Аясаар Аясаар (О.Цэнгэлсайхан) гэх фэйсбүүк хэрэглэгч 2025.02.12-нд “Казакстан. Уран олборлосон бүс нутаг. Хүний мөргүй, үхмэл орчин. Монголчууд!!! ҮҮНИЙГ ХЭРХЭВЧ ЗӨВШӨӨРЧ БОЛОХГҮЙ …” гэсэн гарчигтай видеог постолжээ.
6.5К хүн шэйрлэсэн энэхүү бичлэгийг бид нягталлаа.
Factcheck:
Google хайлтаар уг бичлэгийн хэсгийг хайж үзвэл 2023.03.04-нд Esen Media хэмээх youtube сувагт нэрээрээ тамгалж бичлэгийг хуваалцсан байна.
Уг суваг нь казах соёл, уламжлалын талаарх контентыг түгээдэг бөгөөд дээрх бичлэгийг оруулахдаа “Бидний зүрх сэтгэл үхэшгүй. Худал хуурмагийн тайтгарлыг харж байна. Толгой дээр чинь унах аз жаргалын цас, Энэ нь биелэх болно, хэзээ нэгэн цагт чи аз жаргалтай байх болно” гэсэн мөртийг казах хэлээр бичиж оруулжээ.
Харин Yandex хэрэгслийг ашиглан шалгавал 2023.01.08-ны өдөр Оросын сошиал медиа суваг болох VK-д Казахстаны мэдээллийн Lada.kz сайтаас уг бичлэгийг хуваалцсан байна.
Тус сайт уг бичлэгийг өөрийн инстаграм хуудаст 2023.01.03-нд нийтэлсэн бөгөөд тайлбартаа бичлэг дээрх газрыг 1898 онд Каспийн тэнгисийн зүүн эрэгт загас агнуур, далайн хавын үйлдвэрлэл явуулах зорилгоор байгуулсан, Караган гэдэг нэртэй жижиг суурин болохыг бичсэн байна. 1930 онд тус сууринд загасчдын артель байгуулагдаж байсан бол 1963 онд хамтын фермүүд хаагдаж, загасчид нүүж, суурин эзгүй хоосорсон талаар бичжээ.
Тиймээс Аясаар Аясаар (О.Цэнгэлсайхан) гэх фэйсбүүк хэрэглэгчийн “Казакстан. Уран олборлосон бүс нутаг. Хүний мөргүй, үхмэл орчин. Монголчууд!!! ҮҮНИЙГ ХЭРХЭВЧ ЗӨВШӨӨРЧ БОЛОХГҮЙ …” гэх мэдээлэл нь батлагдсангүй.
Эх сурвалжууд:
- Yandex
- Youtube
- VK
- Lada.kz
