Товч агуулга
- АНУ-ын ерөнхийлөгчийн сонгуульд нэр дэвшигч Бага Роберт Кеннеди ОХУ-Украины дайныг Вашингтоны неоконууд 10 жилийн турш бэлтгэж өдөөн хатгасан гэж мэдэгдсэн нь худал.
- Украинчууд Донбассын 14 мянган оросуудыг хөнөөсөн гэдэг нь худал бөгөөд дайны үеэр нийт амь үрэгдсэн хүмүүсийн тоо нь 14 мянга орчим байна.
Bayarsaikhan Tse нэртэй фэйсбүүк хэрэглэгч “АНУ-ын ерөнхийлөгчийн сонгуульд нэр дэвшигч Роберт Кеннеди бага: Биднийг Украинд хүмүүнлэгийн зорилгоор ирсэн гэсэн үлгэр ярьж байгаа ч засгийн газрыг нь унагаж, оросуудыг л сулруулах зорилготой байсан. Украины ард түмэн геополитикийн зорилгоос шалтгаалж хоёр их гүрний хооронд болж буй дайны золиос боллоо. Дайны шалтгаан, бидний хариу үйлдэл бол Путины түрэмгийллийн эсрэг гэж бидэд ухуулж байгаа ч энэ дайныг Вашингтоны неоконууд 10 жилийн турш бэлтгэж, өдөөн хатгасан.
Украйны засгийн газар Донбассын 14 мянган оросуудыг хөнөөсөн. Хэрэв Мексик яг ингэж Украйн шиг авирлаж эх орондоо бгаа америкчуудыг хороож эхэлвэл АНУ ердөө нэг секундын дараа тийшээ халдан довтлох байсан да. Бид өөрсдийгөө тэдний оронд тавьж үзэх хэрэгтэй…” гэсэн мэдээллийг оруулжээ.
Уг мэдээллийг нягтлах хүсэлт ирсний дагуу нягталлаа.
Factcheck:
2023 оны зургадугаар сарын 22-ны өдөр тухайн үед АНУ-ын ерөнхийлөгчийн сонгуульд нэр дэвшиж байсан Бага Роберт Кеннеди олон улсын нөхцөл байдал, эдийн засаг, вакцин зэрэг асуудлаар өөрийн байр суурийг илэрхийлснийг ABC news нийтэлжээ.
Тэрбээр, ОХУ-ын харгис хэрцгий, цуст түрэмгийллийг жигшин зэвүүцэж байгаа хэдий ч 1990 оноос хойш АНУ ОХУ-ыг удаа дараа өдөөн хатгасан нь өнөөдрийн нөхцөл байдалд хүрэхэд нөлөөлсөн гэжээ. Мөн АНУ гадаад бодлогыг шууд чиглүүлж, дэлхийн хэмжээнд өөрийн гэсэн үзэл баримтлалыг дэвшүүлж, Украины дайныг АНУ-ын зүгээс “гадаадын ноёрхлын цуцашгүй сэтгэлгээг бий болгосон” гэж нэрлэж, барууныхныг буруутгасан байна. Гэхдээ АНУ болон ОХУ-ын хоорондын дайны золиос нь украинчууд гэсэн агуулгыг хэлээгүй байна.
Мөн News Nation-д дурдсанаар АНУ, НАТО-ийн олон арван жилийн турш Украин, ОХУ-ын талаар баримталж ирсэн бодлогыг дайны нөхцөл бүрдүүлсэн гэдгийг онцолжээ.
Bayarsaikhan Tse нэртэй фэйсбүүк хэрэглэгчийн мэдээлэлд дурдсан Украин Донбассын 14 мянган оросыг устгасан гэсэн мэдээллийг Бага Жон Кеннеди хэлээгүй бөгөөд энэ мэдээллийг нягталж үзэхэд International Crisis Group-ийн мэдээлснээр https://www.crisisgroup.org/content/conflict-ukraines-donbas-visual-explainer)2014 онд эхэлсэн Зүүн Украин дахь зэвсэгт мөргөлдөөнд 2022 он хүртэл 14 мянга гаруй хүн амиа алдсан талаар дурджээ. Найман жилийн хугацаанд Украины засгийн газрын арми Оросын дэмжлэгтэй салан тусгаарлагчидтай Донбасс гэгддэг Донецк, Луганск зэрэг аж үйлдвэржсэн хоёр бүс нутгийн ихэнх хэсгийг хяналтдаа авахын тулд тулалдаж байсан бөгөөд 2014-2015 оны ширүүн тулалдаанууд тус бүс нутгийн гуравны нэг буюу хамгийн их хотжсон хэсгийг ОХУ-ын итгэмжлэгдсэн хоёр муж буюу өөрсдийгөө Бүгд Найрамдах Донецк, Луганск Ард Улсууд эзэлж авснаар өндөрлөсөн гэсэн байна.
Амиа алдсан 14 мянган хүний 6500 нь орос, 4400 нь украины цэргүүд байсан бол 3500 орчим нь хоёр улсын энгийн иргэд байсан гэдгийг НҮБ-ын Хүний эрхийн дээд комиссын албанаас гаргасан тайланд дурджээ.
Тиймээс дайнд оросын 14,000 хүнийг алсан гэх мэдээлэл нь ХУДАЛ байна.
Аливаа мэдээллийг заавал нягталж, баталгаатай эх сурвалжаас авч байхыг Factcheck.mn сануулсаар байна.
