлт мэдээлэл

Монгол Улс 2024.11.25-наас Хүний папилломавирусийн халдварын эсрэг Гардасил вакцинаар 11 настай бүх хүүхдийг товлолын дагуу дархлаажуулж эхэлж байгаа билээ.

Манай улс умайн хүзүүний хорт хавдрын өвчлөлийн түвшнээрээ 2022 оны байдлаар дэлхийн 185 орноос 53-рт эрэмбэлэгдэж, дэлхийн дунджаас 3 дахин, Ази, Номхон далайн баруун бүсийн орнуудын, Зүүн Азийн орнуудын дунджаас 1.5 дахин өндөр байна.

Харин нас баралтын түвшнээр дэлхийн 185 орноос 69-рт эрэмбэлэгдэж дэлхийн дунджаас 1.3 дахин, Ази номхон далайн баруун бүсийн орнууд, Зүүн Азийн орнуудын дунджаас 2 дахин өндөр байна.

2023 онд 425 эмэгтэй энэ халдвараар оношлогдож, 160 эмэгтэй УХХХ-ын шалтгаанаар нас барж байна.

Хавдрын Үндэсний зөвлөлөөс 2012 онд вакцин хийлгэсэн охидыг тандан судлахад ХПВ-ийн эсрэг 3 тун вакцин хийснээс 5, 11 жилийн дараах үр дүн ХПВ-16 хэв шинжийн эсрэг 90%-100% байна.

Эрүүл ахуйн ердийн арга хэмжээ нь ХПВ-ийн халдвар дамжихаас урьдчилан сэргийлэхэд үр дүнгүй болох нь батлагдсан тул вакцин чухал ач холбогдолтой болох нь нотлогдсон.

Эх сурвалжууд:

• ДЭМБ
• АНУ-ын Хүнс болон эмийн агентлаг
• Халдварт өвчин судлал, хяналтын төв
• ХСҮТ
• ХӨСҮТ
• ЭМЯ
• Хавдрын Үндэсний зөвлөл
• Politifact
• Fullfact