Товч агуулга
- Нигер улсын Сомаир уурхай 50-60 метрийн гүнээс ураныг ил аргаар олборлодог бөгөөд агуулга нь дунджаар нэг тонн тутамд 2.8 кг байдаг бол Казахстаны КАТКО газар доор уусган олборлох технологи ашиглан 400-500 метрийн гүнээс тонн хүдэр тутамд 0.8 кг уран олборлодог.
- Дорноговь дахь Зөөвч-Овоо уурхай 170-200 метрийн гүнээс уусган олборлох аргаар уран олборлох ба нэг тонн хүдэрт дунджаар 0.2 кг уран агуулагддаг байна.
- Өдгөө дэлхий дээр олборлож байгаа нийт ураны 70% орчмыг ГДУО аргаар гарган авч байна.
- Газар доор уусган олборлох технологи нь газар дээр ил овоолго шороо гаргахгүй, хөрс хөндөж, бохирдол үүсгэдэггүй гэдгээрээ байгаль орчинд хор багатай аргад тооцогддог.
Цогбадрахын Болор-Эрдэнэ гэх фэйсбүүк хэрэглэгч 2025.01.02-ны өдөр “Ураны хүдрийн агууламжаас хамаарч 100тн шорооноос ердөө 1% ураныг ялган авдаг ба 99% нь цацраг овоолого хаягдал болж үлддэг” гэсэн пост оруулжээ.
Энэхүү мэдээллийг нягталж өгөх хүсэлт ирсний дагуу нягталлаа.
Factcheck:
Монгол Улсын Засгийн газартай хамтран уран олборлох төсөл хэрэгжүүлэх гэж буй “Орано майнинг” группийн үйл ажиллагаа явуулдаг уурхайнуудын ураны агуулгын талаарх мэдээллийг шалгалаа.
Нигер улсын Сомаир уурхайд газрын хөрснөөс 50-60 метрийн гүнээс ураныг ил аргаар олборлодог бөгөөд агуулга нь дунджаар нэг тонн тутамд 2.8 кг уран байдаг байна.
Коминакийн уурхай нь гүний уурхай бөгөөд нэг тонн хүдэр дэх ураны агууламж нь 3.15 кг аж.
Казахстан улс дахь КАТКО уурхай газар доор уусган олборлох технологи ашиглан 400-500 метрийн гүнээс уран олборлодог. Тус уурхайн ураны агууламж тонн хүдэр тутамд 0.8 кг ажээ.
Канад улс дахь MакАртур Риверийн Ки Лейкийн уурхай бүр 600 метрийн гүнээс уран олборлодог бөгөөд тонн хүдэр дэх ураны агуулга 82 кг байна.
Сигар Лейк уурхай мөн 450 метрийн гүнээс уран олборлодог ба нэг тонн хүдрээс дунджаар 126 кг уран гарган авдаг ажээ.
Харин Дорноговь аймгийн Улаанбадрах суман дахь Зөөвч-Овоо уурхайд 170-200 метрийн гүнээс уран олборлох гэж буй. Тус ордын ураны агуулга нэг тонн хүдэрт дунджаар 0.2 кг ажээ.
Тус төсвийн хувьд “Бадрах Энержи” компани газар доор уусган олборлох буюу дэлхийн нийт ураны 70 орчим хувийг олборлож буй, байгаль орчинд хамгийн сөрөг нөлөө багатай технологи ашиглан олборлолт явуулах юм.
Өөрөөр хэлбэл, нэг литр тутамд 1 мг хүхрийн хүчил хольсон уусмалыг газрын гүн рүү тусгайлан гаргасан, үл нэвчих цооногоор шахаж, ураны хүдрээс ураныг уусган буцаан соруулж авах битүү цикль ашиглан олборлох юм. Тиймээс газар дээр ил овоолго шороо гаргахгүй, хөрс хөндөж, бохирдол үүсгэхгүй юм.
Тиймээс Цогбадрахын Болор-Эрдэнэ гэх фэйсбүүк хэрэглэгчийн оруулсан пост дахь агуулга олон нийтийг ТӨӨРӨГДҮҮЛСЭН ташаа мэдээлэл байна.
Эх сурвалж:
- Дэлхийн цөмийн ассоциац
- “Орано Майнинг” групп
- “Бадрах Энержи” ХХК
