Dulamjav Erdenechuluun гэх фэйсбүүк хэрэглэгч “Германд гадаа мааск зүүчихсэн хүн нэг ч байхгүй. Манайхан сүүлийн 2 жил гадаа доторгүй мааскнаас салалгүй байсаар хятад вакцин хийлгэсэн бүх хүмүүс өвчлөөд байхад 3 дах тун гэх юм.
Германд 3 тунгийн сураг ч алга. Ахан дүүс 3 тун битгий хийлгээрэй. Монголчуудыг туршилтанд оруулж байна” гэсэн постыг 2021.10.30-нд нийтэлжээ.
Factcheck:
Монгол Улс дахь КОВИД-19 цар тахлын нөхцөл байдлаар Үндэсний статистикийн хороо ХӨСҮТ-ийн тоон мэдээлэлд үндэслэн хийсэн судалгаагаар 2021.08.31-ний байдлаар нийт батлагдсан тохиолдлуудын 60.4 хувь нь аль нэг төрлийн вакцины нэг болон хоёр тунд хамрагдсаны дараа өвчилсөн байна. Тодруулбал, өвчилсөн иргэдийн 6.8 хувь нь нэгдүгээр тунд хамрагдсаны дараа, 53.6 хувь нь бүрэн тунд хамрагдсаны дараа өвчилсөн байна.
Үүнийг вакцины төрлөөр нь ялгаж харуулснаас үзвэл АстраЗенека хийлгэсэн хүмүүсийн 10, Спутник хийлгэсэн хүмүүсийн 9.7 хувь нь халдвар авсан бол Синофарм үйлдвэрийн Вероселл буюу хятад вакцин хийлгэсэн хүмүүсийн 5.6, Файзер хийлгэсэн хүмүүсийн 3.9 хувь нь халдварт өртжээ.
Тиймээс хятад вакцин хийлгэсэн хүн бүхэн өвчилсөн гэдэг нь үндэслэлгүй байна.
ХБНГУ-ын Вакцинжуулалтын хороо(STIKO) 70-аас дээш насны иргэдээ коронавирусийн эсрэг бүүстер буюу гуравдугаар тунд хамрагдахыг зөвлөсөн талаар тус улсын Deutsche Welle мэдээллийн агентлаг 2021.10.07-нд мэдээлсэн байна.
Тиймээс Dulamjav Erdenechuluun гэх иргэн олон нийтийн сүлжээнд ташаа мэдээлэл түгээж, иргэдийг төөрөгдүүлсэн байна.
Цар тахлын энэ үед аливаа мэдээллийг баттай эх сурвалжаас авч, үргэлж нягталж байхыг FactCheck.mn сануулсаар байгаа билээ.
Эх сурвалжууд:
ХӨСҮТ
https://1212.mn/BookLibraryDownload.ashx?url=2021%20VIII%20rev.pd
https://www.dw.com/en/germany-recommends-booster-shots-for-over-70s/a-59440188
НҮБ-ын Хүүхдийн Сангийн дэмжлэгтэй нягтлав.
