Товч агуулга
- Дорноговь аймгийн гүний ус байгалиасаа эрдэсжилт ихтэй нь тогтоогдсон.
- Зөөвч-Овоо төслийн эргэн тойрны хөрс болон усалгаанд ашигладаг 18 худгийн усыг шинжлэхэд хөрс, ургамал, малын мах, сүүний дээжид хортой био идэвхт металл хүн, малын эрүүл мэндэд сөрөг нөлөө үзүүлэхүйц хэмжээгээр илрээгүй.
- Тухайн газар нутгийн хөрс болон байгаль экологийн тогтолцоо бохирдоогүй.
Цөмийн энергийн тухай хуульд нэмэлт, өөрчлөлт оруулах тухай УИХ-аар хэлэлцэх үеэр уран олборлохтой холбоотой зарим мэдээлэл олон нийтийн дунд эргэлзээ төрүүлээд буй. Тэдгээр мэдээллээс бид нягталлаа.
“Ураны хайгуул ба туршилтын олборлолт малчдын худгуудын усны чанарыг муутгасан. Малчид цэвэр усаа холоос авч байна”.
Factcheck:
Дорноговь аймгийн Улаанбадрах сумын нутаг, Зөөвч-Овоо ордод 1996 оноос хойш хайгуулын ажил хийж, 2013 онд ураны ордын нөөцийг албажуулан бүртгүүлсэн байдаг. Улмаар 2021-2023 онд Зөөвч-Овоо ордод газар доор уусган олборлох үйлдвэрлэлийн туршилтыг амжилттай гүйцэтгэж, үр дүнгээ танилцуулсан. Үүнээс өмнө 2011 онд газар доор хүхрийн хүчлийн сулруулсан уусмалаар уусгалт хийх технологиийн туршилт явуулсан байдаг.
30 орчим жилийн энэ хугацаанд Засгийг газраас гурван ч удаа Ажлын хэсэг байгуулж, “Бадрах Энержи” компанийн үйл ажиллагаанаас байгаль орчин, хүн, малын эрүүл мэндэд ямар нэгэн нөлөөлөл үзүүлж буй эсэхийг шалгаж байв.
Эндээс 2020 онд байгуулсан Ажлын хэсэг 2011 онд явуулсан туршилтаас ус, хөрсөнд ямар нэг нөлөөлөл үүссэн эсэхийг тогтоохоос гадна ерөнхийдөө тухайн бүс нутгийн хөрс, усны суурь нөхцөл ямар байгааг тогтоох зорилгоор ажилласан байдаг. Ингэхдээ дээжийг шинжилгээний олон лабораторид хийсэн бөгөөд Дорноговь аймгийн гүний ус байгалиасаа эрдэсжилт ихтэй нь тогтоогдсон байдаг. Мөн хүхрийн хүчлийн сулруулсан уусмалаар газрын доорх ус бохирдсон гэсэн үндэслэл тогтоогдоогүй болохыг нийтэд мэдээлж байв.
Мөн Засгийн газраас үүрэг болгосны дагуу ШУА-ийн Ажлыг хэсгийн гишүүд 2021.07.21-25-нд “Бадрах Энержи” компанийн үйлдвэрлэлийн талбайд ирж төсөл хэрэгжиж буй газрын хөрснөөс 62 дээж авч шинжлэх, иргэдийн унд болон малын усалгаанд ашигладаг 18 худгийг хамруулан усны судалгаа хийсэн байдаг.
Судалгаагаар олборлолт хийхээр төлөвлөж буй талбайн хөрс, ургамал, малын мах, сүүний дээжид хортой био идэвхт металл хүн, малын эрүүл мэндэд сөрөг нөлөө үзүүлэхүйц хэмжээгээр илрээгүй.
Тухайн газар нутгийн хөрс болон байгаль экологийн тогтолцоо бохирдоогүй. Хүн, малын ундны усны худгуудын усанд фтор, хүнцэл, ураны агуулга байгалиасаа өндөр, ундны усны стандартын шаардлагыг хангадаггүй гэж үзсэн байна.
Тиймээс ураны хайгуул судалгаа усны чанарыг муутгасан нь үндэслэлгүй байна. Үүнийг “Бадрах Энержи” компанийн үйл ажиллагаанд Засгийн газраас гурван удаа байгуулсан Ажлын хэсгийн шалгалтын дүн нотолж байна.
Иймд ураны хайгуул усны чанарыг муутгасан гэдэг нь нотлогдохгүй, ТАШАА мэдээлэл байна.
Эх сурвалжууд:
- Шинжлэх Ухааны Академи
- Засгийн газрын Ажлын хэсгийн мэдээлэл
- Мэргэжлийн Хяналтын Ерөнхий газрын мэдээлэл
- iKon.mn
- Arslan.mn
