Товч агуулга

• Умайн хүзүүний хорт хавдрын нийт тохиолдлын 60 хувь нь Ази тив бүртгэгддэг.
• Монгол Улс умайн хүзүүний хорт хавдрын өвчлөлөөр Азидаа 4, хавдрын шалтгаант үхлийн тохиолдлоор 5-д бичигджээ.
• Манай улс 100,000 хүн тутамд умайн хүзүүний хорт хавдрын 20.2 тохиолдлоор дэлхийд 53-т бичигдсэн байна.
• Эдгээр нь дээрх өвчлөл анхаарал татах хэмжээнд байгааг илтгэж байна.

Tserenkhuu Ishtseden гэх фэйсбүүк хэрэглэгч 2024.11.19-нд

“Дэлхийн улс орнуудын 100к хүн тутамд ноогдох умайн хорт хавдарын жагсаалтыг олж үзлээ Эхний 50д л лав МОНГОЛ УЛС алга Яахав дээ бас 1юмаар ч гэсэн анхаарал татсан орон биш л юм байна” гэсэн пост оруулжээ.

Уг постыг нягталлаа.

Factcheck:

Умайн хүзүүний хорт хавдрын нийт тохиолдлын 60 хувийг Ази тив эзэлдэг бол Ази тивдээ Монгол Улс дөрөвдүгээрт бичигдэж байгаа нь бахархах үзүүлэлт огт биш байна.

Тодруулбал, 2022 оны байдлаар дэлхий даяар умайн хүзүүний хорт хавдрын 662,301 тохиолдол бүтгэгдсэнээс 60 хувь нь буюу 397,082 нь Азид бүртгэгдсэн байна. Харин Азийн орнуудаас Монгол Улс 100,000 хүн тутамд ноогдох хавдрын тохиолдлоор 4-т, хавдрын шалтгаант үхлийн тохиолдлоор 5-д бичигджээ.

ДЭМБ-ын Хорт хавдрын судалгааны Олон улсын агентлагаас гаргадаг хорт хавдрын ажиглалтын жагсаалтыг 2022 оны байдлаар гаргасан бөгөөд Монгол Улс 100,000 хүн тутамд умайн хүзүүний хорт хавдрын 20.2 тохиолдлоор дэлхийд 53-т бичигдсэн байна.

Харин Азийн орнуудаас Монгол Улс 100,000 хүн тутамд ноогдох хавдрын тохиолдлоор 4-т, хавдрын шалтгаант үхлийн  тохиолдлоор 5-д бичигдсэн нь Азидаа тэргүүлж байгаа орнуудын нэг байна.

Иймд Tserenkhuu Ishtseden-ийн нийтэлсэн пост дахь дээрх агуулга олон нийтийг ТӨӨРӨГДҮҮЛСЭН байна.

Эрүүл мэндтэй холбоотой аливаа мэдээллийг албан ёсны, баталгаатай эх сурвалжаас авч, үргэлж нягталж байхыг Factcheck.mn сануулсаар байгаа билээ.

Эх сурвалжууд:

• ДЭМБ
• Хорт хавдрын судалгааны Олон улсын агентлаг
• ЭМЯ
• ХӨСҮТ