Товч агуулга:
- SoCheck нь эмнэлгийн бүтээгдэхүүн биш гэдгээ өөрийн сайтдаа албан ёсоор анхааруулсан.
- Цус, шээсний шинжилгээнээс ялгаатай нь эмнэлзүйн ач холбогдолтой түвшинг тодорхойлох стандарт биш гэдгийг мэргэжилтнүүд хэлж байна.
- SoCheck нь АНУ-ын Хүнс, эмийн агентлагт бүртгэлгүй байна.
- Энэ талаарх хэвлэгдсэн, бие даасан баталгаажуулалтын судалгаа мөн дутмаг байна.
- Эмнэл зүйд ашиглах шинжилгээний хариуг гаргаж өгдөггүйг анагаах ухааны доктор О.Зэсэмдорж хэллээ.
Factcheck:
Франц улсад үйлдвэрлэсэн энэхүү бүтээгдэхүүн нь боломжит хүнд металлын илүүдэл, эрдэс бодис, элемент, витамин болон исэлдэлтийн стрессийн биологийн хүртээмжийн бодит үнэлгээг хийдэг гэжээ. Гэхдээ тус бүтээгдэхүүний албан ёсны вэбсайтын доорх хэсэгт
“SoCheck нь эмнэлгийн бүтээгдэхүүн биш, харин хүн бүр эрүүл мэнд, сайн сайхан байдлыг сайжруулах боломжийг олгодог амьдралын хэв маягийн бүтээгдэхүүн юм. Манай хамтрагч лабораторийн өгсөн мэдээлэл болон санал болгож буй пробиотик (зохицуулалтад нийцсэн хүнсний нэмэлт бүтээгдэхүүн) нь эмнэлгийн болон дунд шатлалын эмнэлгийн зөвлөгөө, хяналт, эмчилгээг орлохгүй” хэмээн анхааруулжээ.
Мөн “Өгөгдсөн программ хангамж нь эмнэлгийн зориулалтгүй. Ямар ч тохиолдолд эмнэлгийн, булчингийн тогтолцооны оношилгоонд эмч, эрүүл мэндийн туслах, мэс засалчийг орлож чадахгүй… Өгөгдсөн үнэлгээ нь биологийн хувьд төвлөрсөн биш юм. Иймээс эдгээр программ хангамжууд нь эмчилгээ хийх зорилготой биш, зөвхөн нэмэлт, нэгдмэл арга замаар амьдралын чанар, эрүүл мэндийг дэмжих эмнэлгийн болон эмнэлгийн тусламж үйлчилгээний нэмэлт хэрэгсэл болгон ашиглахад зориулагдсан” гэжээ.
Зөвхөн Франц бус Хятад, Солонгос, Америк зэрэг орны энэ төрлийн бүтээгдэхүүнүүд байдаг бөгөөд манай улсад Францын бүтээгдэхүүний талаарх пост илүү түгээмэл байгаа юм.
Энэхүү бүтээгдэхүүний талаар эмч, хуульч, технологийн туслагч, механикч, малын эмч, гэрийн засварын мэргэжилтнүүд гэх мэт 12,000 гаруй баталгаажсан мэргэжилтнүүд иргэдэд цаг үл харгалзан тусалдаг цахим платформ болох justanswer сайтад “Энэхүү системүүд нь … гадаргуугийн түвшний хүнд металлын хордлогын зохистой хэмжээг шалгаж өгдөг. Гэсэн хэдий ч эдгээр нь цус, шээсний шинжилгээнээс ялгаатай нь эмнэлзүйн ач холбогдолтой түвшинг тодорхойлох стандарт биш” гэсэн хариултыг өгсөн байна.
SoCheck нь АНУ-ын Хүнс, эмийн агентлагт бүртгэлгүй байдаг юм байна. Тус агентлаг нь Нийгмийн эрүүл мэндийн хүрээнд шинээр гарч байгаа эрүүл мэнд, биологийн бүтээгдэхүүнүүдийг хэрэглэхийг зөвшөөрч, бүртгэдэг байна.
Мөн Европын эмийн агентлагаас оношилгооны стандарт төхөөрөмж гэж үзсэн мэдээлэл байхгүй байна.
Энэ талаарх хэвлэгдсэн, бие даасан баталгаажуулалтын судалгаа мөн дутмаг байна.
Бид энэ тухай АШУҮИС-ийн Эмнэлзүйн лабораторийн тэнхимийн эрхлэгч, Монгол-Японы эмнэлгийн Эмнэлзүйн төв лабораторийн эрхлэгч, анагаах ухааны доктор О.Зэсэмдоржоос тодрууллаа. Тэрбээр “So/Check (Oligo/Check), OligoScan, Квант скан гэх мэт төхөөрөмжүүд нь арьсны фотометрийн (spectrophotometry) скан технологийг ашиглан микроэлемент, витамин, хүнд металл, исэлдэлтийн стресс зэрэг үзүүлэлтүүдийг өвдөлтгүйгээр, шууд хэмжих боломжтой гэж сурталчилдаг. Гэвч эдгээр төхөөрөмжөөр гарсан үр дүнг эмнэлзүйн оношилгооны баталгаатай нотолгоо гэж үзэх боломжгүй юм.
Уг анхааруулгыг үл тоон зарим байгууллага болон хувь хүмүүс эдгээрийн үр дүнг ашиглан хүний биед витамин дутагдсан гэх дүгнэлт хийж, эмнэлзүйн зөвлөгөө өгөх, цаашлаад нэмэлт бүтээгдэхүүн хэрэглэхийг зөвлөх, бүтээгдэхүүн худалдах зэрэг үйл ажиллагаа явуулж байгаа нь буруу үйлдэл” гэдгийг хэллээ.
Түүнчлэн оношилгооны зорилгоор ашиглагддаг урвалж, тоног төхөөрөмж, программ хангамж нь IVD (In Vitro Diagnostic) буюу in vitro оношилгооны бүтээгдэхүүнд хамаардаг бөгөөд өвчнийг оношлох, хянах, урьдчилан сэргийлэх зорилготойгоор ашиглагдах тул холбогдох албан ёсны зохицуулах байгууллагаас заавал зөвшөөрөл авах шаардлагатай байдгийг доктор О.Зэсэмдорж нэмж хэлээд цаашид ийм төрлийн баталгаагүй “квант скан оношилгоо” болон “зөвлөгөө”-нд хууртахгүй, бусдыг ч хуурахгүй байхыг сэрэмжлүүлэв.
Сүүлийн үед “Эрдсийн шинжилгээ 50 хувь хямдарлаа, So Check” гэсэн агуулгатай пост олон нийтийн сүлжээгээр ихээр явах болсон. Тухайлбал, Франц улсын 𝐒𝐨 𝐂𝐡𝐞𝐜𝐤, Америк улсын шинжилгээний дэвшилтэд технологи болох 🔬6D аппаратаар үздэг эрдсийн шинжилгээ авч байна гэсэн гэх мэтээр зарууд хөврөөд байгаа юм.
Хүний эрүүл мэндтэй холбоотой аливаа мэдээлэл, сурталчилгаанд хэрсүү хандаж, мэдээллийг албан ёсны баталгаатай эх сурвалжаар заавал баталгаажуулж, нягталж байхыг Factcheck.mn сануулж байна.
Эх сурвалжууд:
- So-Check
- FDA
- EMA
- АШУҮИС
- Justanswer
