Zanaa Jurmed гэх фэйсбүүк хэрэглэгч 2021.12.09-нд “ХАРВАРДЫН ШИНЭ СУДАЛГААГААР ХҮНИЙ ӨӨРИЙН УНАГАН ДАРХЛАА К ИЙН ЯМАР Ч ВАКНААС ИЛҮҮ ХАМГААЛЖ ЧАДАЖ БАЙГААГ ТОГТООЖЭЭ!!!
БИ ӨӨР ДЭЭРЭЭ 3 ЖИЛ ТУРШСАН ХҮН УЧРААС ЭНЭ СУДАЛГАА БАТАЛГААТАЙ ГЭЖ БАТАЛЖ БАЙНА!!!!! ҮНЭН ЯЛДАГ ЮМ ШДД, ЭМЯ АААААА!!!!!!!!!!!!” гэсэн постыг оруулжээ.
Түүний оруулсан пост дээрх зураг нь “New Harward study shows natural immunity is better than the COVID V@CC1n3” гэсэн гарчиг бүхий Health Secret гэсэн логотой зургийг хамт нийтэлсэн байна.
Энэхүү мэдээллийг нягталлаа.
Factcheck 1:
Зураг дээрх гарчгийн текст дээр vaccine гэдэг үгийг V@CC1n3 хэмээн тэмдэгт оруулж бичсэн нь уг мэдээлэл баталгаагүй болохыг нотолж буй хамгийн эхний үзүүлэлт болж байна.
Мөн Health Secret гэсэн хайлтаар хэмээх ижил логотой сайтад хандаж үзэхэд нийтлэлүүд болон видео үзэх гэсэн хоёр л сонголтоос хүссэн мэдээллээ хайх боломжгүй байна. Тухайн сайт нь 2020 оноос үйл ажиллагаа явуулж эхэлсэн бөгөөд эрүүл мэндийн мэдээлэл зөвлөгөө, эмчилгээний талаар мэдээлэл хүргэхдээ нөхцөл байдалдаа тулгуурлан эмч болон бусад мэргэжилтнээс үргэлж зөвлөгөө авахыг сануулсан байна.
Factcheck 2:
Харвардын их сургуулийн Нийгмийн эрүүл мэндийн сургуулийн 2021.12.08-ны өдөр танилцуулсан шинэ судалгаагаар Pfizer вакцины бүүстер тун коронавирусийн Дельта хувилбарын эсрэг өндөр үр дүнтэй байгаа нь тогтоогджээ. Омикрон хувилбарын эсрэг мөн үр дүнтэй байгаа ба хэдэн хувь хамгаалахыг хараахан тогтоогоогүй байгааг дурдсан байна.
Харин байгалийн буюу халдварын дараах дархлааны талаар 2021.11.27-нд танилцуулсан судалгаанд өгүүлжээ. Тархвар судлаач профессор Уильяам Ханааж “Коронавирусийн Омикрон хувилбарын талаар бидэнд мэдэхгүй зүйл олон байна, тухайлбал халдварлах байдал, вакцинаар үүсгэгдсэн дархлаа эсвэл халдварын дараах дархлаанаас зайлсхийх байдал зэрэг нь тодорхойгүй байна” гэдгийг дурджээ.
Харвардын сургуулийн мэргэжилтнүүдийн судалгаанд коронавирусийн халдварт хүний өөрийн дархлаа нь вакцинаас илүү үр дүнтэй хамгаалалт болж байгаа эсэх талаар мэдээлэл байсангүй.
Тиймээс дээрх мэдээлэл нь иргэдийг төөрөгдүүлсэн, ХУДАЛ мэдээлэл байна.
Коронавирусийн халдварын энэ үед вакцинтай холбоотой аливаа мэдээллийг албаны, баталгаатай эх сурвалжаас авч, үргэлж нягталж байхыг FactCheck.mn зөвлөсөөр байна.
Эх сурвалжууд:
НҮБ-ын Хүүхдийн Сангийн дэмжлэгтэйгээр, АШУҮИС-ийн Дархлаа судлалын тэнхимийн ахлах багш, эмнэл зүйн дархлаа судлаач эмч, Анагаах ухааны доктор Т.Хонгорзултай хамтран бэлтгэв.
