Коронавирусийн цар тахлын эсрэг вакцинжуулалтыг ажлыг Монгол Улсын Засгийн газар энэ оны гуравдугаар сараас эхлүүлэхээр төлөвлөж байгаагаа мэдэгдсэн. Тэгвэл Сар шинийн босгон дээр ХХБ-ны гүйцэтгэх захирал О.Орхон банкныхаа 30 жилийн ойг тохиолдуулан дэлхийд үйлдвэрлэгдэж байгаа AtraZeneca болон СпутникV вакциныг 200 мянган тунг ойрын хугацаанд оруулж ирж, харилцагчдаа үнэ төлбөргүйгээр вакцинжуулах ажлыг хийхээр шийдвэрлэснээ дуулгав.
Эдгээр вакциныг Монгол Улсад хийх боломжтой эсэхийг бид нягталлаа.
Дэлхийн хөгжиж буй болон буурай хөгжилтэй орнуудад вакциныг тэгш хүртээх зорилготой COVAX хөтөлбөр Pfizer/BioNTech болон AtraZeneca вакциныг улс орнуудад олгохоор зарласан бөгөөд Монгол Улс 189 орчим мянган тунг авахаар болоод байгаа.
Монгол Улс дархлаажуулалтын тухай хуулийг 2000 онд баталж, мөрдөж ирсэн. Тус хуульд 2010 онд нэмэлт, өөрчлөлт оруулахдаа 17.2-т “Заавал хийх дархлаажуулалтын үндэсний товлолын дагуу 0-15 насны хүүхдэд хийх дархлаажуулах бэлдмэлийг Дэлхийн эрүүл мэндийн байгууллагын гэрчилгээтэй, олон улсад хүлээн зөвшөөрөгдсөн үйлдвэрээс худалдаж авна” гэж заажээ.
Мөн 14 дүгээр зүйл. Дархлаажуулах бэлдмэлд тавих шаардлага гэсэн хэсэгт
14.1. Дархлаажуулалтад өөрийн орон болон гадаад улсад үйлдвэрлэгдсэн албан ёсны зөвшөөрөлтэй дархлаажуулах бэлдмэлийг хэрэглэнэ.
14.2. Эрүүл мэндийн асуудал эрхэлсэн төрийн захиргааны төв байгууллагаас баталсан журмын дагуу дархлаажуулах бэлдмэлийг эмчийн захиалга буюу жороор эмийн сан, эрүүл мэндийн байгууллагаас сайн дурын дархлаажуулалтанд хамрагдах иргэнд олгоно хэмээн заажээ.
10.2. Заавал хийх дархлаажуулалтад хамрагдах сэргийлэх тарилгын нэр төрөлд хийх өөрчлөлтийг Засгийн газрын өргөн мэдүүлснээр Улсын Их Хурал тогтооно.
10.3. Заавал хийх дархлаажуулалтыг Засгийн газраас баталсан үндэсний товлолын дагуу хэрэгжүүлнэ.
Коронавируст халдвар /ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн
7.1.23.цар тахлын үед хүн амыг эрүүл мэндийн тусламж, үйлчилгээ, вакцин, эм, эмнэлгийн хэрэгслээр тэгш хүртээмжтэй хангах гэж тус тус заасан байна.
Монгол Улс одоогийн байдлаар Эмийн бүртгэлдээ Pfizer, Moderna, AstraZeneca компанийн вакцинуудыг 2021 оны нэгдүгээр сарын 10-нд бүртгээд байгаа.
Мөн УИХ одоогоор Монгол Улсад оруулж ирж болох вакцины жагсаалтыг гаргаагүй. Тэгэхээр одоогийн байдлаар ДЭМБ-аас албан ёсоор бүртгээд байгаа Pfizer/BioNTech-ийг иргэдэд тарих боломжтой байна.
Харин СпутникV вакцинаар иргэдийг дархлаажуулах хууль эрх зүйн орчин бүрдээгүй байна. ОХУ-д үйлдвэрлэсэн СпутникV вакцины үр дүн 91.6%-тай байгаа бөгөөд гурван долоо хоногийн зайтай 2 тун тариулах юм. Тус вакциныг 23 улс авах хүсэлтээ илэрхийлсний дотор Монгол Улсын нэр багтсан байна. Манай улс Монгол Эм Импэксээр дамжуулан авахаар ярьж байгаа ч тус вакцинд манай улс зөвшөөрөл өгөөгүй байгаа талаар ЭМЯ мэдээлсэн.
“Одоогоор манай улс 4 төрлийн вакцин оруулж ирэхээр гэрээ хэлэлцээр хийгээд явж байна. Эхний ээлжинд AstraZeneca, Pfizer-ийн вакциныг оруулж ирнэ” гэдгийг Эрүүл мэндийн сайд С.Энхболд мэдэгдээд байна.
