Амарсанаа Лодойсамбуу гэх фэйсбүүк хэрэглэгч КОВИД-19-ийг цар тахал биш, ганц өдөрт эдгэдэг өвчин гэсэн агуулга бүхий постыг 2021.06.16-нд оруулжээ.
Уг постыг 2020 оны тавдугаар сард олон нийтийн сүлжээнд иргэд түгээснийг FactCheck.mn нягтлан хүргэж байсан билээ. Гэвч ийнхүү жилийн дараа дахин постолсныг 6К хүн шэйрлэж, 436 хүн лайк дарж, 30 хүн коммент бичсэн нь иргэд аливаа мэдээллийг нягтлахгүйгээр хүлээн авч байгааг илтгэж байна.
Иймд уг агуулгыг Factcheck.mn UNICEF-ийн Эрүүл мэндийн ахлах зөвлөх, доктор Б.Цогтбаатартай хамтран нягталснаа дахин хүргэе.
Уг постод “Италийн эмч Джем Джамиль Ахмед маш чухал туршилт хийж Ковид-19-ийн жинхэнэ дүр төрхийг ил болгожээ.
Энэ бол тахал биш цусны судсанд нэвчин орж огцом хүндрэл өгдөг энгийн сүрьеэ өвчний вирус байжээ. үүнийг ердөө 2000 төгрөгөөр ганцхан шөнө эмчилнэ гэвэл итгэх үү. Тэгвэл энэ хүн Америкт нэгэн гэр бүлийг саяхан ганц шөнө эмчлээд өглөө шалгахад эв эрүүл болсон байжээ.
Энэ нь ердөө 500 мг 3-хан ширхэг Аспиринийг уулгаж, Лимоны жүүс зөгийн балтай хольж халаагаад даруулга болгон өгөөд гүйцээ. Кроно баяртай. Энгийн амьдрал эхэллээ” гэсэн нь бүгд үндэслэлгүй байна.
Factcheck:
Сүрьеэ өвчин бикробактериар үүсгэгддэг бол COVID-19 нь вирусийн халдвар.
Вирусийн халдварыг ганцхан шөнийн дотор эдгээх шинжлэх ухааны үндэслэл огт байхгүй.
Энэхүү хоёр өвчний эмгэг жам, шинж тэмдэг өөр бөгөөд хэд хоногт эдгэх нь тухайн өвчтөний дархлаа, эрүүл мэндийн байдал, хооллолт гэгчлэн олон хүчин зүйлээс шалтгаална.
Тиймээс элдэв хуурамч зөвлөгөөг туршихын оронд ахуйн ариун цэврийг сахиж, халдвар хамгааллын дэглэмийг мөрдөн, амны хаалтаа зүүж, гэртээ амар тайван байх нь үр дүнтэй болохыг зөвлөж байна.
КОВИД-19 цар тахлын тухайд халдвараас сэргийлэх хамгийн сайн арга нь вакцин болохыг мэргэжилтнүүд хэлж байгаа. Гэхдээ энэ нь 100% өвчнөөс хамгаална гэсэн үг биш, хүндрэл, үхлээс сэргийлэх юм. Тиймээс вакцин хийлгэсэн ч вирусийн халдвар авч, түүнийгээ бусдад тараах эрсдэлтэй тул амны хаалтаа тогтмол зүүж, олон хүн цугласан газарт очихгүй байж, ариун цэврээ сахих зэрэг халдвар хамгааллын алтан дэглэмээ сахисаар байх шаардлагатай эмч, мэргэжилтнүүд анхааруулж байна.
НҮБ-ын Хүүхдийн Сангийн дэмжлэгтэйгээр нягтлав.
