“Төрсөн огноогоо дарж, KHAN BANK төслөөс танд хэдий хэмжээний мөнгө олгогдохыг мэдэж аваарай” гэсэн мэдээллийг фэйсбүүкт постолжээ. Гэвч энэ нь ХУДАЛ, залилангийн шинжтэй байгааг доор нягтлав.
Factcheck:
Юуны өмнө ямар пэйж энэ мэдээллийг тараасныг шалгалаа. ХААН банкны логотой ч уг пэйж нь “Khan Consulting” гэсэн нэртэй байна. Энэ нэрэн дээр дараад орвол 2022.09.22-нд нээсэн пэйж боловч өөр ямар ч мэдээлэл орж байгаагүйг харж болно.
Page transparency гэсэн хэсэгт орж, Go to Ad Library буюу төлбөртэй мэдээлэл түгээсэн түүхийг нь харвал 2026.01.06-ны өдөр таван зэрэг төлбөртэй постыг Facebook, Messenger, Instagram, Threads гэсэн таван плотформд түгээжээ. Тэдгээр постын доор VALUECHAINNETWOREX.COM гэсэн линк холбосон ба “Өргөдөл гаргах ойлгомжтой журам” гэсэн гарчигтай байна.
Энэ нь уг пост зорилготойгоос гадна гарчгаас нь харахад монгол текст биш болохыг илэрхийлж байна. Энд нь дарж ороход хуурамч хаяг болохыг репортолжээ.
Фэйсбүүк дэх анхны постын доор холбосон линкийг мөн шалгалаа. DIGITALASSETHORIZON.COM гэсэн линкийг холбосон байсан руу дарж орвол News.mn сайт руу үсэрч орж байна.
Гэвч хэдэн секундийн дараа “Та орос хэлээр ярьдаг уу?” гэсэн асуулттай цонх гарч ирж байгаа юм. “Хөтөлбөрт оролцохын тулд орос хэлийг анхан шатны мэдлэгтэй байх шаардлагатай” гэжээ. Энэ найруулга нь мөн л монгол биш гэдгийг ойлгомжтой харуулж байна.
Доор нь “Тийм”, “Үгүй” гэсэн хоёр сонголт өгч байна.
“Үгүй” гэсэн сонголт хийхэд “Хандалт зөвшөөрөгдөөгүй” гэсэн бичиг гарч ирж байна.
Харин тийм гэсэн сонголтыг дарвал News.mn гэсэн сайтын мэдээ харагдах боловч доод хэсэгт олон нийтийг төөрөгдүүлсэн, илт мэдээлэл авч залилах шинж чанартай, огт өөр агуулга оруулж, өөр үйл явдлын зураг ашиглажээ.
Дээр дурсан VALUECHAINNETWOREX.COM гэсэн линкийг холбосон мөн ХААН банкны логотой өөр агуулгатай постууд ч олноор шэйрлэгдэж байна.
Уг холбоос руу ороход оросоор бичиг гарч ирж байгаа юм.
Цахим залилан газар авч байгаа ийм үед дээрх байдлаар шалган нягталж байхыг Factcheck.mn зөвлөж байна.
