Remdesivir эм COVID-19-ийг нэг өдрийн дотор эдгээсэн талаар фэйсбүүкт @ChinbatM гэх хаягнаас пост оруулжээ.
Уг постод “Вашингтонд нэг монгол хүндрээд түргэнд хандсан. Трампад өгсөн эм хэрэглэх үү, “классик” аргаар эмчлэх үү гэсэн. Трампын эмийг сонгосон. Маргааш нь зүв зүгээр болсон. Би өөрөө ковидтой байсан болохоор энэ тухай эмчээсээ асуусан. үнэн үү гэж. Remdisivir эмийг хэрэглээд коронавирус нэг өдрийн дотор эдгэсэн” гэжээ.
Энэхүү мэдээллийг бид нягталлаа.
Factcheck:
АНУ-ын Ерөнхийлөгч асан Дональд Трамп 2020 оны аравдугаар сарын 2-нд коронавирусийн халдвар авсан бол аравдугаар сарын 12-нд COVID-19-ийн эсрэг дархлаатай болсноо зарласан.
Тэрбээр нийслэл Вашингтоны ойролцоо оршдог Уолтер Рид цэргийн эмнэлэгт гурав хонохдоо Remdesivir болон стеройд гэх даавар хэрэглэснээ мэдээлж байв.
Remdesivir эмийн тухайд COVID-19-ийн халдвартай хүмүүст тус болоогүй болохыг ДЭМБ-ын судалгаагаар тогтоосноо 2020 оны аравдугаар сард мэдээлсэн байна. Нэг шөнө эмчилсэн тухайд вирусийн халдварыг ганцхан шөнийн дотор эдгээх шинжлэх ухааны үндэслэл огт байхгүй гэдгийг доктор Б.Цогтбаатар өмнө тайлбарлаж байв.
Вирусийн халдвар хэд хоногт эдгэх нь тухайн өвчтөний дархлаа, эрүүл мэндийн байдал, хооллолт гэгчлэн олон хүчин зүйлээс шалтгаалдаг байна.
Цар тахлын үед коронавирустэй холбоотой аливаа мэдээллийг заавал нягталж, шалгаж байхыг уншигчдадаа дахин сануулж байна. Учир нь энэ мэт худал мэдээллийг нягтлахгүй хүлээн авах нь танд төдийгүй нийгмийн эрүүл мэндэд хэмжиж баршгүй хохирол учруулах эрсдэлтэйг анхаарна уу.
