Герман цэргээс корона вируст халдвар илэрсэн хэмээх мэдээллийг бид нягтлан ХУДАЛ тухай бид мэдээлсэн билээ.

Тэгвэл isee.mn мэдээллийн сайт дараах мэдээллийг түгээв. Ингэхдээ Герман цэргээс корона вирус илэрсэн гээд, өчигдөр буюу 19-ний өглөөний 08:00 цагаас Улаанбаатар-Франкфурт чиглэлийн 118 иргэнийг Улаанбаатар хотоос тээвэрлэсэн гэх баримтыг дурджээ. Энэхүү баримтыг нягталж шалгахад Германы уулын цэргийн 23-р бригадын буцах үйл явдалтай огт холбоогүй болох нь батлагдлаа.

Өнөөдөр цахим орчинд “11 сарын 5нд Өмнөговийн Тавантолгойд кэмпэд корона илэрсэн байж. Яагаад нуусан бэ??? Өмнөговьд корона тарсан болж таарлаа! ХБНГУ ын цэргүүд Монголд корона тусаад нутаг буцаж чадахгүй хөл хорионд орсон бөгөөд 19-нд нутаг буцах болжээ.Тэд Өмнөговийн Тавантолгойд байсан аж. 11сарын 19ний мэдээ. Тэд УБ-т 14хоног хөл хорионд байсан. Тэдний нэгийн корона 11 сарын 5нд батлагдчихсан байж” хэмээх мэдээлэл цацагдсан бөгөөд уншигчаас нягталж шалгах хүсэлт бидэнд ирсэн юм.

Дээрх иргэний фэйсбүүк хуудастаа хуваалцсан Германы хэвлэл мэдээллийн хэрэгслээр гарсан мэдээлэл нь “Корона карентин: Уулын цэргүүд Монголоос буцан иржээ” гэсэн гарчигтай бөгөөд нийтлэлийн агуулгыг ерөнхийлөн хүргэвэл “Уг нь аль хэдийнэ буюу 2 долоо хоногийн өмнө ирсэн байх ёстой уулын цэргийн 23-р бригад өнөөдөр ирлээ. Учир нь нэг цэрэг нь корона вируст халдвар туссан тул ийнхүү аргагүйн эрхэнд Улаанбаатар хотод 14 хоног карентинд оржээ” гэсэн байжээ.

Юуны түрүүнд ХБНГУ-ын Элчин сайдын яамнаас тодруулахад дээрх мэдээллийг худал болохыг хэлсэн юм. Түүнчлэн Батлан хамгаалах яамны хэвлэлийн албанаас мөн уг мэдээллийг үгүйсгэсэн юм.

Харин бидний нягталж шалгаснаар Монголд үүргээ гүйцэтгэж байсан Германы уулын цэргийн ангиас корона вирус илэрсэн гэдэг нь ХУДАЛ мэдээлэл боловч уг цэргийн анги нь буцах ёстой хугацаанаасаа 2 долоо хоногоор илүү Монголд байсан нь үнэн ажээ.

Үүний шалтгаан нь Улаанбаатараас авах ёстой байсан Бундесверийн тусгай үүргийн онгоцны багаас корона вируст халдвар илэрсэн тул уг онгоц эргээд нисэхээс аргагүй болсноос үүдэж цэргүүдээ авч чадаагүй тухай Германы бусад хэвлэл мэдээллийн хэрэгслээр мэдээлжээ. (Эх сурвалж)

Мөн Германы томоохон хэвлэл мэдээллийн байгууллага болох Spiegel Online-ийн мэдээлснээр “Монголоос уулын цэргүүдээ авах тусгай үүргийн нисэх хүчнийг Монголруу явах замд нь зогсоох тушаал гарчээ. Учир нь агаарын бэлэн байдлын баг дотроос корона вируст халдвар илэрсэн нь батлагдсан ажээ. Тиймээс онгоц нэн даруй буцжээ.

Мөн армийн хэвлэлийн төлөөлөгч “Цэргүүд Улаанбаатар дахь зочид буудалд байрлаж байгаа бөгөөд Герман руу буцах нислэг хийхэд бэлэн байна” хэмээн хэвлэлд мэдэгдэж байжээ.

Уг цэргийн анги нь Монгол Улс болон ХБНГУ-ын Зэвсэгт хүчний хамтарсан Уулын явган цэргийн дунд шатны сургалтын үйл ажиллагаанд оролцохоор ирсэн 23 дугаар бригадын цэргүүд ажээ.